1 Vaunyande, kuna kumuvhurukita mbudi yaruhafo oyo namuyuvitira mbyo mwayitambura, mbyo nka mwakara mumwayo, 2 Mumwayo mongamu kaparukira, nkene muvhura kukara mu mbudi yaruhafo oyo namuyuvitira, mposhi lipuro lyenu kapishi ngalikare lya mawoko-woko. 3 Ame kwamuronga vyamulyo ovyo nakuronga name, ashi Kristusi kwafera ndjo detu yira momu aghamba matjangwa, 4 Ava muvhumbiki, ntani akavhumbuka muliyuva lya utatu yira momu aghamba matjangwa. 5 Kristusi pamuhovo kwa monikilire Petrusi, ntani aya monekere kwavo murongonava vili; 6 ntani ana kuya monekera pashiruwo shimwe tupu kwavo vakupitakana mafere matano. Shingi shavo shimpe mpovali vana kuparuko, ngoli vamwe va fa. 7 Mpo aya monekelire Jakopu, ntani na kuvaPostoli navantje. 8 Opo amonekilire kuna vantje ntani ngoli ana kuya monekera name, ogho afano yira ndjeghu vashampuruka ghawo mayuva shimpe kapi atikamo. 9 Momushi ame walikuto lyalididi unene muva Apostoli navantje. Ame kapi nawapera nukare mu Apostoli mukondashi ame kanu hepekanga mbunga kriste ya Karunga. 10 Ngoli mukonda ya ufe nkenda waKarunga ame ghuno momunakara, ano ngoli nkenda yendi kapishi yamawoko-woko. Mukushetakanita, ame kwa ruwana unene kupita kana va Apostoli navantje. Ngoli kapishi me, nani nkenda ya Karunga oyo nakara nayo. 11 Vikareshi ame ndi vavo, mongoli twayuvita mbudi ya Karunga mbyo mwayipura. 12 Kristusi nkene shi kumuyuvita ashi gha vhumbuka ku ufe, weni omo vaghamba ashi livhumbuko lyavafe kwato. 13 Nkene shi livhumbuko lyavafe kwato, nkwa ndi na Jesusi naye kapi avhumbuka ku ufe, 14 ano nkene Kristusi kapi vamuvhumbura ku ufe, nani nkango odo twayuvitanga da mawoko-woko nalipuro lyenu lya mawoko-woko. 15 Nkeneshi vyaushili vafe kapi ngava vhumbuka ku ufe, makura atwe vambangi vavimpempa vaKarunga, mukondashi atwe kughamba ashi Karunga avhumbura Jesusi kuufe. Mukondashi atwe kwangambipara ashi Karunga kwavhumburu Jesusi kuufe, ghuye ahana kumuvhumbura kuufe. 16 Nkene vafe kapi ngava kava vhumbura, Kristusi naye kapi vamuvhumbura kaufe. 17 Ngoli nkene Kristusi kapi avhumbuka kuufe, lipuro lyenu lya mawoko-woko nani shimpe nda mwakarera mundjo denu. 18 Navo vafo mukonda ya kupura mwa Kristusi, nkwandi navo vakayende mulindjonauko lyanaruntje. 19 Atwe nkene tupu kuhuguvarera Kristusi ngo uno monyo wapantunda yalivhutupu, atwe vana lihudi unene twa pitakana navantje. 20 Ngoli ushili ngo uno ashi Kristusi ndje vahova kuvhumbura kuufe, kwa navantje ovo vafo. 21 Momu dakarapo mfa muudjuni morwa muntu umwe, nalivhumbuko lyavafe nalyo kwakarapo morwa muntu umwe. 22 Yira momu tupu vafanga vantu navantje morwa vamuruvharo rwa Adamu, monka tupu ngava kavatura navantje vakakare namonyo. 23 Morwa vavo kwaku kwatakana na Kristusi. Ngoli kehe uno narufo rwendi: wakuhova varambwita kuufe, Kristusi, ntani mbovo vahamo kwa Kristusi opo ngakaya. 24 Ntani ngauya uhura, opo ngamana kuhanaurapo lipangero, unankondo nauntje, makura ngayatape untungi wa Karunga kwa vashe. 25 Jesusi Kristusi ndje ngapangero tupu dogoro nkoko ngakatulira vana nkore vendi kuntji ya mpadi dendi. 26 Munankore wendi wakuhulilira ogho ngavaya djonaura, mfa. 27 Matjangwa kwatanta ashi, '' Ghuye kwatura navintje kumpadi dendi,'' Nkango dino, '' Vininke navintje,'' dapwa kukenita ashi kapishi naKarunga mwene ashi naye mpwalimo, ogho aturo vininke navintje kuntji ya mpadi dendi da Kristusi. 28 Nkeneshi vininke vana vitapa mulipangero lya mona, makura mona naye kutapa kwagho amupo navintje. Karunga makura akare ngoli mupangeli wavininke navintje. 29 Nkene ashi livhumbuko lyavafe kwato, ovo vakushira mulivango lyavafe, vinke vyakwafanga? Vafe nkene kapi ngava kavhumbuka,vinke ovyo vakarera naliyoyero lyavafe? 