¹ Muliyuva linya rushumo runo ngavaruyimba mushirongo shaJuda: Twakara nashitata shakukora; Karunga ghaturapo liyoghoko ndyo likuma. ² Gharura mavero, mposhi shirongo shakuhungama osho shakaro nalipuro shingenemo. ³ Ndunge odo dakaro papoye, kuyimutura mumpora yakuvyukilira, momo uye ahuguvara mumoye. ⁴ Huguvara mwa Hompa kunaruntjeya, momo mwaHompa mwakara liwe lya kukarererapo. ⁵ Momo ghuye kughurumwita ovo vatungo namakunenepito, shitata shakaro mulipopero lya makuma ngava gha ghurumwita dogoro kulivhu; ngava shishetakanita kumbundu. ⁶ Ngava shilyatangera mpadi dava karuhepo kumwe naku lyatanga kwavahepwe. ⁷ Ndjira yava hungami yavyukilira, muhungami; ndjira yavahungami wayita yavyukilira. ⁸ Nhii, mundjira yamapangwiro ghoye, Hompa, atwe twakutaterera; lidina lyoye namo ngatukuvhuruka mbyo twahora. ⁹ Ame nakutaterera matiku; nhii, mpepo yakaro mumwande kwakushana unene. Mposhi opo mpnguro doye ngadiya palivhu, vishitwa vyamuUdjuni ngavikuronga kuhamena uhungami. ¹⁰ Renka uwa ghoye umoneke kuvadona, ene ngoli kapi ngavakushonga uhungami. Mushirongo shakuhungama uye kuruwana vya vidona, ntani kudereko kumona unene waHompa. ¹¹ Hompa, lighoko lyoye ghuna liyerura, ene ngoli kapi vana lidimburura. Ene ngoli ngavakenga shihoro shoye kuVantu ntani ngakara na lishwahu, mukonda ashi mundiro waugara ghoye ngauvadjonaurapo. ¹² Hompa, ngauyita mpora kukwetu, momo ove mwene-mwene, wamana kuturuwanenapo viruwana vyetu. ¹³ Hompa Karunga wetu, vampititi vahupako vapangera mukatji ketu; ene ngoli atwe kuraperera lidina lyoye pentjako. ¹⁴ Vavo vafa, kapi ngavaparuka nka; vavo vafe, kapi ngava rambuka. Momo, waya mumpanguro ntani wavadjonaurapo, ntani lya kuvavurukira vyadongonoka. ¹⁵ Wawederera muhoko, Hompa, wawewderera muhoko, ove twakukukutikira; wanenepita marudi nadintje dashirongo. ¹⁶ Hompa, mumaudito vakenga koye, vaghoghotilire ndapero opo nkwami doye dakalire navo. ¹⁷ Yira mukamali wamarutu maviri ana kutaterero ruvede rwa kushampuruka, opo anakara mutjutju na kulira kukora kwa kushumita, mo ngoli twakara kumeho yoye, Karunga. ¹⁸ Wakara namarutu maviri, twakara mutjutju yakushumita, ene ngoli momo vyakara atwe twa shampuruka tupu mpepo. Kapi twayita liyoghoko pantunda yalivhu, ntani vinamwenyo navintje vyapantunda yalivhu kapi vyawa. ¹⁹ Vafe vaye ngavaparuka; marutu ghavo ghakufa ngagha rambuka. Ngagha rambuka nakuyimba mukonda yaruhafo ngamuparuka mumbundu; momo lime ne lime lyashite, ntani udjuni ngaliyitapo mfa dalyo. ²⁰ Yendenu, vantu vande, ngenenu mukonda denu ntani mughare mavero kurukurwenu; vandenu pakarugho-ghona, dogoro ugara ngaupite. ²¹ Momo, kengenu, Hompa kuna kushana kutunda mulivango lyendi nakuyatengeka vinamwenyo kuviruwanadona vyavyo; udjuni ngaushorora honde oyo yatekeromo, ntani kapi ngauhoreka lidipagho.