¹ Enɛ e godo ɔ, i mɔ ɖexle gbo bu ɖe jihwle, ɖexlɛ enɛ ɔ e ga mɔ vi kpikpɔn: ewɛnzangun acyowe nɛhwlɛn lɛ nɛ, emɔ hɛn nunyinylan acyowe ; nunyinylan acyowe enɛlɛ ɔ nunyinylan godo godo tɔn lɛ nɛ, ɖo eyɛlɛji Mawu e xomɛsin la gɔn do. ² I mɔ inu ɖikɛn exwu mɔɖe, emɔ ɖo nukpwɛn gɔdo izo; i mɔ gɔ mɔ emɛ éxé ɖu ɖe kanli lɔ gɔdo e akpajlɛ lɔ ji, mɔ ɖu ɖe hixlɛ éxé ewlan do e nyikɔ go lɔ ji. E ɖete ɖe exwu nukpwɛnnɔ lɔ ji, mɔ hɛn ihunxonu éxé Mawu yi nɛ lɔ. ³ Emɔ nɔ ji Mawu e mɛsɛntɔ Mɔyizi e han lɛ, mɔ nɔ ji alɛnvi lɔ e han : Mawu éxé kpe enu lɛ tɛtɛ go ɔ, i dɔn lɛ ga mɔvi kpinkpɔn. Kɔsu itolɛ etɔn, i tito lɛ jɔ, mɔ nyi xonugbo. Mawu ,emɛ gona ɖo sisi nɛ e, emɛ la gbɛ fan eyɛ gona kpa susu nɛ e, ⁴ Ɖo oyɔ lokponɔ géé e wa emɛ kinkɔn. Itolɛ tɛtɛ la we sɛn ɖo inu jijɔ éxé owa lɛ ɖe eɖé yixlɛ céɖé céɖé ⁵ I mɔ sinsɛnxɔ éxé mɛ okɔjijɛ Mawu etɔn e goxɔ ɖe ɔ hun ɖe jihwle; Wɛnzangun acyowe éxé hɛn inu nyinylan acyowe lɛ tɔn ɖe sinsɛnxɔ lɔ mɛ. ⁶ Emɔ do xwanu vɔn weweyi emɔ yi ovɔn éxé é yi sika lo bayi lo bla okɔn; inu ɖe gbɛ enɛlɛ bɛ esinnu gannu acyowe éxé é yi sika lo bayi lɛ na wɛnzangun acyowe lɛ. ⁷ Mawu exé ɖe egbɛ ɖe magɔn losɔn magɔn mɛ ɔ e xomɛsin jwɔ gannu enɛlɛ mɛ. ⁸ Ozɔ jwɔ sinsɛnxɔ lɔ mɛ ɖo susu Mawu etɔn gɔ hinhlɔn Mawu etɔn wutu, gbɛ mɛti go kpego a byɛ sinsɛnxɔ lɔ mɛ e, gbɔn lo jɛ gan éxé mɛ inu nyinylan acyowe éxé wɛnzangun acyowe enɛ lɛ hɛn lɔ la jɔ do e.