¹ Kenga, Hompa ngapangera mughuhunga, ntani mona Hompa wamukafumu ngapangera muuuhunga. ² Kehe uno ngafana yira utjiliro waku mpepo na uvando wa kulikundungu, yira runone rwa mema mulivhu lya kukukuta, yira mundulye wa limuwe lya linene mushirongo shamapuku. ³ Ano mantjo ghava kakumona kapi ngagha uvira, ntani matwi ghava kakuyuvha ngagha yuvhilirako. ⁴ Wakapipi ngakukaranga na liyuvhoko, ano wa shikokoma ngavirerupa na umanguruki. ⁵ Muka vineya kapi ngawa mutwe unya waro ashi walikuto, kwato muna vimpempa ogho ngava twenya ashi afumana. ⁶ Livaya kughamba vya uvaya, ano mutjima walyo kughayadara udona na viruwana vyahana dumba, lyalyo kughamba vya mapuko mukudivyuka Karunga. Lyalyo kuyumina wandjara, nakufita linota wapumbo kunwa. ⁷ Muna vineya ndjenditito dendi didona. Ghuye kughayadarera nakufukilira vahepwe na vimpempa, nampiri ndi muhepwe kuna kughamba dauhunga. ⁸ Ngoli muntu wamfumwa kumughayadarera damfumwa; ano mukonda ya matokoro gha mfumwa ghuye ngayimana. ⁹ Shapukenu, anwe vakadi vakutontonona, na teghererenu kuliywi lyande; anwe vana kadona valifiro shinka, teghererenu kukwande. ¹⁰ Kuruku ya mwaka karuwo tupu ukorameno wenu ngaghu tjokapo, anwe vakadi mwakaro mulipopero, muyangu wa mandjembere ngauwapo, mapongo ghenu kapi ngagha yapo. ¹¹ Vakaruviya, anwe vakadi mwapiro vinka, vanankondo; shuturenu mudwato djuni na mukuture umwenu munkagi; kumangenu tjako mumbunda denu. ¹² Ngamulira ku uwa wa mafuva ghenu, kunyango ya mandjembere. ¹³ Shirugho sha vantu vande ngashishokera miya na ntjontjo, nampiri ndi mumandi ghana kupemburo mumbara daruhafo. ¹⁴ Lirombe ngava lishuva, mbara ya kufumana ngayimoneka yira yakudjumbilira, ndundu na mavango popero ngavi kara marunda kunaruntjeya, ruhafo rwa vivaradi, likungo lya vivunda; ¹⁵ dogoro mpepo ngava yipoghomwene papetu kutundilira kundaghandagha, ntani mburundu ngayi kara livhu lya kuyima nyango ngali tamunuka kukara wiya. ¹⁶ Makura uhungami ngaukara mushirongo shamburundu; ntani uhungami ngau kara mulivhu lya ndombe. ¹⁷ Viruwana vya kuhungama ngavi kara mpora; ano vitundwamo vya uhungami, likumweneneno na ukorameno wa kunaruntjeya. ¹⁸ Vantu vande ngavatunga muutungo wa mpora, mumandi gha lipopero, ntani mulivango lya maporeya. ¹⁹ Ngoli nampiri kawe kamundiro ngakawe na wiya nga udjonauke, ntani mbara ngava yiyungurure mpwaru, ²⁰ koye ove watapeko kuntere ya marunone naghantjeya ngautungikwa, ove watwaro hove yoye na shidongi kumalyero.