¹ Ɖo inu enɛ lɛ tɛtɛ wutu ɔ, inyɔ emɛ éxé ɖe gankpamɛ ɖo nɔ sɛn Mawu wutu ɔ, nɔ byɔ mi fan, ami zan mi egbɛ ni sɔgbe kɛn Mawu jlo ɖo, ɖo gan exe mɛ e ylɔ mi. ² Mi nɔ hwe miɖe gan tɛtɛ mɛ. Mi nɔ ɖo odɔmɛ fifa mɔ nɔ ɖo suwuru. Mi nɔ mɔ mi nɔzo gbɔ ɖe wannyinyi mɛ. ³ Mi hlɔn mɔ yi fifa éxé dɔn mi do kpwɛ mi lo nyi lokpo ɔ, lo hɛn lokpo ninɔ éxé gbigbɔ ɖedovo na mi lo nyi ɔ dote. ⁴ Agbaza lokpo gée eyi eɖe, gbigbɔ ɖedovo lokpo fe mɔɖe ɖikɛn okunɖiɖo éxé gun Mawu jɛ lo ylɔmi mɔ nyi lokpo ha mɔɖe. ⁵ Mawu lokpo gée eɖe. Nuɖiɖi lokpo mɔɖe, emɛnylɔ do tɔmɛ lokpo gée mɔɖe; ⁶ Mawu lokpo gée eyi eɖe mɔ nyi tɔ na emɛ tɛtɛ, mɔ kpacɛ na tɛtɛ, mɔ nɔ wadɔn ɖe mɛ tɛtɛ mɛ; mɔ ɖe mɛ tɛtɛ mɛ. ⁷ Co ɔ, inu nina vovo myɛmɛ lokpo lokpo mɔ yi. Emɔ sɔgbe gɔdo éxé Yesu na ɔ. ⁸ Kɛn inu éxé ewlan do Mawuxo xoma lɔ lɔ ɖo ɔ: gan éxé mɛ esɔn jihwle ɔ , ekplan gantɔ lɛɛ losɔn, ena nu wu gbɛtɔ lɛɛ. ⁹ Amu enɔ lɔ lo lɔ fan esɔn jiwle? Nɛ elɔ fan esɔn jihwle ɔ, emɔ jɛte mɔ wa awanglo gba. ¹⁰ Emɛ éxé jɛte mɔ wa do d'awangloji ɔ lokpo lɔ ke gɔ sɔn jihwle ni lo kpego lo ɖu kɔsu ɖe inu tɛtɛ ji ɖe xi tɛtɛ. ¹¹ E we na nunina vovo gbɛtɔlɛ. E na mɛlehwlɛn emɔ nyi emɛ ɖoloxlan, mɛɖehwlɛn lɛ mɔ nyi emɛ éxé yi ewɛn ɖe Mawu si mɔ do lɛ. Mɛ lehwlɛn lɛ mɔ nyi Mawuxo jlatɔ, mɛ lehwlɛn lɛ mɔ nyi unkɔntɔ, mɔ nyi nukplɔn emɛtɔ. ¹² E bayi etɔnɛ, wa lo jla emɛɖedovo Mawu etɔn lɛ ɖo, e mɔ lo kpego lo wa idɔn éxé nyi Yesu sɛntɔ etɔn. E na keun ogun éxé nyi agbaza Yesu etɔn nɛ lo sɔ owunkɔn ɖe nuɖiɖi mɛ. ¹³ Kaka mi mɔ nɔ kpwɛ ɖe nu ɖiɖi mɛ, mɔnɔ kpwɛ ɖe okunnu mɔ jɛ Mawuvi lɔ go mɛ. Mi la nyi mɛxo ɖe nudiɖi mɛ , mɔ mɔ hinhlɔn mɔ sɔgbe gɔ Yesu ixo mɔ gɔn ɖego. ¹⁴ Nɛ eɖe etɔnɛ mi go naci ɖi vikpɛvu lɛ ha e , nɛ emɛklɔɖutɔ lɛ ni lo yi e mɛklɔɖutɔxo lɛ lo gba ayido na mi na mi lo xo d'aɖusi lo xo do omyɔmɛ ɖi itɔ xixo gɔ jɛhɔn gangan éxé xo lo do aya na tɔjihun ɖe tɔji ha é; ɖo emɛklɔɖutɔlɛ ɔ, nu éxé e yi é bibi lo bayi ɔ eyɔ elo dɔn emɛ do enu nyinylan lɛ mɛ. ¹⁵ Vɔ , nɛ mi nɔ jla xonugbo lɔ gɔ wannyinyi ɔ mi la ɖo unkɔn sɔnsɔn ɖe inu tɛtɛ mɛ, mɔ nɔ gogo Yesu éxé nyi takun ɔ. ¹⁶ E yɔ e wanu