¹ Gan enɛ mɛ ɔ, xɔsu Elodu jɛ aya do na mɛnɛhlɛn lɛɛ ji ɖe agunvi lɛɛ mɛ. ² E na fan e yi iji lo hu Jaki exe nyi Jaan e nɔvi. ³ Exe emɔ fan ejɔhun ɖe Jwifu lɛɛ e kunmɛ ɔ, e mɔ zɔn e mɔ wli Piyɛ fe. Kpɔnnɔ maɖo tikɛn e xwe gan mɛ nɛ. ⁴ Exe Elodu wli Piyɛ ɔ, e su-i do gankpa mɛ, mɔ yi do olɔ mɛ na sɔja enɛ-enɛ donu enɛ e lo cu-ɛ, mɔ ɖo linlin fan dindinwenya e xwe wan godo ɔ, eyɛ la dɔn-ɛ lo wa togun lɔ e ŋukɔn, e mɔ lo da ehwɛ ni-i. ⁵ Exe gan exe mɛ na Piyɛ ɖe gankpa mɛ ɔ, agun lɔ nɔ xo eɖɛ vivɛ lɛ do takun ni-i. Exe e kpo isɔ Elodu mɔ lo kplan Piyɛ lo wa togun lɔ owunkɔn, mɔ da ehwɛ ni ɔ, ⁶ Piyɛ nɔ dɔ owlɔn ɖe ozan mɛ ɖe sɔja owe e cɛnen mɛ, caba owe e dwe, co sɔja bu lɛ fe mɔ ɖete kpɔn-ɛ ɖe hɔn ji lo o cɔ gankpa lɔ. ⁷ Jlokpe-jlokpe ɔ, wɛnsangun Mawu tɔn lokpo jɛn jɛte, kpoŋu ɔ, kinklɛn jɛn kpe oxɔ lɔ mɛ, wɛnsangun lɔ mɔ ɖo lo Piyɛ go mɔ fɔn-ɛ, mɔ nɔ lɔ fan, cite haŋu! Kpoŋu caba lɔ, lɛ tɛtɛ bi mɔ flɛ jawan ɖe olɔ na Piyɛ. ⁸ Wɛnsangun lɔ mɔ nɔ lɔ ni-i fan: Sin igo ji bleŋu, mɔ ɖe xi fɔkpa lɛɛ, e mɔ bayi ɖo etɔnɛ; wɛnsagun lɔ mɔ gɔ lɔ ni-i fan i awu gbekpan i do mɔ xwedo. ⁹ Kpoŋu Piyɛ mɔ tɔn mɔ xwedo wɛnsagun lɔ. Vɔ, inu wɛnsagun lɔ na bayi ɔ, Piyɛ go nɔ mɔ nu jɛ emɛ e, e nɔ mɔ fan idlɔ eyɛ nɔ ku sin. ¹⁰ E zɔn sɔja tantɛn lɛ go, mɔ zɔn owegɔ lɛ go, mɔ sɔn la jɛ ganhɔn exe tɔn do toxo mɛ lɔ ji, kpoŋu, ihɔn lɔ tete mɔ hun ɖe ŋukɔn ni-i, e mɔ tɔn, mɔ bɛ imɔ ɖehlɛn zaan kpoŋu, wɛnsagun lɔ mɔ jo -e do. ¹¹ Piyɛ mɔ mɔ eɖe mɛ lo. I mɔ ganji Mawu ɖo wɛnsagun lo hlan mɔ we ɖe o ɖe Elodu gɔdo inu e Jwifu lɛɛ ɖ'ete lokpɔn e asi mɛ. ¹² Exe emɔ etɔnɛ, e mɔ bɛ Mali exe nyi Jaan exe egɔ ylɔ fan Maki ɔ, enɔ osin mɛ. Mɛsusu mɔ kple ɖe xinnɛ lɔ mɔ nɔ xo eɖɛ. ¹³ E xuxu hɔntogbo lɔ, nyɔsi mɛsɛntɔ exe eylɔ fan Hlodu wa mɔ we kpɔn emɛ exe nɔ xuxu ihɔn lɔ. ¹⁴ Exe e se igbe emɛ lɔ tɔn-ɔ, e mɔ kunnu jɛ e go fan Piyɛ nɛ, iji mɔ jwɛ kaka, vɔ e o hun hɔntogbo lɔ e, vɔ mɔ bɛ wezun fan Piyɛ e yi e ɖe hɔn lɔ ji. ¹⁵ E mɔ lɔ ni-i fan: Ikle o nɔ ɖi. Co ɔ, Hlodu mɔ gɔ tɛ ɛɖɛ e ji mɔ lɔ nɛ fanxonugbo nɔ lɔ na mi. ¹⁶ Piyɛ mɔ kpo nɔ xuxu hɔn lɔ jan nɛ. Exe e sɔn la hun hɔn lɔ, e mɔ mɔ-ɛ. Cicuɔ mɔ jɛ eji. ¹⁷ Piyɛ mɔ bayi olɔ nɛ fan nɛ bɔnu. Mɔ wli kɛn Mawu ɖe tɛn ɖe gankpa mɛ na ye. E mɔ gɔ lɔ nɛ fan: Mi sɔn la lɔ na Jaki gɔdo nɔvi exe ɖe nuɖiɖi mɛ le fe. Enɛ godo ɔ, etɔn mɔ bɛ xibu mɔ. ¹⁸ Exe okun we kɛn-ɔ, sɔja lɛ jɛ jlojlo jɛ ji, mɔ nɔ kanse wu eɖe lɛ fan amu e jɛ do Piyɛ ji. ¹⁹ Elodu sɔn Piyɛ kplan tɔn ɖe gankpa mɛ, mɔ din i gbɔ, mɔ yɔ sɔja lɛ mɔ nɔ kan xo se wii, mɔ nɔ na gbe fan nɛ huye. Enɛ godo ɔ, Elodu lɛ ɖe Jude mɔ lɛ ci Sezale. ²⁰ Elodu sin xomɛ do Tiinu lɛ gɔdo Sdɔnnu lɛɛ fe tlala . Eyɛ lɛ we nɛ mɔ ɖo gbekpwɛ mɔ jɛ hwannyi gɔdo Blatus, iga gɔ nɔ tɔn, mɔ sɔn la mɔ-ɛ, mɔ jlo fan nɛ gbo ehwɛ gɔde nɛ fifa nɛ lo wa ɖo e xlango ji exi dɔkun ehɛn ito mitɔn lɔ lɛɛ ɖee. ²¹ Exe bibɔzan sɔgbe ɔ, Elodu do ekɔsu awu lɛɛ mɔ sinnawan ɖe ekɔsu zinkpwe ji, mɔ nɔ lɔ xo na ye agbawungba. ²² I to lɛ tɛtɛ mɔ do abobo fan, e go wa gbɛtɔ e nɔ lɔ e, inu mɛsɛn nɛ. ²³ Tlolo ɖe tɛnxwe lɔ mɛ ɔ, wɛnsagun Mawutɔn o lɔ jɛ ego, ɖo e go ze Mawu su e wutu, i we mɔ ɖu i gbɔɔn e mɔ ku. ²⁴ Mawoxo lɔ mɔ gɔ nɔ gbakpe d'eji. ²⁵ Banabasi gɔdo Sɔlu mɔ ɖo olɔ te na inu e gbe e ɖo ye lohlan mɔ lɛkɔ lo sɔ Jeluzalɛmu mɔ kplan Jaan e ylɔ fan Maki.