¹ Kuliyuva olyo Karunga na ghudito wendi, ghuwa na rufuro rwaghutwe ngarutengeka liyoka lyamulifuta, na vikwa mayoka vyaku wovana mayoka gha ghushungu, ngadi. ² Muliyuva olyo: ngauyimba, shipata sha mandjembere gha vinyu. ³ '' Ame, Hompa, ame mukungi washo; ngani shitekaghera kehe shirugho. Nganishikunga matiku na mwi mposhi naghumweshi ngashi djonauro. ⁴ Kapi nagarapa, oho, ashi kwa kaliremo vishwa na miya! Mukurwa ngani virwerapo; ngani vishorera navintje kumwe; ⁵ nkwandi ngavihuguvare likungo lyande nakuturapo mpora name; varenke vaturepo mpora pakatji kande navo. ⁶ Muliyuva linakuyo, Jakopo ngaghupa ndandani; Israel ngayenga dimucuko; ntani ngava yuda ntunda yalivhu na nyango.'' ⁷ Karunga ahomwine Jakopo na Israel yira momo gha homwine dinya dimuhoko dinya dava homonino? Ndi Jakopo na Israel vavadipayire mu mfa lidipayo lya dinya dimuhoko dinya vadipayire mbo? ⁸ Mulishetakanito lyakutikiliramo watikitamo, kutuma Jakopo na Israel vatundemo; avatjidire vayende na lishetero lyendi lyaghutwe mu mayuva gha mpepo ya ghupumeyuva ya upyu. ⁹ Mpo ngoli mundjira yino, ndjo da Jakopo ngavadimughupirepo, pa vyaweno ngavikara nyango dakuyura dalighupiropo lya ndjo dend: Apa ngaruwana vi djambero navintje vya maew kuviyungurura nakuvi bomaghura mu ghuheke, ntani kundereko ngudi ya mawe ndi ya shitondo ngayiyimano. ¹⁰ Nkurumbara kunadishuvu yira mburundu, nkalito na likengerero yira mu mburundu. Munya mughulyero wa Hove, ntani mo mumararo naku lya dimutavi dasho. ¹¹ Nange dimutavi dina kurupa, ngadi tjoka palivhu. Vakamali ngavaya naku viruwanita kuvikuni, mpo oghuno kapishi muntu waku tegherera. Mpo ngoli ashi varuwani vavo kapi ngavakara na nkenda kwavo, ntani ghuye ogho ava ruwano kapi nga kara na nkenda kwavo. ¹² Ngalitikamo pa liyuva olyo apa Hompa ngahangura kutundilira kumukuro wa Eupharates dogoro ku lipompora lya Egipite ntani nove, vantu va Israel, ngava ponga kumwe umwe na umwe. ¹³ Paliyuva olyo rumbendo rwa ruwa ngava rufuda; ntani vanya vatjida mushirongo sha Assyria ngava ya, ntani vatjidi mushirongo sha Egipite, ngava karera Jehova pa ndundu yakupongaka muJerusalema.