¹ Inuxlɛmɛ gbo lokpo tɔn ɖe jihwle: e mɔ nyɔsi lohwlɛn do sɛzo isun mɔ ɖe ofɔ gun ni; kɔsugba lokpo mɔ ɖe takun ni suhwlɛvi owiowe mɔ ɖego. ² Nyɔsi lɔ na jivi, e mɔ nɔse vivɛ ivi jiji etɔn mɔnɔ do abobo. ³ Inu ɖexlɛ emɛ bu gɔ lɛ ɖe jihwle: emɔ kanlin nyinylan gbo fɛfɛyi nɛhwlɛn, e mɔ ylɔ kanlin enɛ fan dlagɔnni , eɖo takun acyowe , mɔ ɖo azo owoe. Kɔsogba mɔɖe takun lɔ lɛ lokpo lokpwe; ⁴ e yi e vɔnnugbɛn lo kplɔ e mima do otɔn ɖe jihwle loxlan awlango ji. E nɔte ɖe nyɔsi éxé na jivi lɔ e ohunkɔn; enɛ ɔ , nɛnyifan e jivi lɔ tlolo ɔ e mɔ vun ivilɔ ɖu. E jivi slun lokpo. ⁵ Nyɔsi lɔ jivi islun lokpo, ivi lɔ mɔ kpajɛ do ito lɛ tɛtɛ nugbɛn; e acɛkpikpa la siɛn; iga gbo lokpo mɔɖe. E we kɔ ivi lɔ lo sɔn kɔsu zinkpwe gbo lokpo owunkɔn; ⁶ Nyɔsi lɔ mɔ si losɔn zogbe gbo lokpo mɛ ɖe xie Mawu jla tɛnxwe ni do ma lo kpe okun dego na azan 1260. ⁷ Ahwan funfun lokpo jɔ ɖe jihwle. Micɛli gɔ angɛli lɛ fun ahwan gɔdo dlagɔnni lɔ, dlagɔnni lɔ gɔ e wɛnzangun lɛ fun aahwan lɔ gɔɖe. ⁸ Vɔɔ, e ɖuɖe dlagɔnni lɔ ji. Gbɛ e gɔ na mɔ wu dlagɔnni lɔ fan ni gɔ nɔ jihwle lɔ gɔ e ahwan lɛ e. ⁹ Dlagɔnni gbo lɔ, idan xoxo enɛ éxé eylɔ fan "Lɛgba" alo "saatan", éxé dɔn egbɛ lɔ tɛtɛ do e akpamɛ ɔ, e titlin eyɔ gɔ e angɛli lɛ tɛtɛ. ¹⁰ Enɛ e godo ɔ, i se igbe gbo nɛhwlɛnɖi ɖe jihwle mɔ lɔ fan: "mawu ɖe hinhlɔ etɔn gɔ kɔsu ɖuɖu etɔn yi xlɛ; hwlɛngatɔlɔ ɖe acɛkpikpa éxé nyi etɔn lɔ ixlɛ. Ɖo exwɛdana emɛtɔ éxé ɖete ɖe Mawu owunkɔn ɔ e mɔ kwɛ i li awan. ¹¹ Lɛngbɔvi ɔ e hun gɔdo ixo éxé mi nɔvi lɛ ɖeklunna ɔ zɔ keun e mɔ ɖu ɖeji, e yigbe wa lo yi e gbɛ i na, e yigbe wa lo ku. ¹² Enɛ wutu ɔ, jihwle gɔ emɛ éxé ɖe sɛxwɛlɛ nɔ mɔ jijwɛ. Vɔɔ, dindɔn na awlango gɔ exwu, ɖo awovi jɛte lo wa mi kɛ gɔ womɛsin gbo lokpo. Ɖo enyɔ fan ganmɛ vile jɛn mɔkpo na eyɛ. ¹³ Exé dlagɔnni lɔ mɔ fan e ɖu eyɛ do wlango ji ɔ, e jɛ gɔdo na nyɔsi éxé jivi slun lokpo lɔ. ¹⁴ Vɔɔ, e na gangan gbo e abɔ wu nyɔsi lɔ ni lo zlɔn lo sɔn e tɛnxwe lɔ ɖe zogbe, xie e la na nuɖuɖu wi ɖe gbɔn na ixwe otɔn ɖe ɔ, xie idan go kpego na wli ɖe ɔ. ¹⁵ Idan lɔ tun esin ɖe kemɛ ɖi itɔ sisa ha, ni lo kpego lo jɛ nyɔsilɔ ogodo lo wli zɔn esinmɛ, ¹⁶ vɔɔ awlangolɔ hwɛn nyɔsi lɔ gan. Awlango lɔ kɛ kemɛ mɔ mi esin éxé dlagɔnni lɔ tun lɛ tɛtɛ. ¹⁷ Vɔɔ Womɛsin dlagɔnni lɔ tete, emɔ sɔn ahwan fun gɔ nyɔsi lɔ e vikpɛ éxé kpo lɛ gbe, emɛ éxé setonu na Mawu e sɛn lɛ mɔ nɔ gbeji Yesu lɛ ɔ, e sɔn ahwan fun gɔɖe gbe. ¹⁸ Dlagɔnni lɔ mɔ sɔn laci exuto.