¹ Ivi vivɛ eyi mi nyi na mawu; enɛ wutu ɔ, mi ɖo wa hlɔn mɔ wa dɔn ɖikɛn eyɔ mɔɖe , ² Mi wa ɖɔn gɔdo wannyinyi ɖikɛn Klisu ɖo na mi ha. Klisu éxé nyiwan na mi mɔ yi eɖe yi na do mi takunlɛmɛ ɖikɛn e savɔ ɖo ha, ɖo ovɔsisa iwan mɛmɛyi nɔ éxé vjɛ Mawu nukun mɔɖe. ³ Nɛ ma se ogalilɔxo , inu gbigble wiwa alo okundo agbanmɛ na emɛ gɔ wunbyaxo ɖe mi cɛncɛn; ɖo emɛɖedovo mi nyi na Mawu. ⁴ Ego jɛ fan nɛnɔ se inyaxo, adiɖiɖexo gɔdo ixo makɔn makɔn lilɔ ɖe mi nugbɛn e; vɔɔ, mi nɔ d'ekpɛ na Mawu na inu éxé e wa na inu éxé e wa na mi lɛ. ⁵ Mi nyɔ ganji fan ogɔlɛtɔ , inu huhluwatɔ alo kankutɔ lele go na sɔn Kɔsuto Klisu etɔn gɔdo Mawu etɔn mɛ gblée; ɖo kankuku ɔ, ehunsinsin nɛ. ⁶ Mɛti ni ma yi adiɖiɖexo lo klɔmiɖu e, ɖo inu enɛlɛ wutu mawu lo sinxomɛ do gbɛto éxé go setonu ni lɛ. ⁷ Hun, mi ma kpedo nuti gɔ gbɛtɔ olɔkpa enɛha lɛ e. ⁸ Isan ɔ, zinvlumɛ mi ɖe; vɔɔ tɛn éxé miɖe kpwɛ gɔ Aklunɔ ɔ, mi ɖe kinklɛnmɛ; enɛ wutu ɔ, mi nɔ zan mi egbɛ ɖi emɛ éxé nyi kinklɛn etɔn mɔɖe. ⁹ Kinklɛn ena elo wanu mɛmɛyi; e mɔ wanu jijɔ mɔ lɔ ixojɔxo. ¹⁰ Mi nɔ tɛnkpɔn mɔ nɔ nyɔ exé jɛ Aklunɔ nukun ɔ. ¹¹ Mi ma nɔ wa inu nyinylan éxé emɛ éxé ɖe zinvlumɛlɛ wa ti e; vɔɔ, mi ɖe inu enɛlɛgba ɖe kinklɛn nugbɛn. ¹² Ɖo inu éxé emɛ enɛlɛ wa ɖe nugun ɔ, mɛti go kpego wa lɔ e; inyanu nɛ ¹³ nɛnyifan eɖe inu enɛlɛ gba ɖe kinklɛn nugbɛn ɔ, e mɔ kunnu jɛ inu éxé é nyi lɔ go cékécéké. ¹⁴ Ɖo inu éxé e ɖegba ɖe kinklɛn nugbɛn lɛ tɛtɛ e tlɔzun kinklɛn; enɛ wutu e lo lɔ fan: "Oyɔ emɛ éxé nɔ dɔwlɔn ɔ, fɔn cite ɖe emɛ kukulɛ mɛ; enɛ ɔ, Klisu e kinklɛn la kɔn do iji. ¹⁵ Hun, mi mɔ cɔ miɖe ganji do egbɛ éxé mi nɔ zan lɔ go. Mi ma zan mi egbɛ ɖi lulunɔ mɔɖé é; vɔɔ mi zan mi egbɛ ɖikɛn inunyɔtɔ mɔɖe. ¹⁶ Mi hwlɛndo ganmɛlɛ, mɔ wanu; ɖo gan éxé mɛ miɖe lɔ go jɔhun e. ¹⁷ Enɛ wutu ɔ, mi ma wanu ɖi emɛ éxé go ɖo ayiti do oɖomɛ e; vɔɔ, mi tɛnkpɔn mɔ nyɔ inu éxé Aklunɔ jlo fan na mi bayi ɔ. ^{18 21} Mi ma nu ahanmu e; ahan nu zɛ jlɛgo ena emɛ egbɛ mɔ gu; vɔɔ, gbigbɔ ɖedovo ni jwɔ mi ayimɛ. ¹⁹ Mi jihan olɔkpa lɔkpa lo do hinhlɔn lanmɛ na miɖelɛ, mɔ gɔji lo kpa Aklunɔ gɔdo ayi mitɔn tɛtɛ. ²⁰ MIi do ekpɛ na Mawu Itɔ lɔ ɖe inu tɛtɛ takun ɖe inu tɛtɛ mɛ ɖe Aklunɔ Yesu Klisu e nyikɔ mɛ. ²¹ Mi nɔ yi miɖe lɛ yihwe ɖe miɖelɛ gun, ɖo osiwu éxé mi ɖo na Klisu ɔ wutu. ^{22 23 24} Nyɔsilɛ, mi nɔ yi miɖe hwe na mi sulɛ, ɖikɛn mi yi miɖe hwe na Aklunɔ mɔɖe. ²³ Ɖo osu e kpacɛ na e si, dikɛn Klisu kpacɛ na ogun etɔn mɔɖe. Klisu tete enyi hwlɛngantɔ na ogun éxé nɔ nyi agbaza etɔn ɔ. Kɛn ogun yi eɖe hwe na Klisu ɖo ɔ etɔnɛ ke nyɔsi la yi eɖe hwe na é súlɛ ɖe inu tɛtɛmɛ . ²⁵ Islulɛ, mi ɖo wannyinyi na mi silɛ, ɖikɛn Klisu ɖo wannyinyi na ogun lɔ ɖo gbɔɔn mi yi eɖe lo sa ovɔ do ogun lɔ e takunmɛ. ²⁶ E bayi etɔnɛ mɔ yi esin gɔdo ehun etɔn lo slawu na ogun lɔ, mɔ lɛ we. Nɛ lo kpego lo nyi ogun exe ejɛ gɔdo, ma lo nyi ogun Mawu etɔn. ²⁷ Ɖo enɔ din fan ogun lɔ ni wa eyɛ tete e owunkɔn kpodo kafu; ejlo fan ɖɔ ogun lɔ ni viohwɛn inu tɛtɛ mɔ gɔn ɖego, nɛ ma lo mɔ eɖwi ti ɖego e; gbɛ oblɔ ti ni ma nɔ ego e. ²⁸ Hun, osulɛ ɖowa nyiwan na esilɛ, ɖikɛn e nyiwan na agbaza etɔn lɛ mɔɖe . Emɛ éxé nyiwan na esi ɔ, eɖe e nyiwan na. ²⁹ Ɖo mɛti go gbɛwan na eyɔ tete e agbaza kpɔn gbléé. hugan wu etɔnɛ ɔ, e wlibo ni nɛ, mɔ na inuɖuɖu wi, dikɛn Klisu bayi na ogun etɔn mɔɖe; ³⁰ agbazagonu etɔn mi nyi. ³¹ Ɖo Mawuxo lɔ lɔ fan: enɛ lɔ wutu islun la jo etɔ gɔ enɔ do, mɔ jɛkpwɛ gɔdo esi, yɛ mɛ owelɛ mɔ tlɔzun lokpo géé." ³² Inubudo gbo eyi e ɖexlɛ ɖe hinnɛ, inyɔ mɔ mɔfan Klisu gɔdo ogun lɔ e xo eyi enɔ lɔ. ³³ E mɔ gɔ nɔ lɔ xo do myɛlɛ fe go: islun lokpo lokpo ɖo wa nyiwan na esi ɖi eyɔ tete mɔɖe; nyɔsi lokpo lokpo mɔ ɖo wa si esu.