¹ Kengenu, Hompa Karunga mupangeli wava Engeli nga shakana limona na lintje lyamu Jerusalemu na Juda olyo vahuguvara nalyo vaparukanga yira: ndya ntani na mema, ² ntani ghuye nga ghupapo mapenda ntani na vakavita venu, vapanguli ntani na vaporofete venu, vapumbi ntani na vakurona venu, ³ vampititi va vakavita ntani na vatapi maghano venu, vakamakuto na vantu unkurungu vaghuyivi waghunene, ntani na vapuli venu vakuruwana vya ghupure. ⁴ Hompa Karunga kuna kughamba ashi, "Ame nganu tura vadinkantu ngava kare vampititi venu, ntani vavo mbo ngava karo vapangeli venu. ⁵ Vantu ngava hepeka unene, vantu vaghunyavo, ntani vantu ngava rwana nava maparambo vaavo; vanuke ngava tuka naku shwaura vakurona, ntani vantu kapi ngava fumadeka va kamakuto. ⁶ Vantu vamwe ngava tininika vakuru vavo va varume vamu mandi ghava kurona vavo ngava vatantere ashi, 'Ove wa kara na vidwata vya viwa ntani vantu vaku fumadeka; renka ghukare mupangeli wetu, mposhi ngaghu pangere shino shatata shina djonauko weno.' ⁷ Ghuye aghamba na kulimburura ashi, 'Ame naku vhurashi kumu kwafa muveruke; ntani ame kwato ndya daku mupa muparuke ntani kwato vyuma vyaku mupa mudwate. Kapishi mu nture nukare mupangeli wenu."' ⁸ Vantu vamu Jerusalemu, ntani nava Juda kapi valimburuka kwa Hompa Karunga, viruwana vyavo vyaku limba na Hompa Karunga wa nkondo nadintje ntani na ghupongoki wendi, vavo va shwena kulimburuka ku kwendi. ⁹ Vavo ku vineyeda ku shipara shavo ashi kapi va limburuka kwa Hompa Karunga; vavo ku kuyuvha mfumwa mukonda ya ndjo davo yira momu vakalire vantu vamu Sodomu virugho vina kapito; vavo kapi kava horekanga ndjo davo. Lihudi lya linene ku kwavo! Mukonda ya ndjo davo, mbyo vaku yitira vavene maghudito ghamanene. ¹⁰ Tanterenu vantu va vahungami ashi vavo ngava wana matungiko, ngava djobwana mfuto ya viruwana vya maghoko ghavo. ¹¹ Lihudi unene ku kwenu anwe vantu va varunde! Mughudito muna kara, Hompa Karunga ngamu futita ku ghurunde wenu ogho mwa ruwana. ¹² Anwe vantu va Karunga ano ngoli vanuke mbo vana karo vampititi venu - ntani vavo kuna kuhepeka vantu vande, ntani weno va kamali mbo vana kupititiro vantu vande. Anwe vantu vande, vampititi venu kuna kumutwara muliyome ntani kuna kumupukita. ¹³ Hompa Karunga kuna kutapa undjoni ku vantu; ntani ghuye nga pangura dimuhoko na dintje daku pira ku limburuka ku kwendi. ¹⁴ Hompa Karunga nga pangura vampititi na vapangeli va muhoko wendi, mukonda shi, "Vavo kwa djonaura shipata shendi sha mandjembere shipire kuyima nyango; mundjugho denu kwa yuramo limona olyo mwa vaka kuva hepwe. ¹⁵ Anwe kuhepeka unene vantu vande ntani anwe ku toghona naku deka dimutwe da vahepwe mulivhu?" Hompa Karunga wa nkondo, mupangeli wava Engeli mo ana kutanta. ¹⁶ Hompa Karunga kuna kutanta ashi, anwe vakamali vamu Jerusalemu kwa ku yerura, ntani ntingo na dimutwe denu mbyo datjomonoka, kehe kuno muna kuyenda anwe kupyata vakafumu na mantjo, ntani anwe kudwata viranda na vindjendjerera ku maghuru ghenu vitape muyoyo mposhi vakafumu vayive oku muna karere. ¹⁷ Hompa Karunga kuna kughamba ashi, ghuye ngatura vironda mu dimutwe da vakamali vamu Jerusalemu, ntani ngatura vakamali vavawa ngava kare makorongongo mu dimutwe davo. ¹⁸ Ntani nka Hompa Karunga nga shakana vano vakamali vidwata vyavo vyaghu fughuli ovyo vahora unene yira vindjendjerera vyaku maghuru, na makwarara, na viranda vyamu ntingo, ¹⁹ na makayi ghaku maghoko, na linga daku maghoko, na linga daku mayuru, na nkata daku mutwe, ntani na vituku vyaku mutwe; ²⁰ ntani ghuye ngava shakana vyuma vyavo vya ghufughuli, na nkaku davo, na sende davo, ntani nadi mutondo davo daku yita lirago. ²¹ Ntani Ghuye nga shutura linga davo da kunyara ntani na linga damu mayuru; ²² Ghuye nga shutura maruvya gha vyuma vyavo, na vituku vyavo ntani na ndjato davo daku maghoko; ²³ Ghuye nga shakana ntarero davo damu ndjato, na vyuma vyavo vyaghu fughuli, na vituku vyaku mutwe ntani na mwaye davo. ²⁴ Mu livhango lyaku nuka lidumba lya sende yayiwa, vavo ngava nuka liyuywa; mu livhango lyaku manga maruvya mumbunda, vavo ngava ku manga ngodi da mugoro mu mbunda; mu livhango lyaku tunga vikoka vyaviwa mudi mutwe davo, vavo ngava kara na makorongongo mu mutwe; mu livhango lyaku kumanga mwaye, vavo ngava ku manga ntjako; mu livhango lyaku renka ashi ndi vamoneke vana wapa unene, ngava moneka mavavi murutu na runtje. ²⁵ Varume va muhoko wenu ngava ka fa ku maghonga ghava na nkore vavo, ntani vakavita venu navo ngava ka fera muvita. ²⁶ Vantu vamu Jerusalemu ngava kara muliguvo na malira-nkali mulivero lya shitata; shitata nga shikara muporongwa ntani vantu ngava shungira mu mutwitwi.