¹ Enɛ e godo ɔ , i mɔ kanlin ɖehwlɛn tɔnɖe exwumɛ, mɔ ɖo azo owoe, mɔɖo takun acyowe, igba nɛhwlɛn mɔɖe takun lɔ lɛ ji lokpoe lokpoe; e wlan inu éxé lɔxo do Mawusɛn lɔgolɛ do igba lɔ lɛ go. ² Kanlin éxé imɔ ɔ eɖi ikpɔ; dlagɔnni lɔ mɔ yi e hinhlɔn lɛ yi n'i, emɔ kɔ e kɔsu zinkpoe gɔdo e hinhlɔn yi n'i. ³ Eɖe ɖi inu éxé e do ofɔku takun lokpo na mɔɖe; vɔɔ ofɔku éxé e doe fan ni lo ku, vɔ e abilɛ mɔ ku. Enu jɛ gbɛtɔ éxé ɖe awlango ji lɛ tɛtɛ nukun. ⁴ Yɛmɛ tɛtɛ mɔ jɛ dlagɔnni lɔ sɛn ji. Kanlin éxé e yi e ace yina ɔ, e sɛn kanlin lɔ fe, e mɔ lɔ: "emɛ ɖe ema jlɛ do kanlin exé go?" "Emɛ la kpego lo kpe ahwan gɔdi ?" ⁵ Enagbe wu kanlin lɔ fan ni lɔxo mɔ yigo do Mawu go. Mɔ lɔxo lo zun Mawu. E na acɛ wi fan ni bayi etɔnɛ gbɔn na sunzan kanle kun owe. ⁶ E jɛ ixo nyinylan lɔ do Mawu gɔ e nɔtɛn go ji, mɔ jɛ emɛ éxé nɔ jihwle lɛ zunji. ⁷ E na gbe wi fan ni fun ahwan gɔdo emɛɖedovo Mawu etɔnlɛ, ena acɛ wi do okɔtalɛ gɔdo togun lɛ tɛtɛ nugbɛn . Gbɛtɔ éxé ɖe awlangoji lɛ tɛtɛ la nɔ sɛn. ⁸ Gbɛtɔ éxé e nyikɔ e go wlan do alinvi lɔ go lɛ la nɔ sɛn. Xoma enɛ ɔ emɛ éxé ɖe egbɛ lɛ etɔn nɛ, emɔ wlan e nyikɔ demɛ ɖe egbɛlɔ e bibɛmɛ gbɔn. ⁹ Nɛnyifan mɛlele ɖo tosenu ɔ ni mɔ senu. ¹⁰ Nɛnyifan e ɖo mɛlele na gankpamɛ ɔ, ela sɔn gankpamɛ; nɛnyifan ɖete walo ku iji ku ɔ, ela ku iji ku. Inu enɛ byɔ fan emɛɖedovo Mawu etɔn lɛ nɛ ɖoji mɔ ɖo inuɖiɖi. ¹¹ Enɛ e godo ɔ, i mɔ kanlin lokpo emɔ nɔ tɔn ɖe awlango gɔn. E ɖo azo owe; e azo lɛ mɔ ciɖi alinvi lɔ e azo mɔɖe. Emɔ nɔ lɔxo ɖi dlagɔnni lɔ mɔɖe. ¹² E zan acɛ éxé kanlin tantɛn ɔ ɖo lɔ ɖe e owunkɔn. Ebayi emɛ éxé ɖe awlango ji lɛ mɔ sɛn kanlin tantɛn lɔ (eyɔ éxé jɛ ofɔku ikutɔn vɔ mɔ gan). ¹³ Kanlin enɛ nɔ jlɛ inu gbogbo lɛ. E ɖɔn izo ɖe jihwle lo wa awlango ji ɖe gbɛtɔ okunmɛ. ¹⁴ E nagbe wi fan ni jlɛnu ɖe gbɛtɔ lɛ okunmɛ lo flui. Enɔ lɔ na gbɛtɔlɛ fan nɛ kpa susu na kanlin éxé e yi iji lo do ofɔku wu ɔ. ¹⁵ Ena gbe wu kanlin owegɔ lɔ fan ni na egbɛ kanlin tantɛn ɔ e akpajlɛ, ¹⁶ enɛ ɔ akpajlɛ enɛ mɔ lɔxo , emɔ lo kpego lo hu emɛ éxé wa gbɛ fan eyɛ gona sɛn lɛ tɛtɛ. Kanlin lɔ zɔn emɔ ɖo jisido owunkɔnnu alo olɔ oɖusi ɔ na emɛlɛ. ¹⁷ Nɛnyifan emɛlele goɖo josido enɛlɔ e le ɔ e go kpego wa xɔnu e, gbɛ ego wa sanu fe é. Josido lɔ enyi kanlin lɔ e nyikɔ alo xixlɛ nɛmu éxé ɖe e nyikɔmɛ ɔ ¹⁸ inu enɛlɛ tɛtɛ byɔ fan e ɖowa ɖo inunyinyɔemɛ éxé ɖo inunyinyɔ ni wa akɔta na inu xixlɛ éxé ɖe kanlin enɛ go. Ɖo gbɛtɔ e nuxixlɛ nɛ. Inuxixlɛ enɛ mɔ wa 666.