¹ Hompa, ove Karunga wande; ame ngani kuyerura, ame ngani shamberera lidina lyoye; ove waruwana vininke vyaviwa, vininke viva wapayika kare, mukuvyukilira mulipuro. ² Ove wa tura mbara ndambo, nkurumbara yankondo unene lidjonauko, makuma agha ava popero, ntani kukeverera vantunda virongo kapi shivangene munkurumbara. ³ Mposhi vantu vankondo unene ngava kuyererepeka ngava kutjira mumbara dadimuhoko edi darunda dimutwe. ⁴ Ove wakara livango lya lipopero varuhepo, mundulye kwava vana kukushano mumaghudito ghunanava horeke kulikundungu ghuna kara mundulye wavo kughupyu. Apa munku wavakakurunda dimutwe yira likundungu lya kurwanita likuma, ⁵ yira ghupyu wamumburundu, ghuna mwenikida muyoyo wa vantu na virongo, yira momo liremo lyatendekenga ghupyu waliyuva, mbyo ngoli ghuna limburura rushumo rwa vakakupira nkenda. ⁶ Apa pandundu Hompa waviturwapo ngawapekera vantu navantje shipito sha ndya da maghadi, vinyu yakutoworora. ⁷ Hompa nga djonaurapo ndundu oyo yafiko vantu navntje, wanda wafiko dimuhoko nadintje. ⁸ Hompa nga ghupapo mfa naruntje, ntani Hompa Karunga ngakokota maruntjodi kuvipara navintje, ngaghupapo lishwaghu kuvantu vendi muUdjuni mudima, mo ana kughamba Hompa. ⁹ Ngava vighamba kuliyuva olyo, '' Kengenu ghuno Karunga wetu; twa mutaterera, ntani ngatu popera ghuye ndje Hompa; atwe twa mutaterera, atwe ngatu pandura natni ngatu hafa morwa ngatu yowora.'' ¹⁰ Pandundu yino liwoko lya Hompa ngali pwiyumuka; ntani ngamyona vamowaba yira momu vamyonanga virwenge vya mulifuva vikare rutoko. ¹¹ Vavo ngava worora mawoko ghavo yira mbava vanahoro kushana mumema. Mara Hompa ngava didipita ano mawoko ghavo ngagha dama ngagha pira mulyo. ¹² Makura ghetu ghamare Hompa ngagha gandera palivhu ghakare mbundu.