¹ Paruvede oro Marduk-Baladan mona Baladan, hompa waBabiloni, atumu ntjangwatumwa ntani ushwi kwa Hesekira; mbyevishi ghuye kwayuvhire ashi Hesekiya kwavelire ntani averuka. ² Hesekiya kwamuhafitire unene kuvininke vino; ghuye anegheda vatumwa kundjugho yendi yakupungwira vininke vyendi vyamulyo unene- shiliveli, ngorodo, vidumba ntani maghadi gha mawa, kundjugho yendi yakupungwira. Kwato evi vyakaliro mundjugho, ndi muuhompa, evi Hesekiya adilire kuvanegheda. ³ Makura muporofete Isaya aya kwahompa Hesekiya nakuyamupura, ''Vinke evi vanakutantere vano vakafumu? Kuninko vanatundilire?'' Hesekiya aghamba, ''Vavo kunaya kwande kunatundilire kushirongo shaure kuBabiloni.'' ⁴ Isaya apura, ''Vinke evi vanayakenge mundjugho yoye?'' Hesekiya alimburura, ''Vavo kunakenge navintje vyamundjugho yande. Kwato nka vininke vyande vyamulyo nadiri kuvanegheda.'' ⁵ Makura Isaya aghamba kwa Hesekiya, ''Tegherera kunkango yaHompa wavapangeli: ⁶ 'Kenga, mayuva papepi ghanakara kunakuya apa vininke navintje vyamumbara yoya, vininke evi vakurona voye vapungura dogoro kuliyuva lino, ngavavitwara kuBabiloni. Kwato ovyo ngavashuvako, anaghamba Hompa. ⁷ Vana vavakafumu vakuyitira ve, ava wayita naumoye ngavavaupa vavatware, ntani vavo ngavakakara vakareli mumbara yahompa waBabiloni.''' ⁸ Makura Hesekiya aghamba kwa Isaya, ''Nkango yaHompa eyi unaghamba yiwalika.'' Ghuye kwaghayalire ashi, ''Ngakukakara mpora naukalinawa naukalinawa mumayuva ghande.