¹ ''Mwena ghutegherere kumeho yande, ove shirongo shaure; renka dimuhoko nadintje dikuwapukurure; shwenenu kuno pepi tuya ghambe; yiyenu tuyaponge palivango lya mpanguro. ² Are ayito nkwati yakuupumeyuva, yikare muhungami wanakuntje? Mbyo atapa dimuhoko mumaghoko ghendi nakumuvatera afunde vahompa. Rufuro rwendi ngaruvarwadeka palivhu yira mbundu tupu, ano lighonga lyendi ngalivapepura yira mpepo. ³ Ghuye kuvakwama pahana shiponga, ayendere mundjira omo dapira kulyata rumwe mpadi dendi. ⁴ Are wakuvhura kuruwana vitetu vino vimutompoke? Tunda ruvharo yenda ruvharo kulitameko? Ame, Hompa Karunga, ogho akaliroko palitameko, mo nka nganikakarako kuuhura ame ne ame vene. ⁵ Virudi vyatjira kovyo vyamona; ghuhura waudjuni ngaukankama; vyavyo kukupongayika vishwene pepi. ⁶ Vamaparambo kukuvatera -vatera, vavo kukutantera -tantera ashi, 'Tukondjenu.' ⁷ Mukakushonga vipirangi kukorangeda mushambuli wa ngorodo, wahamara kukorangeda mupampali avipampare pamwe tupu, vakuroterera kuwa; kuno vavo kuna kupampara Karunga wavo wavipempa. ⁸ Ano ngoli ove, Israeli, mukareli wande, mutoghororwa wande Jakopo ove, ntekuru da muholi wande Abrahamu, ⁹ nakughupa kuvikondo vyaudjuni, mbyo nakuyita kuvirongo vyaghure, kuna kukutantera weno ashi, ove mukareli wande; ame kapi nakunyenga. ¹⁰ Washatjira, ame kumwe nove nakara. Washayomapa, ame Karunga ghoye. Ame ngani kunkondopeka, nka ngani kupopera, nakukwata nikuyerure nalighoko lyande lyarulyo. ¹¹ Kenga, vakukugarapera; ngavafa ntjoni nakushwauka; ovo ngavadikuvyuko, ngavakara vantu vantu tupu nka ngavadongonokapo, ovo ngavakaro shi nakukuvyuka ve. ¹² Ngaushana-shana vanankore voye ngoli kapi ngaghuvawana; ova vakutumba vita nove ngavakara vininke vyamaghoko-ghoko, nda maghoko-ghoko vene. ¹³ Mbyevishi ame Hompa Karunga ghoye, ogho akukwaterero kulighoko lyarulyo, nakukutantero ashi, 'Washatjira; kunikuvatera.' ¹⁴ Washatjira, Jakopo ove mudidipo, anwe vakafumu vamuIsraeli; ame ngani muvatera- ame Hompa mo nakutanta ngoweyo, ame Hompa mupongoki waIsraeli, muparuli ghoye. ¹⁵ Kenga, ame kuna kukuruwana ghukare shikeshito shakutwepa, shashipe shavikondo viviri; ove ngaundyambaura ndundu nakudihanaurapo; ano ndunduwena ngaudimyona dikare mbundu. ¹⁶ Ove unavafundu, ano mpepo ngayivapepwira ghure; yivahanaure po. Ove ngauhafa, ghufumadeke Karunga ghoye wakupongoka waIsraeli. ¹⁷ Varunyando naruhepo ngavashana mema, ene ngoli kapi ngavaghawana, dimulighu davo ngadikukutira; ame Hompa Karunga ngani limburura ndapero davo, Ame, Karunga waIsraeli, narumweshi nganivashuvilira. ¹⁸ Ame nganirenka dimukuro dipupe mukatji kandundu damawe, mudimuramba ngamukara marunone ghamema; mburundu nganiyititunukita yikare madiva ghamema, shirongo sharukukutu ngashikara runone rwa mema. ¹⁹ Mumburundu nganimenitamo vitondo vyaSida, vyaakasiya, na mirete, nevi vyandjwe. Ame nganitura maushika mumburundu. Kumwe nka navitondo vyantjitwe vyamarudi. ²⁰ Vino nganiviruwana mukunegheda vantu vadimburure na kukwatalighano, ashi ame Hompa Karunga naviruwano, nka ashi Karunga wakupongoka waIsraeli ndje anavitapo. ²¹ 'Yitenu vinka vyenu,' mo anakughamba Hompa Karunga, 'Yitenu vinka vyenu vyamulyo kuhamena vakarunga venu ovo vavipempa,' mo anakughamba Hompa Karunga waJakopo. ²² Yiyenu muyite maundjoni ghenu; ghaturenu kumeho, anwe mutape mughano kwetu kovyo ngavishoroko, mposhi ngatuviyive nawa. Tufwatulirenu dimughano davishorokwa vyakare, natwe tuvikengurure nakuyiva ashi weni vyatikilire mo. ²³ Tantenu vyakuuto,mposhi ngatuyivirepo ashi anwe shiri vakarunga; rughanenupo vininke vimwe vyaviwa nevi vyavidona, ovyo vituyitiro ghoma nautjirwe. ²⁴ Munakukengasha, vakarunga venu kundereko mulyo na viruwana vyenu navyoshi kundereko mutompo; novo vakarango kuruha rwenu kundereko mulyo. ²⁵ Ame natoghorora ghumwe kwara mukuro, kuna kuya anakuya'atunde kwara upumeyuva lidina lyande anakukugha ogho nawana, ghuye ngalyatanga vapangeli yira lirova, yira moomo ashuntanga mushongi wavapoto lirova. ²⁶ Are wakuvhura kutuyivita vino kuntamekero, natwe tuyive? Kumeho yaruvede, mposhi natwe ngatughambe shi, 'Ghuye shiri muuhunga anakara ndi'? Kundereko mpiri umwe wakuvivhura, kundereko nka ogho amuyuvho mughambeko vintu. ²⁷ Ame wamuhoverera kutantera Zion, 'Kenga vavo ne vano!' Kwatuma mutumwa kuJerusalemu. ²⁸ Pakuvakenga, kundereko ghumwe wamukatjikavo wakuvhura kutapa maghano ghamawa, ndi are po, ntjeneshi anipura, wakuvhura kulimburura nkango yande. ²⁹ Kenga, navantje kundereko vyakuvhura, naviruwana vyavo nka kundereko mutompo; vintjwantjo vyavo vyapepuka nka muporongwa,