¹ Yino ndjo mbudi oyi atapire Karunga kwa Jesaya mona Amosi mulimoneko, ya kuhamena kwa Juda na Jerusalemu. ² Kumayuva ghaku hulilira ntembeli ya Hompa ngava yitunga ngayi kare livhango lya mulyo unene pano pantunda ya livhu. Yayo ngayi kara ndundu yayinene yayire unene, ngayi pita kana ndundu nadintje, makura dimuhoko da mu udjuni da vantu navantje ngava gogomokera nkoko. ³ Vantu vavayingi ngavaya ngava ghambe ashi, "Yenu, turonde kundundu ya Hompa, tuka raperere mu ntembeli ya Karungo wa Jakopu, ghuye aka turonge marongo ghendi gha uhunga, mposhi ngatu kwame ndjira yendi ya uhunga." Mu Sion ngamu tunda veta da Hompa, ntani mu Jerusalemu mo ngava ronga nkango da Hompa. ⁴ Ghuye nga kara mupanguli pa katji kadi muhoko ntani ghuye nga koshonona dimutangu ku dimuhoko; vantu vamu dimuhoko kapi nka ngava rwana vita, vavo ngava shambura maghonga ghavo ghakare matemo, ntani ngava shambura virwita na vikwata vyavo ngavi kare viruwanita vya kulimita mu mafuva, dimuhoko kapi nka ngadi rwana vita, ntani kapi ngaku kara maku deghuro gha vita mukonda shi vita ngavi shayapo. ⁵ Anwe vana va Jakopu, yenu, tuyende mundjira ya Hompa ya ghukenu. ⁶ Hompa, kwa komba vantu vendi, va ruvharo rwa Jakopu, mukonda shi vavo kuna kuruwana viruwana vya ghupure ovi vyatundo ku virongo vya upumeyuva vya mpo ya va Filistine, ntani vantu kuna ku kwama nkedi dava ntunda virongo. ⁷ Shirongo sha Israeli kuna yura siliveli na ngorodo, ntani vavo kwa kara na limona lya liyingi unene; shirongo shavo kwa yura nkambe da kurwa vita, ntani na tukaru-kara na matemba ghavita ghama yingi unene. ⁸ Shirongo shavo kwa yura vakarunga va vimpempa; vavo kuraperera ku mafano ogho shonga ntani nagho varuwana na maghoko ghavo. ⁹ Vantu ngava tameka kutongamena, ntani naku kudidipita; ano ngoli Hompa kapi nga dongononapo ndjo davo ntani kapi ngava kwafa. ¹⁰ Navantje ngava yenda vaka vande munda ya makwina kuntji ya mawe ngava tjire lishandu lya Hompa ntani na shite shendi sha nkondo unene. ¹¹ Opo nga moneka Hompa Karunga kehe ghuno waku kunenepita, ngava mudidipita, vantu navantje ngava panda naku fumadeka Hompa wa nkondo nadintje. ¹² Hompa Karunga wa nkondo mupititili wava Engeli kwa turapo liyuva olyo nga pangura vantu vaku kunene pita nava vaku yeruro, ghuye ngava didipita - naku vaganda vano vantu va lishandu - ¹³ ntani ghuye nga djonaurapo navantje ovo vaku monango ashi vavo kwa kara na likuto lya linene, yira shitondo sha ghundunga waghure wamu shirongo sha Lebanoni, ntani na vitondo vya ghunyandi vya vinene vya ghuvando mushirongo sha Basani. ¹⁴ Opo nga litikamo lino liyuva, Hompa Karunga wa nkondo da dintje ngadjonaurapo vantu navantje ovo vaku mono ashi vavo kwa fana yira ndundu dadinene, ntani kwa yeruka yira ndundu dadire unene, ¹⁵ ntani ghuye nga djonaurapo vantu ovo vaku ghayarongo ashi vavo nkondo unene yira ndjugho da matungo gha mare unene na makuma gha nkondo ogho vatunga gha kundurukide shitata, ¹⁶ ntani ghuye ngadjonaurapo vantu va limona lya liyingi vaku fana yira mbovo vaweko vikepa vya viwa vya vinene, vyaku shimba murongerero waghu yingi vitware ku virongo vyaku ku shuva-shuva. ¹⁷ Vantu vaku kunene pita ngava vadidipita, ntani vavo ngava kombanita likuto lyavo; opo ngali tikamo lino liyuva vantu na vantje ngava panda naku fumadeka Hompa Karunga wa nkondo nadintje. ¹⁸ VaKarunga vavintjwantjo ngava dongonokapo navantje. ¹⁹ Vantu navantje ngava yenda vaka vande munda ya mawe muma kwina namu marupako gha mundundu, mukondashi Hompa Karunga nga neyeda lishandu lyendi na ghugara wendi, na ghuna nkondo wendi ntani na shite shendi ku vantu na vantje pano pa ntunda ya livhu ²⁰ Opo ngali tikamo lino liyuva vantu ngava shuva ngava vhukuma vaKarunga vavo ovo va ruwana na siliveli ntani na ngorodo ovo vatongamenanga - ngava vavhukumina ku makwina ghava mpungu ntani naku marupako ghava kapuku-puku. ²¹ Vantu ngava kokava ngava ngene mu makwina namu marupako ghamu mawe, ngava duke vaka vande vatjire lishandu lya Hompa Karunga, na nkondo dendi ntani shite shendi sha nkondo unene, ghuye ngatengeka vantu na vantje pano pa ntunda ya livhu. ²² Kapi shi kuhuguvara mwa muntu, wa panyama napa mpepo, mukonda shi ghuye kwato nkondo daku vhura ku kupopera ngaghu paruke.