¹ Ano viyivenu vi: Mumayuva ghauhura ngaghakara maruvede ghaudito. ² Ene vantu ngava kuhora naumwavo, vakuhora maliva, vakukunenepeka, kukutumba, vakukutura vayivikwe, vakupira kuyuva kuvakondi, vakupira kupura, ntani vakupira kupongoka. ³ Kapi ngavakara nashihoro sha untwite waKarunga, kapi ngavavura kukughupirapo, vana vipempa, kwato kukufumadeka naumwavo, nyanya, vakupira kuhora vyaviwa. ⁴ Ngava kara vantu vaulingi-lingi, vaumbondo, kukumonikita, ngavahora vyapanyama mulivango lyakurenkashi vahore Karunga. ⁵ Vavo ngavakara yira vakareli vaKarunga, ngoli ngava shwena nkendo damo. Kara ure navantu vakufana ngoli. ⁶ Ene ngoli vamwemo varume vakungena mumandi vaka kwate vakadi vavagova. Vakadi ovo vayuro ndjo ntani kuvapititira madoho ghakukushuva-shuva. ⁷ Vakadi vano kehepano kukushonga, ngoli kapi vatike pandunge dakuyiva ushili. ⁸ Mundjira ndjoyo va Janesi na Jambesi vayimanine Mosesa, mpwali murongi wavipempa naye ayimanino vakananite ushili. varume vakaliro vadjonauka mundunge, ntani kapi vava huguvarere lipuro vava tjangurura kare ashi vanavipempa. ⁹ Ene ngoli kapi ngayenda ure. Ano ngoli ugova wavo ngava uyiva navantje, momu vakutoghorwire vanya varume. ¹⁰ Koyeko ngoli, wakona kukwama mashongo ghande, vikara vyande, mpepo dande, lipuro lyande, kudidimika, shihoro, kukuwora, ¹¹ Mahepeko, kunyanda ntani evi vyakantjorokiliro ku Antiyoka, ku Ikoniya namu Lisitira. Nadidimikire mumahepeko. Kutunda povyo navintje, Hompa ghayowire. ¹² Navantje ovo vana shano kuparuka nankedi dauKarunga mwa Kristusa Jesusa ngava muhepeka. ¹³ Vantu vaurunde ntani vakukutumba ngavayenda kughudona dogoro udona wakupitakanena, kupitira vaunyoye vakombane ntani vakupititire ukombane. ¹⁴ Ene ngoli ove, kara muvininke ovyo wayiva ntani kara uyivikwe unapura. Yiva kware oku wakushongera. ¹⁵ Waviyiva kutunda kuwanuke ghoye wayivire vitjanga vyakuhorama. Ovino kuvura kukupahura muliyowoko lyoye kupitira mulipuro lyoye mwa Kristusa Jesusa. ¹⁶ Matjangwa naghantje kwaghatulirepo Karunga. Vyavyo kuwanenamo marongo, gha lipuro lyamumutjima, gha kuku wapukurura, ntani ghakukudeura ghuhungami. ¹⁷ Ovino mposhi mukareli waKarunga ghakare naukonentu, nakuku wapayikira mwakehe vino viruwana vyaviwa.