¹ Opo ayuvhire hompa Hezakiah vitundwamo vyavo, atavaura vidwata vyendi, nakudamuna ntjako akuike, nakuyenda muntembeli yaHompa. ² Atumu Eliakim, ogho akaliro mumundi, naShebna kamutjangi, ntani navakurona vavapilisteli, navantje vadwatiro mudwato waruguvho, kwamuporofete Isaia mona Amoz. ³ Makura avaghamba ashi, ''Hezekiah anaghamba shi, 'Elino liyuva lyamaudito, kashitiko nalishwaghu, yira moomo akaranga mukeke shi kushana vamushampuruke, ngoli vawina kundereko nkondo dakushampuruka. ⁴ Pamwe Hompa Karunga wenu kwayuva nkango damukondi wenu, ogho lyatuma lirenga lyahompa waAssyria ayaghambe vininke dona kwa Karunga wakuparuka, ntani nakudira kutambura nkango odo ayuvha Hompa Karunga wenu. Rapererenu ndapero denu kuvininke vino vinakaropo shimpe weno.'' ⁵ Vakareli vahompa Hezekiah avaya kwaIsaiah, ⁶ makura Isaiah avatantere ashi, ''Katanterenu lirenga lyenu ashi 'Hompa kuna kughamba ashi, ''Mwashatjira nkango odo mwayuvha, odo vaghambire vakareli vahompa waAssyria dakuntjwaura. ⁷ Nganitura mpepo mwendi, makura ngayuvhe mbudi nakuvyuka kushirongo shendi. Ame nganikamurenka ngakawe kurufuro mushirongo shendi.'''''' ⁸ Makura mukondi wavo avyuka nakukawana hompa waAssyria kuna kurwa naLibnah, morwa ghuye kwayuvhire shi hompa atundamo muLachish. ⁹ Makura Sennacherib ayuvhu shi Tirhakah hompa waCush na Egipute vanakupongayiki varwe naye, nko kutuma nka vatwali mbudi nambudi yavo kwaKezekiah: ¹⁰ KwaHezekiah, hompa waJuda, mwashapulitira Karunga ogho mwahuguvara amupukite, mukughamba shi, Jerusalemu kapi ngavayitapa mumaghoko gha hompa wa Assyria.'' ¹¹ Kengenu, mwayuva ovyo varuwanine vahompa vamuAssyria kuvirongo navintje mukuvadjonaura, anwe nwe ngavapopera ndi? ¹² Vakarunga vavintjwantjwo vadimuhoko vavapopilire, dimuhoko odo vadjonaura vakurona vande valira lyalikondi: Gozan, Haran, Rezeph, navanu vaEden muTel Assar? ¹³ Kuni anakara hompa waHamath, hompa waArpad, hompa wamunkurumbara da Sepharvaim, vakuHena, na Ivvah?'''' ¹⁴ Hezekiah atambura ntjangwatumwa oyo vamupire vatwalimbudi makura ayivarura. Ayendi muntembeli yaHompa nakuyihanita kumeho yendi. ¹⁵ Hezekiah nko kuraperera kwa Hompa: ¹⁶ ''Hompa wamunankondo, Karunga waIsraeli, ove kwashungira pawiru yavishitwa vyamavava, ove pentjoye Karunga pawiru yauntungi nauntje wapalivhu. Mushiti waliwiru na livhu. ¹⁷ Pirura litwi lyoye, Hompa, nakutegherera. Pahuka, Hompa, ghukenge, nakuyuvha nkango da Sennacherib, odo anatumu dakushwaura Karunga wakuparuka. ¹⁸ Ushili, Hompa, vahompa vaAssyria vadjonaura dimuhoko nadintje na virongo vyavo. ¹⁹ Vanatura vakarunga vavo vavintjentjwa mumundiro, mukonda kapishi vakarunga vavintjentjwa nani ngoli viruwana vyamaghoko ghavantu, maghowa na mawe. Ano makura vaAssyria avavidjonaura. ²⁰ Makura weno Hompa Karunga wetu, tupopere kuunankondo wendi mposhi ghuntungi nauntje wapalivhu ngauyivhe ashi ove pentjoye Hompa.'' ²¹ Makura Isaiah mona Amoz atumu mbudi kwaHezekiah, nakughamba shi, ''Hompa, Karunga