¹ Mushirugho sha Hezekiah wamuwanine uvera wakushana kumutwalidira kumfa. Ano ngoli Isaiah waAmoz, wamuporofete, amumonekere, kumwe na kumutantera shi, ''Karunga anatanta shi, kuwapayikire, mukonda ve kuna kufa, kapi ghuparuka.'''' ² Makura Hezekiah apirukiri kulikuma kumwe nakuraperera kwa Hompa Karunga wandi. ³ Ghuye mpo antantilire shi, ''Hompa Karunga wande, nakanderere, vhurukashi ame nakukarera muushii wande nauntje, kumwe nakushetekerako kehe pano kuruwana vyauhunga kumeho yoye.'' Makura Hezekiah alili shiri unene. ⁴ Makura nkango yaHompa Karunga ayipitiri mwaIsaiah, yakutantashi, ⁵ ''Yenda kumwe nakatantera Hezekiah, mpititi wavantu vande, 'Ashi Hompa Karunga, Karunga wa Daviti wavakurona voye, anatanta shi: Ana yuvhu ndapero yoye, nakukenga maruntjodi ghoye. Ana yuvhu ndapero yoye, nakukenga maruntjodi ghoye. Weno, kuna kukuwedererako mwaka murongo na ntano kuliparu lyoye. ⁶ Ngani kupopera kumwe nakupopera nkurumbara yaJerusalem kuvapititiri vaAssyria, ame nka ngani kunga nkurumbara yino. ⁷ Vino mbyo vineyidito vya kwa Hompa Karunga, ame nganitikitamo mahuguvalito ghande. ⁸ Ndondero yakukanduka adika hompa Ahaz, Hompa Karunga ngaturapo mundunduma ngadikare ndondero dakughurumuka ngadivyuka dikare murongo.'''' Makura mundundu aghuvyuka muruku murongo pandondero kuruha oko yakalilire. ⁹ Oyino ndjo ndapero atjangire Hezekiah hompa wa vaJudah, muruvede rwa uvera liveruko lyendi: ¹⁰ ''Ame naghalire katji naliparu lyande, ame nganipitira muheka dashirongo shavafe; ame kwantumako naliparu lyande nalintjeya. ¹¹ Ame natantire kapi nka ngani mona Hompa Karunga wande, Hompa Karunga wande wamushirongo sha vanamwenyo. Ame kapi nka nganimona vatungimo vamuudjuni uno. ¹² Liparu lyande valitundita valitwara ghure name yira mutakamiti ndjugho; nakuwapayikira muliparu lyande yira mutungi; ove kuna kuntundita ko kulimoneko lyande; pakatji kamatiku na mwi kuna kushayikita liparu lyande. ¹³ Ame nalilire dogoro ngurangura; yira nyime anatjora vifupa vyande. Pakatji kamatiku na mwi kuna kushayikita liparu lyande. ¹⁴ Yira kumina kudameka kwakunene; yira ruminito rwa kukughora kwaliputukuwa; mantjo ghande aroroka kukengera muwiru. Hompa, ame naroroka; mpopere me. ¹⁵ Nke nka vyo nighamba? Ghuye atantera, nka mbyo aviruwana; kuniyenda kukuwora mwaka dande nadintje mokonda vanankete naruguvho. ¹⁶ Hompa Karunga, mahepeko watuma mawa kukwande; kuvhura ghumbyutire liparu lyande; ove wapungura liparu lyande nka ghukanguki wande. ¹⁷ Mukondashi vitundwamo vyande mbyo nagwanekere tjutju yino. Wandjoghora mulikwina lyakutanganita, ove mbyo wavhukuma ndjo dande nadintje kuruku roye. ¹⁸ Kushirongo sha vafe kapi shamupunduranga; mfa kapi damutanganga; kovo vawerango mulikwina kapi vahuguvara muushiri ghoye. ¹⁹ Muntu wakuparuka, muntu wakuparuka, ndje wakukupa mpandu, yira moomo naruwana lino liyuva; shakuyivita ushiri ghoye kuvanuke. ²⁰ Hompa Karunga kuna kushana kumpopera, nka ngatu shamberera na ngaro mayuva naghantje gha kuparuka mundjugho ya Hompa Karunga.'' ²¹ Weno Isaiah aghamba, ''Varenke vaghupe ndjwi na kuyitereka, nka ngaveruka.'' ²² Hezekiah naye aghamba, ''Nke vikaro shineghedito ogho niyendita kundjugho ya Hompa Karunga?''