¹ Kondjerenu shihoro na kutura dimutjima denu mu maushwi ghapa mpepo, Unene po ghakuyuvita nkango da Karunga. ² Owo wakughamba maraka, ghapeke ghakutumuka kapishi navantu aghambanga mara na Karunga. Mpo ashi naumweshi wakuyuva ovyo anakughamba, mukondashi mpepo yakupongoka ndjoyaku mughambita vya mukahore-hore. ³ Ngoli wakuyuvita nkango da Karunga, kuyuvitira vantu nkango dendi da kukwafa, kukorangeda, nakushengawida. ⁴ Owo wakughamba maraka ghakukukwafa mwene, ngoli wakuyuvita nkango da Karunga kukwafa mbunga Kriste. ⁵ Ame kunamushanene mughambe maraka ghapeke-peke. Unene po ame kunamushanene kuyuvite nkango da Karunga. Mukondashi wakuyuvita nkango da Karunga apitakana wakughamba maraka ghapeke-peke ( Nkwendi pakare umwe afwaturure maraka mposhi atunge mbunga Kriste ntani ) ⁶ Vakwetu, ntjeneshi nganiye kukwenu nganiyaghambe maraka ghakupira kuyuvika, vinke ngavivhura kumukwafa? Kwato ovyo nganikwafa kwenu, nkwandi nighambe mamoneko, ndi na Ukonentu, kuyuvita nkango da Karunga ndi kutapa marongo. ⁷ Momu mundjira yimwe tupu , monka waro nangoma dakuveta ntjumo, dahana monyo dakutapa maywi-yira ntjivo ndi shighumba-ntjene kapi vanakuyimba ashaghare maywi ghakukushuva-shuva, weni omo vayiva ashi liywi munke linakuyimbo? ⁸ Ndi ntjene rumbendo kapi runakushaghara nawa, weni omo ayiva kehe uno ashi shirugho shakukuwapayikira vita? ⁹ Nanwe nka waro ntjene amughamba maraka ghapeke ghakupira kuyuvika. Ntjene amughamba maraka ghakupira kuyuvika weni omo vayuva ovyo munaghamba? Anwe ngamughamba, ngoli kundereko wakuvikwata lighano kovyo munaghamba. ¹⁰ Mu udjuni kwakaramo maraka ghamangi, ngoli nalimweshi lyakaro ashi kwato ovyo linakutanta. ¹¹ Ntjene kapi nakuyuva ovyo linakutanta liraka, ame kukara ntunda virongo kogho anakughambo, nogho anakughambo kukara muna virongo ku kwande. ¹² Nanwe nkashi mushikwavo. Anwe ovo munakushano ashi vamupe maushwi ghapa mpepo, kondjenu ngavaghamupe ghamangi unene po ngogho ghakukwafa mbunga Kriste. ¹³ Ngoli wakughamba maraka ghakutumuka, ghanakona kukanderera ushwi wakufwaturura. ¹⁴ Ntjene anikanderere mumaraka ghapeke, mpepo yande ndjo yakukanderera, ngoli ndunge dande kundereko vyado. ¹⁵ Nani weni omo nivhura kuruwana? Ame nahepa kukanderera na mpepo yande, nahepa nka waro kukanderera na ndunge dande. Ame nahepa kuyimba na mpepo yande ntani nahepa kuyimba waro na ndunge dande. ¹⁶ Ntjene kuna kupandura Karunga mumaraka peke, ghakupira kuyuvika kuvantu weni omo vaghamba ''Amen'' kovyo unakupandura Karunga, vavo vahana kuyuva ovyo unakughamba? ¹⁷ Kuvhura ukanderere kwa Karunga murupe rwauhunga, ngoli kapi uvhura kukwafa kehe vantu. ¹⁸ Ame kupandura karunga wande ashi ame namupita kuna kughamba maraka ghakutumuka. ¹⁹ Ngoli mumbunga Kriste ame kwahora kughamba nkango ntano tupu dakuyuvika mpo ashi vakurongereko vamwe, kupitakana omo nighamba nkango mayovi murongo damumaraka peke dakupira kuyuvika. ²⁰ Vaunyande, mwasha kara yira muvanuke mumaghano. Ngoli