¹ Yino mbudi ya Isaya mona Amos, oyo amu neyedire Karunga ku hamena Juda na Jerusalemu, mu ruvede rwa lipangero lya vaHompa Usiya, na Jotamu, na Ahasi ntani na Hezekiya, vaHompa vava Juda. ² Hompa kuna kutanta ashi, "Livhu, na liwiru, tererenu kwavino naku ghamba; Ame kwa yita vanuke mbyo na varera, ano ngoli weno vavo mbyo vana divyuka mu mwande. ³ Ngombe dayiva oghu adiweko, ntani vidongi vya yiva kumanyero oku avi twaranga mwenyavyo, ano ngoli vikorama vya pita kana mbunga ya Israeli, vavo kwato ukonentu, kwato maghano ntani kapi va yuvhanga." ⁴ Lihudi unene! Ku muhoko wa ndjo, na vantu va ndjo, na mbunga ya yidona yina kuyendo mu lidjonauko, anwe kwa muvhara vakorokotji nanwe mbyo muna ku ruwana ukorokotji na urunde! Anwe mwa tunda kwa Hompa Karunga, mupongoki wa Israeli, mbyo mwa tapa mughongo ku kwendi. ⁵ Vinke muna karere shimpe na ghurunde mu dimutwe denu? Anwe kuna kuruwana urunde ngava ka mufutite unene ndi? Mu mutwe ghoye ove Israeli kuna karamo vironda ntani mu mutjima ghoye maghayaro ghaghuvera. ⁶ Kutunda ku mpadi dogoro ku mutwe ghoye shimpe kwato shironda osho shina veruko shipore; ove kuna yura vimburu, na masina, na vironda ovyo vina yashamo shimpe, vironda vyoye kapi va turapo mutonda ntani kapi vamangapo makeshe, ntani shimpe kapi vatura maghadi viveruke. ⁷ Shirongo shenu shina kara mumburundu; vitata vyenu kuna vishwakererepo; vantunda virongo - kuna kudjonaura mbuto mumafuva ghenu, mumantjo ghenu - vavo kuna kudjonaura shirongo shenu. ⁸ Shitata sha Jerusalemu kuna didipa yira ndjugho ya ndunda ya mukungi ndjwi, kuna fana yira ndjugho ya mukungi shipata sha mandjembere, ntani kuna fana yira shipata shamarupotera, shitata kuna shikundurukida vana nkore va shihomokere. ⁹ Hompa muna nkondo nadintje ndi kapi ashu vidapo vantu vamwe mu mbunga yetu, mu Jerusalemu natwe ndi tuna fana yira Sodomu na Gomorah, natwe ndi twapwa. ¹⁰ Ove Jerusalemu, nanwe vapangeli na vantu, yuvhenu nkango da Hompa wa nkondo nadintje; anwe kuna fana yira vantu vamu Sodomu na Gomora, weno pakerenu ngoli mbili dino veta ana ku muronga Karunga wetu: ¹¹ Ghuye kuna ku tanta ashi, "Anwe kuna kughayara ashi ame kuna shana ndjambo nadintje odo muna ku djambera-djambera ku kwande ndi?" Ame na kuta ntani na roroka ku ndjambo nadintje odino muna kushwakerera da vindjwi, na maghadi ghavimuna vyenu vya kuneta; weno ame kapi na hepa nka honde ya ntwedu, nayi yandjwi ntani nayi ya vimpendje. ¹² Opo mwa yanga muya tongamene ku shipara shande, are amu tantero muruwane vya kufana weno, ntani are amuyito muya lyatange muntembeli yande? ¹³ Shayekenu kuyita ndjambo denu ku kwande mwato mulyo; ndjambo da kututumukita lidumba lya liwa kuna kuyita vihuna na urunde ku kwande; vipito vyenu vya kudana ka kwedi kakape ntani na liyuva lya Sabata olyo mwa ponganga kumwe muraperere ntani mukare na vigongi vyenu vya ghukalireli Karunga - navintje na vishwena mukonda ya urunde wenu. ¹⁴ Ame kwa nyenga vipito vyenu vyaku dana ka kwedi kakape ntani na mayuva ghaku dana vipito vyenu vyaku