¹ Lihudi unene, kwenu vadjonaghuli anwe vadira kudjonaghura! Lihudi kwavarundiri anwe vadira kurundira! Nange amushayeke kudjonaghura, ngavamudjonaghura nanwe. Nangeshi amushayeke kurundira, ngavamurundira nanwe. ² Karunga, munankondo; moye tunakukengera: kehe ruvede tukare mumaghoko ghoye, liyoghoko lyetu muruvede rwa maudito. ³ Kuliywi lyalinene vantu kutjira; nange aghushapuka, dimuhoko kukukhana. ⁴ Ove kupongayika vyakudjonauka yira omo apongayikanga limbonde; yira mo lyatukanga limbonde, na vantu navo mo. ⁵ Karunga wafumana unene. Watungo mulivango lyakupongoka. Ghuye kuyuda siyoni nauhungami. ⁶ Ndje ghukorameno muruvede rwavo, kuyura naliyoghoko, ukonentu na ghuyivi, litjiro Karunga ngo ushwi wendi. ⁷ Kenga, kukema kwakunene munkungwandjira; lihuguvaro lyampora kulita nanyengo. ⁸ Nkungwandjira daghara; varuyendadjira kwato. Matwenyidiro vatjora, umbangi washagha, vantu kwato mfumwa. ⁹ Sshirongo muruguvo nakurembuka; libanoni yinafu ntjoni na kurerembuka; Sharon yinakara liyana lyamburundu; mahako gha Bashani na Karmeli kunakukanka. ¹⁰ ''Ame kunakuya,'' ngoli ana kughamba Karunga; ''Ngoli ghuye ngandjerura; ntani ngafumadeka. ¹¹ Ove kuyita mungu, na kushampuruka maudito; munku ghoye mundiro ogho ngaghukuveveko. ¹² Vantu ngavapya nakugcuvuruka, yira vishwa vyamigha ovyo vateta nakuvishora. ¹³ Ove wakaro ure, yuva ovyo narughana me; nka, nove wakaro pepi, kwata lighano nkondo dande.'' ¹⁴ Vanandjo muSiyoni vanakara na utjirwe; ghoma una vakwata ovo vadiliro kupura mwaKarunga. Are wakurumbatana kumwe na mundiro? Are wakurumbatana namundiro wanaruntje? ¹⁵ Ndjegho wakuyenda muuhunga na kughamba ushiri; ogho anyengo lirenkereromo. Ogho ashweno ufutukumwe, ogho ashayeko kuyuva vyalitetango honde, ogho afo mantjo kukenga vyavidona- ¹⁶ ndje muntu wakuparuka mulipopero, livango lyendi lyalipopero vitondo na rukenka, ndya dendi ngavadimupa, na mema ghendi ghakukarererapo. ¹⁷ Ngaghumona ghufughuli wa hompa; ngavamona shirongo osho vadira kumona. ¹⁸ Ngaghukavhuruka runyando oro wapita; ngaghukupura ashi kuni vakamakuto, kuni vangavi? Kuni vatungi vavanene? ¹⁹ Kapi ngaghumona nka vantu vavapote, vantundavirongo vamaraka ogho wadiranga kuyuva. ²⁰ Kenga kwaSiyoni, mbara yavipito; ngamumona Jerusalemu uturo wakumwe, tende yakudira kurundurura, ngoli nkindjo dayo kapi ngavadidura ndi kehe ngodi dayo kapi ngavadindembura. ²¹ Ngoli Karunga munankondo ngakara kumwe natwe, mulivango lyamukuro dadinene na marunone. Kwato vikepa vyaunkore ngaviyendomo, nka vikepa vyavinene kapi ngavipitamo. ²² Karunga ndje mupanguli wetu, Karunga ndje mutapi veta, Karunga ndje hompa wetu; ndje muyovoli wetu. ²³ Ghukorameno ghoye ghunakashupa; matokoro ghanakombanita livango; shayira udito mukudinana; pakuwana lidjonauko lyalinene, navirema ngavawana kwa vyakudjonauka. ²⁴ Vatungimo kapi ngavaghamba, vyamauvera ghavo; vantu ovo vatungomo ngavavurama ndjo davo.