agbaza gonu vovo agbaza etɔn lɛ tɛtɛ lo ɖe kpwɛ. Tɛnwe hwihwla vovo éxé ɖe agbaza go lɛ ehɛn agbaza lɔ do lokpo ganji. Enɛ ɔ, nɛ agbaza go nu lɛ lokpo lokpo nɔ wa e dɔn ɔ, agbaza lɔ tɛtɛ hwɛn mɔ ɖo owunkɔn sinsɔn ɖe wannyinyi mɛ. ¹⁷ Ixo éxé nɔ lɔ na mi ɖe Yesu e nyikɔmɛ ɔ we, mi ma gɔ nɔ zan mi egbɛ ɖi inu maɖitɔ lɛ mɔɖe é, eyɛlɛ ɔ, e susu maɖo ta lɛ gun e jɛ. ¹⁸ E eyi go mɔ nutiɛ , egbɛ jɔ egbɛ éxé Mawu na ɔ eyɛlɛ go ɖo mima ti ɖemɛ e, ɖo e gu mɔ tli oto tawun. ¹⁹ Nuti go wa nya nɛ e. Ejo eɖe do na nu nyinyla wiwa . Nuti go hɛn ɖote ɖe nunyinylan wiwa e mɔji e. ²⁰ Myɛlɛ ɔ, inu éxé mi kplɔndo Yesu go gowenɛ é. ²¹ Dandan ɔ, e lɔ Yesu e xo mi mɔ se, éxé mi ɖinu na Yesu ɔ , e mɔ kplɔn xonugbo éxé ɖe Yesu mɛ ɔ wu mi. ²² Hun, mi ɖo wa ɖe emɛxoxo éxé mi nyi ɔ yi ɖawan; emɛ éxé mi nyi xoxo ɔ eyɔ kɛn mi zan mi egbɛ ɖo san ɔ yi do ayimɛ na mi, eyɔ ejlo éxé klɔ emɛɖu ɔ, ehɛn emɛ bu. ²³ Mi ayi gɔ mi susu ɖo la tlɔ tɛtɛ. ²⁴ Mi yi emɛ yɔyɔ exé Mawu bayi emɔciɖi eyɔ tete ha ɔ i do; emɛ yɔyɔ enɛ ɔ, ɖe eɖe xlɛ ɖe egbɛ jijɔ , egbɛ kinkɔn exé xonugbo ɔ yi do ayimɛ na emɛ ɔ mɛ. ²⁵ Enɛ wutu ɔ, mi jo xosu ɖuɖu do. Nɛ mɛ lokpo lokpo ni lɔ xonugbo na e nɔvi, ɖo mɛ tɛtɛ enyi agbazagonu agbaza ɔ etɔn. ²⁶ Nɛ mi sinxomɛ ɔ, mi cɔ miɖe ami ma lo jɛ exwɛmɛ e. Ozan ni mado do mi xomɛsin e. ²⁷ Mi ma na tɛnxwe wu lɛgba ni tɛn mi kpɔn e. ²⁸ Emɛ éxé jɛ ajo san ni jo ajo do? mɔ wadɔn , mɔ nyi eɖe, mɔɖo ayi jijɔ, enɛ ɔ emɔ ɖonu lokpego lo nanu wu emɛ éxé inu hudo lɛ. ²⁹ Ixo nyinylan ti ni ma nɔ tɔn ɖe mi kemɛ lɛ e , ixo mɛmɛyi exé la kpego lo dolɔ emɛ gan éxé mɛ adan gbo emɛ ɔ, ixo éxé la wa ɖagbɛ na emɛ éxé nɔ ɖoto mi lɛ kɛɖɛ e la nɔ tɔn ɖe kemɛ na mi. ³⁰ Mi ma bayi nu lo gbɔjɔ gbigbɔ ɖedovo Mawu etɔn e. Gbigbɔ ɖedovo eyi enyi jesido Mawu etɔn éxé ɖe migo ɔ. Eyɔ go mi deji do fan okunɖehwlɛn la we kɛn Mawu mɔ ɖemi ɖe inu nyinylan mɛ. ³¹ Mi jo akpɔmimɔ do, mɔ jo xomɛsin do, mɔ jo aɖidido do, mɔ jo ejlɛwiwa do, mɔ jo emɛjo lilɔ do, mɔ jo inu nyinylan wiwa do. ³² Mi kɔn odɔmɛ do miɖelɛ go , mi mɔ nɔ yi exwɛ yi kɛ mi ɖe lɛ ɖikɛn Mawu yi exwɛ yikɛ mi ɖe Yesu mɛ ɔ ha.