pongoka; vyavyo kwayita udito wa unene kukwande, ame naroroka kughushimba. ¹⁵ Nampili muyerure maghoko ghenu muraperere, ame kapi nganu mukenga lintjo; na mpili weni ngamu raperera ndapero dadiyingi, ame kapi nganu terera ku kwenu; mukondashi maghoko ghenu kwayura honde ya vantu ovo mwa dipaya. ¹⁶ Kukushenu, mukare muna kushuka munda yadi mutjima denu; shayekenu kuruwana ghurunde; tundenu kughudona; ¹⁷ kurongenu kuruwana ghuwa; ruwanenu uhungami ghutikiliremo, tapenu mbatero ku vantiwe, naku vafita vavya vavo." Matjangwa ghamwe mwa Isaya 3:20 ntani na 9:16 kwa kuyenda kumwe, kwa ghamba ashi, "Muna hepa kutapa mbatero ku vantu va weno. ¹⁸ Hompa kuna kutanta ashi; "Yenu kuno, ghayarenu mu wapayike nkango denu, ndjo denu nampili weni ngadi geha yira honde, ngadi kena yira mema gha lime; nampili weni da geha yira makeshe ghama geha, ngadi kutjindja ngadi kare ghukenu yira huki da ndjwi. ¹⁹ Nkene ngamu pura naku limburuka ku kwande, ngamu kalya vyaviwa mushirongo, ²⁰ ano ngoli nkene ngamu shwena anwe ngamu runde dimutwe mupire kulimburuka ku kwande, vana nkore venu ngava mudipaya na rufuro," Ame Hompa Karunga mo naku ghamba weno. ²¹ Jerusalemu shitata shaku limburuka kwa Hompa Karunga weno shina fana yira mukadi wa rushonda! Shitata kwa yulire vantu vavawa - vantu va vahungami, weno shitata kuna yura varudipayi vantu. ²² Jerusalemu ove kwa fanine yira siliveli ano ngoli ntantani ove kwato mulyo, ntani ove kwa kalire vinyu yayiwa unene ano ngoli ntantani vinyu yoye yina hauka yina kara yira mema. ²³ Vapangeli venu kwa runda mutwe mbyo vaku kwata ghukwavo nava kawidi; vavo kwa tokomenanga vawane mfuto nama ushwi ghamu ufeke valyerepo. Ntani vavo kwato kupopera vantiwe mu mpanguro ntani kapi vatereranga nkango da vafita vavyavo. ²⁴ Weno tererenu ku nkango odi ana kughamba Hompa Karunga wa nkondo, mupopeli wa Israeli ashi: "Lihudi kukwenu! Ame nganu vyuta rughoko vana nkore vande, ntani nganu tengeka naku futita vana nkore vande; ²⁵ Ame nganu toghona vana nkore vande unene, yira momu vahemunanga shikugho mumundiro shipyapyare unene dogoro shikare shina kushuruka, ntani nyata nayintje yitundeko. ²⁶ Ame nganu tura vapangeli na vatapi maghano va uhunga mu shiruwana ngava kare yira vaku hova; kuruku ntani ngava twenya shitata sha Jerusalemu ashi shitata sha uhungami, shitata sha kulimburuka." ²⁷ Hompa muhungami nga popera Jerusalemu, na kehe ghuno akaromo ogho nga wapeko ghukaro wendi. ²⁸ Varunde na vantu va ndjo, ngava vadjonaurapo kumwe tupu, ntani Hompa nga hanaurapo navantje vakupira kulimburuka ku kwendi. ²⁹ Anwe ngava mufita ntjoni mukonda yaku tongamena kuvitondo na vimenwa ovyo mwa tapeka, ntani anwe ngamu wana lishwaghu lya linene momo muvipata vyenu vya kupongoka ovyo mwa hora unene. ³⁰ Anwe ngamu fa yira shitondo sha ghunyandi shaku kukuta mushipata osho vapiranga kutekera mema. ³¹ Yira momu tupu rwa hwamanga rwenge ku mundiro, mo ngoli ngava hanaukapo varume vankondo kumwe na viruwana vyavo vya vidona; kwato oghu ngavhuro ku kandanapo lidjonauko lyavo.