30 Atwe ne vinke ovyo twa kareranga mumaudito kehe pano? 31 Vaunyande, ame kehe liyuva kwa kara mushiponga sha mfa. Ovino kuna kuvitapa mukukufumudeka kwande, muukaro wenu mwa Jesusi kristusi Hompa wetu. 32 Nkeneshi ame kwarwana navikashama vya mo Efeso nahana lihuguvaro lyamonyo wa naruntje, vinke ngavi vhura ku kwafa kwande? Ano vafe nkene kapi ngava vavjumbura, vishewe kuna kutanta ashi, '' tudjombwanenu nakunwa, mbyovyoshi yona ngatufa,'' 33 Walye mwakupukanga: Ndjoyera yayidona kuvipita nkedi dadiwa.'' 34 Kororokenu! karenu mughuhungami! kapishi muture nka waro ndjo. Mbyovyoshi vamwe mo kapi vayiva Karunga. Ovino kuna kuvighamba numufite ntjoni. 35 Umwe kuvhura aghambe ashi,'' Weni omo ngava kavhumbuka vafe , ntani marutu ghakufana weni ngava kara nagho.'' 36 Ove ligova! mbuto oyo wakuna nkene kapi yinafu mulivhu nakumenashi. 37 Opo wakunanga kapi wakunanga vimeno ovyo ngavikakaroko, ngoli mbuto vakunanga. kuvhura yikare ya Mahangu ndi yapeke. 38 Ngoli Karunga ndje wakuyipa shimeno yira momu anayishanene, kwa kehe mbuto nashimeno shayo. 39 Marutu naghantje kapi ngahakufana. ghavantu peke, avikorama naghopeke, ghavidira naghopeke nagho gha ntjwi peke. 40 Pakara nka marutu gha muliwiru na marutu ghapantunda yalivhu. Pakara maurenga gha muliwiru ntani namaurenga ghapa ntunda yalivhu. 41 Kumpayima kwaliyuva peke, kumpayima kwa kakwedi peke, ntani kapayima kwa mbungururu peke. Ntani lipayimo lya mbungururu nadintje dakukushuva-shuva. 42 Napalivhumbuko lyavafe ngoli ngapakakara. Ovyo twakunanga vya kudjonaukapo ntani vya kuvhumbuka mbyo vyakukarererapo. 43 Kwavhumbinga rutu rwa kupira likuto; ngarukavhumbuka rwa kupayima. 44 Kwavhumbinga rutu rwakupira nkondo; ngarukavhumbuke rutu rwa nkondo. Kwavhumbinga rutu rwapa nyama, waro pakara nka rutu rwapampepo. 45 Matjangwa kwatanta waro ashi, '' Muntu wa kuhova ndje Adam, kwa muhungire akare namonyo.'' Ngoli Adma wakuhulilira ghuye ndje mpepo oyo yakutapa monyo. 46 Rutu rwapampepo kapishi ndo rwa kuhoverera vashitire ntani runa kuya kwamako rwapampepo. 47 Muntu wa kuhova kwa muhungire kulivhu, lya mbundu. Ngoli muntu wauviri, Hompa ogho atundo muliwiru. 48 Momu afanine Adam wapalivhu, vapalivhu navo monka waro vafana, Adam wa muliwiru kwa kufana nava vamuliwiru. 49 Momu twakufana nogho atundo vahunga kulivhu monka waro ngatu kakufana nogho atundo muliwiru. 50 Vaunyande, ovyo nakumutantera mbyovino ashi rutu rwapalivhu nakuvhurashi kupinga Untungi wa Karunga. Ntani nkwa waro vyakudjonauka naku vhurashi kupinga ovyo kukarerepo. 51 monenu! Ame kuna kumutanterako vihoramo ashi: Kapishi natuvantje ngatufa, ngoli natuvantje ngavatushintununa tukutjindje. 52 Mushirugho shashifupi tupu, yira mukukapwida kwalintjo, opo ngaru shaghara rumbendo rwa kuhulilira. Opo ngarushaghara makura ngava vhumbuka namarutu ghavo gha kukarererapo, makura ngava tushitunune ngatukutjindje. 53 Mbyovyo shi rutu rwa kudjonauka vana hepa kurutjinja ngarukare rwa kupira kudjonauka, rwa kupira kukarererapo rukare rwa kukarerera po. 54 Ene ngoli nkene rutu rwa kupira kukarerera po runa kutjindji rukare rwa kukarererapo ntani rutu rwapanyama runa kara rwapa mpepo, navintje vina shoroka kutanta ashi nkango dinatikimo odi vatjanga ashi, '' Mfa vana dimini, vana difundu,'' 55 '' Mfa, nkondo doye kuni dinakara? mfa virwita vyoye kuni vinakatra?'' 56 Mfa virwita vyado ndjo, ntani una nkondo wa ndjo kwa kara muveta. 57 Kupandura kwa Karunga ogho atupo lifundo mwa Hompa wetu Jesusi Kristusi! 58 Vaunyande vakuhora, karenu munakoro kapishi mukunyungaure. Karenu naupampi kehe pano naviruwana vya Hompa, mukondashi mwayiva ashi viruwana ovi mwaruwanenanga Hompa kapishi vya mawoko-woko.