¹ Nampili niyive kughamba maraka gha vantu nagha ghava engeli. Ngoli ame kwato shihoro, Ame kunafana tupu yira shikugho shinakudameko ndi yira ngendjo yina kungwerangano. ² Nampili nikare ushwi wankondo dakuporofeta, nikare naukonentu wa kuyiva ushili ogho wahoramo, Nampili nikare nalipuro lyakutikiliramo lyakuvhura kudirura ndundu ditundepo. ngoli ntjene kapi nakara nashihoro, ame kundereko. ³ Nampili nitape limona lyande nalintje kuva hepwe, ndi ashi nitape rutu rwande naruntje varushore. Ngoli ame kwato shihoro, navimweshi ngavivhura kunkwafa kukwande. ⁴ shihoro kwa kara mulididimiko na mpora. Shihoro kapi shakara namfudu ⁵ ntani kwato kukupandayika. Kwato kukudumba. Ndi kwato mututururu. Shihoro kapi shashananga vyana umwasho. Kwato kunyenya, kwato nkoko. ⁶ Shasho na kuhaferera shi udona kupira ukushuki. Ngoli shasho kuhafera kumwe na ushili. ⁷ Shihoro kwa kwata navintje, kwapura mwana vintje, kwa huguvara mwanavintje, ntani kudidimika mwavintje. ⁸ Shihoro kwato uhura. Uporofete una karopo weno ngaukashaya po. Maraka ghana karo po weno ngagha kashayapo. Ukonentu, nga ukatundapo. ⁹ Mukonda shi atwe kwayiva ruha rumwe tupu ntani atwe kuyuvita vyaruha rumwe tupu. ¹⁰ Enengoli vyakutikiliramo ntjenye ngaviya tika, ovi vyaruha rumwe makura ngavi dongonoka po. ¹¹ Opo nakalire nimwanuke, kanighambanga vyawanuke, kanighayaranga vyawanuke, kani kupuranga vyawanuke. Ngoli opo nakara nimukurona, nashuva vyawanuke. ¹² Ntantani atwe kunakumona vininke vya Karunga yira muntarero, yira shiwiwili, ngoli kuliyuva olyo ngatukavikumonena nawa-nawa. Pantantani ame kwayiva tupu vya ruha rumwe tupu, ngoli kuliyuva olyo nganikayiva navintje nawa-nawa. ¹³ Ano ngoli ovyo vyakukarererapo mbyo vino; Lipuro, Lihuguvaro na Shihoro. Mara ngoli pavino vitatu shashinenepo Shihoro.