¹ Yiyenu pepi, vantu vaudjuni nauntje, kupongekenu na kutegherera, renkenu udjuni na kehe shino shatungo mo shiye kuno nakuyategherera. ² Karunga anagarapa kudjuni nauntje, rambangako na vakavita; Hompa anavakandwiri kulidjonauko. ³ Marutu ghavafe kapi ngavagha vumbika. Nani ngoli ngaghavavorera nakunukira po; ndundu ngadinyata kuhonde. ⁴ Liyuva kakwedi na ntungwedi ngavihanauka yira mbundu. Liwiru kapi ngalimoneka ntungwedi ngadiwa yira lihako linatundo kushitondo shamandjembere. ⁵ Hompa Karunga awapeka rufuro muliwiru ndo ngaruwanita kulidjonauro lya Edom, novo vantu akandwira Karunga kulidjonauko. ⁶ Rufuro rwa Hompa ngarugeha honde yavo na maghadi, yira ndjwighona na shimpendje shakundjambo. Karunga ngatapa ndjambo yino mushitata shadoropa yaBozrah na shidjambero shashinene. ⁷ Ngombe ngadiwa navo, kumwe nantwedu ghona nedi dadinene. Livhu ngalipoposha honde, na maghadi. ⁸ Runo ndo ruvede Karunga ngayoghora nakuvyuta rughoko kovyo vyashoroko kumbunga yendi. ⁹ Marunone gha Edom ngavaghapirura ghakare shira, livhu ngalikara ghuturatura ntani livhu ngalipyapyara unene. ¹⁰ Ngalitwera matiku na mwi; muti ngaukaroko kunaruntje, mwaka namwaka ngoli ngavishoroka, kwa ngataghurukopo kunaruntje. ¹¹ Vidira na vikorama ngavitungapo; vakakuru na vidira vimwe ngavidika vitunguru vyavyo. Hompa Karunga ngaturapo murudi pakatji kavo walidjonauro. ¹² Kapi ngapakara nka vapangeli vaudjuni kumwe na vampititi kapi ngavakarako. ¹³ Migha, ntjontjo ngavimena nakukura mumbara yendi. Ngalikara livango lyambwawa, namavango gha vampo. ¹⁴ Vikorama navintje vyamuuwiya na vimbungu mpo pamalyero ghavyo, vikorama vimwe ngavikulilira naumwavyo. ¹⁵ Vikorama ngavipura oko ngaviwana uturo wakutunga palivango linya. Tukakuru ngatutunga vitara nakughutira maghuta mumarupako, kukonkora na kupopera vana vavyo. Makuvi ngaghakupongayika nakukupopera unene. ¹⁶ Shana mumbapira yaHompa kuhamena ntjitwe varura uyive vinke vinakutanta, kwato shishitwa ngashipiro po. Kwato osho ngashipiro kukufana naunyasho, mo anakughamba Hompa, mpepo yakupongoka ngayishiwana, nakuvipongeka pamwe. ¹⁷ Karunga ngahangura, mavango ogho ngavitunga, Karunga ngaturapo murudi wakuhangura mavango ngavatunga kunaruntje, nakunaruntje mwaka namwaka.