karenu yira vanuke kwavyo vyavidona. Mpo ngolishi mu Ukonentu karenu muvakurona. ²¹ Matjangwa kwatanta ashi, '' Mbunga yino ame nganiyi ghambita kumaraka ghapeke-peke, na kutunwa twa vantunda virongo. Nampili ndi ngoli shimpe kapi ngava ndjuvha''. Mo ana kutanta Hompa. ²² Mpongolishi, maraka ghakutumuka kapishi viyivito kwavapuli, nanl ngoli kwavo vapoiro kupura. Kuyuvita nkango da Karunga kapishi viyivito kwavo vadiro kupura, nane ngoli kwava puli. ²³ Mbunga Kriste nkene yina pongo kumwe, makura vaghambe maraka peke-peke, makura mukatji kenu muye vantu vapandje vakupira kupura, kapi ngava mutantera ashi mwapurumuka ndi? ²⁴ Ngoli nkeneshi navantje ava yuvita nkango da Karunga makura mumwavo ngamuye vantu ovo vadiro kupura ndi vantu vapandje vapiro kuyiva vyuma ngavitetura unene mumutjima, ngakumone ashi uye munandjo. Ghuye ngavi mukora unene kumutjima kwanavintje ovyo vana ghamba. ²⁵ Makura viruwana vyendi ovyo vya horamo munmutjima wendi ngavi shoroka pa ukenu. Ngatongamena pangoro ngapandure Karunga. Ghuye ngaghamba ashi vya ushili Karunga mpwali mukatji kenu. ²⁶ Vaunyande, weni omo muvhura kukara? Nkene munapongo kumwe, kehe uno anahepa kukara navyuma, umwe rushumo, umwe marongo, umwe maraka ghakutumuka, umwe wa kufaturura maraka, umwe wakumona mamoneko. Ngoli navintje vino vina hepa vikwafe mbunga Kriste. ²⁷ Nkene ashi umwe kuna kughamba maraka peke-peke ghakutumuka, pakare vaviri ndi vatatu vakupe marufo gha kughamba ntani pakare umwe wakufaturura ovyo vanaghamba. ²⁸ Ano nkene shi kwato wakufaturura maraka, mumbongerero ya mbunga Kriste. Ghuye aghambe pentjendi kumwe na Karunga. ²⁹ Vayuviti nkango dakutunda kwa Karunga vakare vaviri ndi vatatu vakwate lighano kwavyo vanaghamba. ³⁰ Ene ngoli nkene mpwali ogho ana shingire mbunga amone limoneko, ogho ana kughambo ghamweneko. ³¹ Kupenu maruvede namuvantje na marufo ghaku yuvita nkango da Karunga mposhi navantje vakurongerepo vawane makorangedo. ³² Mpepo ya muporofete muporofete mwene ndje wa kuyipangera. ³³ Mbyovyoshi mwa Karunga kapi mwahepa mapiyagano, ngoli kwahepa mpora.Yira momu mwakara mumbunga Kriste muvantu va Karunga vakupongoka. ³⁴ Vakamali vana hepa kumwena mumbunga Kriste denu. ³⁵ Mukondashi kapi vavapulitira kughamba mumbunga kriste. Vavo valimburuke yira momu yatanta veta. ³⁶ Nkeneshi mpovili ovyo vanahoro kukuronga, vapure vakafumu vavo kumundi. Mukondashi lishwaghu lyalinene nkene mukamali aghambe mumbunga kriste. Nani mumwenu da tundilira nkango da Karunga? Nani kukwenu mpentjako da yandi? ³⁷ Kehe uno anakukumono ashi uye muporofete ndi akara na maushwi ghapa mpepo, ayive ashi ovino nakumutjangera vipango vya veta yaKarunga. ³⁸ Nkeneshi mpwali ogho ana kupiro kuvipakera mbili, naye kwato kumupakera mbili. ³⁹ Vaunyande, mpongolishi kondjenupo unene mukuyuvita nkango da Karunga, ntani nakushweneka shi kehe uno wa kughamba maraka ghakutumuka. ⁴⁰ Ngoli navintje muna hepa kuviruwana pa nkedi yayiwa vikare mulikukwamo.