¹ Vikpɛlɛ, mi setonu na mi emɛjitɔlɛ kɛn Mawu lɔ ɖo ɔ, ɖo inu ganji nɛ. ² Kɔ itɔ gɔ inɔ du , esɛn tantɛn exe Mawu do ɔ mɔ do akpa deji. ³ Nɛ i egbɛ ni lo jɔhun omɔ gɔ dɔji ɖe wlangoji . ⁴ Emɛjitɔlɛ , mi ma nɔ zin mi vikpɛlɛji e, vɔ mi kɔ do jihwle mɔ gbɛnu nɛ kɛn Mawu lɔɖo ɔ. ⁵ Mɛsɛntɔlɛ, mi setonu na mi galɛ lozɔ agbazamɛ, gɔdo cicwɔ gɔdo sisisɔmɛ lozɔn kinkɔn gɔdo ayi jijɔ. Mi mɔ setonu nɛ ɖikɛn mi wa setonu na Klisu ha. ⁶ Ni ma nyi e okunmɛ kɛɖɛ ɖikɛn mi wa nɔ bayi etɔnɛ ɖe, emɛ éxé nɔ din ajɔhun ɖe gbɛtɔ lɛ e owunkɔn ɖe ɔ ha e; vɔɔ, mi setonu Klisu sɛntɔ éxé bayi ojlo Mawu etɔn gɔdo e ayiha tɛtɛ ɔ ha. ⁷ Mi nɔ bayi mi kannumyɔ dɔn gɔdo ojlo ɖagbɛ, Aklunɔ tete mi nɔ wadɔn na mɔɖe, mi ma bu fan gbɛtɔ lɛ kɛkɛ mi nɔ wa idɔn na e. ⁸ Mɔ nyɔ fan emɛ lokpo lokpo la mɔ nu ɖagbɛ éxé ewa é ojɔ yi ɖe Aklunu kɛ; emɛ lɔ tɛn nyi kannumyɔ, emɛlɔ tɛn ɖe éɖé si. ⁹ Igalɛ mi, myɛlɛ fe , mi la nɔ zan egbe ɖagbɛ gɔ mi kannumyɔ lɛ. Mi ma ylanhun ɖée, mɔ nyɔ fan myɛlɛ gɔde eyi eɖe oga lokpo ɔ ɖe sɛxwɛ; iga enɛ go ɖe mɛti dovo na mɛti e. ¹⁰ Inu éxé kpo ma lɔ nami ɔ we: mi din mi hinhlɔn ɖe ikpwɛ éxé mi ɖe ɖé Aklunɔmɛ ɔ mɛ, mɔ din ɖe e hinhlɔn éxé kpe inu tɛtɛ go ɔ mɛ. ¹¹ Mi fɔ ahwanfunnu éxé Mawu nami lɛ tɛtɛ ikpla, ma tɛn kpego lo mɔte ɖe imɔ éxé awovi tlɛ na emɛ lɛ e owunkɔn. ¹² Ɖo gbɛtɔlɛ gonɛ mina fun ahwan gɔdo e; vɔɔ, inu ɖe yɛswimɛ nyinylan éxé ɖe jihwle gɔ awlango cɛncɛn, acɛkpikpa lɛ, hinhlɔn lɛ gɔdo iga egbɛ éxé mɛ tɔn lɛ éxé mi go mɔ lɛ eyɔ mi na fun ahwan gɔdo. ¹³ Enɛ ewanu ɔ, mi kɔ ahwanwanu éxé Mawu yina mi lɛ tɛtɛ i kpla tɛn; éenɛ ɔ, azan nyinylan wewa ɔ, mi mɔ lo tɛn kpego mɔ nɔte ɖe kɛntɔ e owunkɔn, Keun gan éxé mɛ mi wa fun ahwan yɔɔ, mi mɔ gɔ kpoɖe aceji. ¹⁴ Hun, mi mɔ nɔ aceji. Xojɔxo nɛnyi ogoji blanu ɖe alin nami; exwɛ jijɔ ni nyi oganwu na mi do. ¹⁵ Zobibi do ewɛnɖagbɛ éxé na fifa emɛ go ɔ jijla ni nyi ofɔkpa ɖe ofɔ na mi. ¹⁶ Inuɖiɖi ni nyi gaglonu nami, na mi nɔ hɛn tɛgbɛɛ, ma tɛn kpego lo ci izohwan éxé kɛntɔ la dun do mi ɔ. ¹⁷ Hwlɛngan ni nyi ogangba ɖe takun na mi, nɛ Mawuxo ɔ nɛ nyi iji éxé gbigbɔ ɖedovo kɔdo olɔmɛ na mi ɔ. ¹⁸ Mi la nɔ xo eɖɛ hamɛ hamɛ, ma nɔ ɖe kuku na Mawu zɔn gbigbɔ ɖedovo ji gantɛtɛmɛ. Mi nɔnɔ aceji, mɔ nɔ bizo dego tete, mɔnɔ xo eɖɛ na amɛɖedovo Mawu etɔnlɛ tɛtɛ. ¹⁹ Mi nɔ xo eɖɛ na inyɔfe , nɛ izwan ixo lɔtɔn ɔ, Mawu ni na ixo éxé sɔgbe ɔ wu, nɛ alɔxo gɔdo kanɖeji, na lo ɖé nubudo ewɛnɖagbɛ ɔ etɔn mɛ. ²⁰ I ɖe ogankpamɛ tɛn co i mɔ kɔ ewɛnɖagbɛ eenɛ ofɔ ɖote. Hun, mi mɔ nɔ xo eɖɛ na, nɛ a tɛn kpego lo jla ewɛndagbɛ ɔ gɔdo jiɖiɖe kɛn iɖo a bayi ɖo ɔ. ²¹ Mi nɔvi wannyinanɔ Ticiku éxé ɖe gbeji ɖe e olɔdolɛ mɛ, ɖe Aklunɔ e dɔnlɛ mɛ ɔ, la lɔ un xo lɛ tɛtɛ na mi na milo nyɔ kɛn mi i ɖeɖo ɔ. ²² Inu éxé wanu ilo ɖwe loxlan tawun ɔ eyɔ enyi fan ela we lɔ kɛn mi ɖeɖo ɔ na mi mɔ lo na okɔnkpinkpan wu mi. ²³ Mawu itɔlɔ gɔ Aklunɔ Yesu Klisu ni na fifa gɔ wannyinyi, gɔdo inuɖiɖi nɔvi ɖe Klisu mɛ lɛ tɛtɛ. ²⁴ Majɛna Mawutɔn ni nɔ kpwɛ gɔ emɛ éxé ɖo wannyinyi magɔn magɔn na mi Aklunɔ Yesu Klisu lɛɛ.