¹ ''Shengawida, shengawida vantu vande,'' mo anakughamba Karunga ghoye. ² ''Ghamba naghughomoki kuvaJerusalem; nakuyuvita kukwendi ashi vita vyoye vina shagha, lipiro kutikitamo uhungami koye vana vikughupiripo, mposhi uwane vikando vyakukuvyukuruka kutunda mumaghoko gha Yehova kundjo doye nadintje.'' ³ Liywi aliliri ashi, ''Mumburundu wapayikenu ndjira ya Yehova; yivyukitenu muAraba ndjira ya nkungwashirongo ya Karunga wetu.'' ⁴ Kehe lino liyana ngavaliyerura, ntani kehe ndundu navindundwena ngavavilyalyakanita, na livhu lyakupira kuvyukulira likare linalyalyakana; ⁵ ntani ghuyerere waYehova ngaushoroke, na vantu navantje ngavaumona kumwe; mbyevishi kanwa kaYehova nganavighamba. ⁶ Liywi alighamba ashi, ''Lira.'' Limwe alilimburura ashi, ''Mukonda munke nililira?'' ''Marutu naghantje ne mushoni, na matikitomo matwenyidiro ghavo ghanakara yira dimucuko damulifuva. ⁷ Mushoni kudjoghoka ntani mucu kukasha nange munku waYehova aghufudu pavyo; nawanawa ghuntu ne mushoni. ⁸ Mushoni kudjoghoka, mucuko kukasha, ngoli nkango da Karunga wetu ngadikarapo kunaruntje.'' ⁹ Yenda pawiru yandundu yakuyeruka, Zion, mutwali mbudi dadiwa. Yiyira unene, Yerusalem. Anwe mwayitango mbudi dadiwa, yerurenu maywi ghenu, mwashatjira. Ghambenu kuvitata vyaJuda ashi, ''Karunga wenu uno!'' ¹⁰ Kenga, Yehova Karunga kunakuya yira murwani wamufundi, ntani lighoko lyendi lya nkondo kumupangerapo. Kenga, mfuto yendi naye yakara, ntani ovo ayoghora kuyenda kumeho yendi. ¹¹ Ghuye ngalyita shighunda yira mushita, ngavapongeka vindjwi mumaghoko ghendi, nakuvimbira pepi namutjima wendi, ntani kupititira nauhaya vindjwi vyavyo kuna kuyamweka vana vavyo. ¹² Are ogho ameto mema ghamulike lyalighoko lyendi, ameto liwiru na unene walighoko lyendi, aturo mbundu ya udjuni mushikumba, aviho ndundu pashiviha, ndi vindunduwena palishetakano? ¹³ Are ogho ayivo ndunge da Yehova, ndi ogho amurawiliro akare mutapi maghano wendi? ¹⁴ Kware oko awanine rumwe marawiro? Are ogho amuvyukitiro mundjira yauhunga yakuruwana vininke, nakumupa ndunge, ndi amuneghede ndjira yakukwata vininke? ¹⁵ Kenga, dimuhoko dinakara yira litha mushihemere, ntani kwaditura yira mbundu pashiviha; kenga, ghuye kuviha virudi yira tuninke twatudidi. ¹⁶ Libanon ne kapishi maholi ghakugwaneka, nampiri vikorama vya muwiya wendi nakugwanekashi kukara ndjambo yalishwakerero. ¹⁷ Dimuhoko nadintje kapi dagwanekapo kushipara shendi; vavo navimweshi kukwendi ghuye. ¹⁸ Kware ngoli oko ngauvura kumushetakanita Karunga? Kuvintjwantjo munke ngaumushetakanita ghuye? ¹⁹ Shintjwantjo! Mushongi washo kushivukumina kunya. ²⁰ Mukutapa ndjambo muntu kuhoroghora shitondo osho ngashipiro kughora; ghuye kushanashana mushongi ogho akaro nauyivi amushongere shintjwantjo osho ngashipiro kuwa. ²¹ Kapi mwaviyuvandi? Kapi mwavimona ndi? Kapi vavimutantilire kuntundiliro ? Kapi mwavikwata lighano kutunda kumatameko gha udjuni ndi? ²² Ghuye ndje ghumwe ogho ashungiro pawiru yalitameko lya udjuni; ntani vatungimo yira mpadi-mpadi kumeho yendi. Ghuye kunanununa liwiru yira likeshe lyakumakende nakulitoma yira tende mwakutunga. ²³ Ghuye kughurumwita vapangeli kunavimweshi na kurenka vapangeli vapantunda yalivhu vapire kumoneka nawanawa. ²⁴ Rusheshu unene vavatapekanga, rusheshu unene vavakunanga, ndandani davo kapi dakwata nawanawa mulivhu, opo afuda pavo vavo kukasha, ntani mpepo kuvatwara yira rugo. ²⁵ ''Kware ngoli oko umfanikita me, ogho nakufana naye?'' mo anakughamba mupongoki. ²⁶ Kankuka ukenge muliwiru! Are ogho ashito dino ntungwedi nadintjeya? Ogho apititiro liyopo lyavo nakudiyita nadintje pamadina. Muunene waunankondo wendi na panunankondo wendi, pato oyo yinapiropo. ²⁷ Nke mwarenkeranga ashi, Jacob, nakushingonona, vaIsraeli. ''Ndjira dande dahorama kwa Yehova, ntani Karunga wande kapi akara nashinka kovyo vyampango udito''? ²⁸ Kapi mwaviyiva ndi? Kapi mwaviyuva ndi? Karunga wakukarererapo, Yehova, mushiti wa uhura walivhu, kapi arorokanga ndipo apire nkondo; kundereko uhura kuliyuvhiko lyendi. ²⁹ Ghuye kutapa nkondo kwava vakuroroka; kwava vakupira nkondo ghuye kuvapa nkondo dadipe. ³⁰ Nampiri vanuke avaroroka nakupira nkondo, vamati ghona vapunduke vawe: ³¹ Ngoli ovo vahuguvarango mwa Yehova ngavavawederera nkondo davo; ngavateremba namavava yira mpungu; ngavaduka ngoli kapi ngavaroroka; ngavayenda ngoli kapi ngavapwilira.