waIsraeli kuna kughamba ashi, 'Mukondashi munaraperere kwande vyakuhamena Sennacherib hompa wa Assyria, ²² Yino ndjo nkango ana ghamba Hompa vyakuhamena kwendi: ''Mona Zion wamukamali ogho adiro kukara na mukafumu akunyenga ntani kwakushepanga na lishentjo; mukadona wamuJerusalem kupuka mutwe wendi koye. ²³ Ogho washentja nakushwaura? Ogho waharukilire nakukengurura? Kwaviruwanine kwa Hompa waIsraeli. ²⁴ Vakalire voye ovo watumine vakashentje Hompa nka avakaghamba shi, 'Nayendi kundaha-ndaha yandundu na matemba ghande ghamangi, kundaha-ndaha yamutika washirongo sha Lebanon. Nganiteta ngundi dasho dadire na vitondo vyasho vyaviwa vyamaundunga, ntani nganingena mumavango ghasho ghaure, nawiya washo wanyango. ²⁵ Namborora mbora mbyo nanwanga mema ghamo; napwililita dimukuro nadintje damuEgipute na mpadi dande. ²⁶ Kapi waviyuvha omo navitokolire pakare nakuviruwana mumwaka washikumwa? Weno kunakuviruwana vitikemo. Shitambo shenu nwe muno kunahoro kuyatjindja nkurumbara dakupama dikare ndambo damaruhupwa. ²⁷ Vatungimo, vakaro naunankondo wausheshu, vanakara na maghayadaro na lishwaghu. Vavo vanakara ngoli yira vitondo vyamumafuva, ndi mushoni waupe, ndi mushoni wapashihokwa-hokwa shandjugho ndipo shi mulifuva kumeho yampepo yakuupumeyuva. ²⁸ Ame nayiva navintje vyakuhamena koye, omo wayendanga nomowayanga, naugara woye wakwande. ²⁹ Mukonda yaugara woye wakwande, ntani mukonda yaurunde woye wo nayuvha, nganitura lirovo muliyuru lyoye, ntani nganitura nka shininke shande mukanwa koye; nganikuvyuta momo mundjira wayire.'' ³⁰ Oshino ntjo shiyivito shoye: Namwaka kuulya ovyo vyamenanga panaumwavyo, mwaka wauviri ngaulya ovyo ngavimeno kovino. Ngoli mumwaka wautatu unakona kukuna na kuyangura, kukuna vipata vyoye makura ngaulye ndya davyo. ³¹ Ruhupwa rwalira lya Juda ovo vaparuko navo nka ngavatapeka ndandani makura ngavayangure ndya. ³² KuJerusalemu ngakutunda ruhupwa; kundundu ya Zion ngakutunda ruhupwa. Hompa ngaviruwana vino. ³³ Makura Hompa aghambavino vyakuhamena kwa hompa waAssyria: ''Ghuye kapi ngaghamba mo muno munkurumbara ntani ghuye kapi ngaponya ngumba muno. Ghuye kapi ngaya na kehe shikandulito ndi ashi adike shitanda. ³⁴ Ndjira oyo ayire ndjo nka ngavyuka; kapi ngayangena mo muno munkurumbara- uno ngo umbangi wa Hompa. ³⁵ Ame nganiyihamena nkurumbara yino nakupopera, mulikuto lyande ntani na mulikuto lyamukareli wande Daviti.'' ³⁶ Makura muEngeli waHompa ayendi akahomone shitanda shavakavita vamuAssyria, nakudipagha vakavita kuliyovi limwe na dimurongo hambondatu na ntano. Opo varambukire vantu ngura-ngura, vawanine vimpu vinarara kehe pano. ³⁷ Makura Sennacherib hompa wa Assyria atundumo muIsraeli nakuyenda kumundi akatunga muNinine. ³⁸ Paruhulilira, opo atongaminine muntembeli ya Nisrok karunga wendi, vana vendi vavakafumu vaAdrammelek na Sharezer avamudipagha na rufuro. Makura avahene vayende mushirongo sha Ararat. Monendi Esar Esarhaddon wamukafumu apangere mulivango lyendi.