¹ Mburundu na Arabaha ngavihafa; ntani lirondo ngalihafa nakumoneka. yira mucuko, ² ngashipayima unene nakuhafa unene nakuyimba; lifumano lya Lebanoni ngavalimupa, ghufuuli waKarimeli na Sharoni, ngavikenga lifumano lya Karunga muuwa wa Karunga. ³ Kunkondopeka maghoko ghamakashu, nakukoreka ngoro dinakukankamo. ⁴ Tantera ovo vanakaro naghoma, ''Korenu, mwasha tjira! Kenga, Karunga ghoye ngavyuta rughoko, nalifutito lyendi. Ngayakulipopero lyoye.'' ⁵ Ano ngoli mantjo ghavatwiku ngaghamona, ntani matwi ghavipurupuru ngagha gharuka. ⁶ Shirema ngashivatauka yira mbambi, ntani ruraka rwakumango ngaruyimba. Mukondashi mema anavhuka muArabaha, ntantani dimukuro mumburundu. ⁷ Dimusheke dantokota ngadikara livango lya mayowaneno vantu, ntani livango lyamburundu makora ghamema; mushirongo shavambwawa, mo mumararo, ngamukara mushoni na mbu ngavikuliramo. ⁸ Ndjira yakuwiru ndjo ngavakuwa ndjo ndjira yakupongoka. Vakunyata kapi ngavayenda mo. Ano ngoli yayo yandjegho ayendango mo. Mavaya kapi ngaghayenda mo. ⁹ Nyime nakukaramo shi, vikashama vyanyanya kapi ngavikara mo; vyavyo kapi ngauviwana mo, mwamo ngamuyenda ovo vakusha. ¹⁰ Ovo vayovora Karunga ngavakavyuka ngavayayimbe muSiyoni, na naruntje ruhafo ngarukara padimutwe davo; ruhafo na rumwemwe ngarukara mwavo; ruguvo na shitukutjima kapi ngashikara ko.