¹ Mɛɖolohwlan lɛ gɔdo nɔvi ɖe Kliso mɛ exe ɖe Jude lɛ fe se fan emɛ e go nyi Jwifu lɛ fe yi Mawuxo lɔ se. ² Enɛ wanu exe Piyɛ lɛkɔ sɔn jeluzalɛmu, Jwifu Klisosɛntɔ lɛ ɔ lo do ehwɛ wi, ³ mɔ nɔ lɔ ni fan: amutu o lo sɔn emɛ go nyi Klisosɛntɔ lɛ kɛ, mɔ ɖu nu gɔde? ⁴ Piyɛ mɔ yi xo mɔ tin kɛn inu lɛ zɔn ɖo lokpo-lokpo. ⁵ E lɔ nɛ fan Jope i ɖe, mɔ nɔ xo ɛɖɛ, mɔ byɛ inu ɖi odlɔ ha mɛ, mɔ mɔ nu ɖi ovɔn gbekpan ɖehwlɛn lɛdo jihwlɛ mɔ wa kaka unkɛ, ɖe jijɛ mɛ, e oto ɛnɛ lɛ mɔ ɖe sinsin. ⁶ I mɔ jɛ kpinkpwɛn ji tlinlin, mɔ mɔ kanlin exe zɔn zɔnlin do ofɔ enɛ ji lɛ, gbelan lɛ, kanlin e sa zɔn xwlango lɛ, gɔ do exɛ vovovo lɛ fe ɖ'emɛ. ⁷ I mɔ se igbe ɖehlɛn, e nɔ lɔ na fan, Piyɛ, cite, hu mɔ ɖu. ⁸ I mɔ yi gbe ni-i fan: o o, un Mawu, yi onu e wa su gɔ nu e hɛn emɛ gble lɛ ɔ, yɔ ɖu ti kpɔn e. ⁹ Igbe lɔ mɔ gɔ lɔ na ɖe jihle owegɔ fan: Inu e Mawu lɔ fan e la ɖu ɔ oyɔ ma lɔ fan e wa isu e. ¹⁰ Jɔtɔn inu enɛ lɔ jɔ, enɛ godo ɔ, inu ɖi ovɔn gbekpan lɔ gɔdo inu ɖe mɛ lɛ tɛtɛbi sɔn jihle. ¹¹ Gan enɛ mɛ trolo ɔ, emɛ otɔn bu lɛ wa esin lɔ mɛ i ɖe lɔ e hɔn ji. Sezale e mɔ ɖwe lo hlan a. ¹² Gbigbɔ mɔ lɔ na fan na xodoye na ma gɔ xo nu kpɔn e. Mi nɔvi atlokpo e mi nɔ mɔ tɛn lɛ mɔ kplan lo sɔn Sezale, mi mɔ byɛ Kɔnɛyi e sin mɛ. ¹³ Kpoŋu ɔ, dahwe lɔ mɔ wli kɛne mɔ wɛnsangun Mawu etɔn ɖehlɛn wa esin me ni-i, mɔ lɔ oxo ni-i ɖo na, Wɛnsagun lɔ lɔ ni-i fan ɖo emɛ lo hlan Jope, nɛ la ylɔ sinmɔ exe e gɔ ylɔ fan Piyɛ nɛ wa. ¹⁴ E la lɔ ixo e wa hlɛn o yɔ gɔdo i hɛnnu lɛ tɛtɛ bi gan nɛ! ¹⁵ Xo lɔ na ye ji i jɛ, Yesinsɛn mɔ jɛte do e ji ɖikɛn e jɛte lo wa mi ji ɖo ɖe bibɛ mɛ. ¹⁶ Kpoŋu, i mɔ flin ixo exe Mawu lɔɔ, fan Jaan yi esin lo lɛ yehwesin na emɛ lɛ, amɔ yesinsɛnɛ ela lo lɛ yehwesin na mɛɖehlɛn lɛ. ¹⁷ E nyi Mawu na nunina lokpo lo wi ɔ, ɖikɛn e na mie lɛ fe ɖe gan e mɛ mi ɖi nu na Mawu Yesu Kliso ɖo ɔ, emɛ nyɔ mɔ nyi, a lo gbɛ gbe na Mawu. ¹⁸ E e ese etɔnɛ ɔ, ye domɛ fa, e mɔ bɛ gigo yi na Mawu mɔ nɔ lɔ fan: Mawu bayi emɛ go nyi Jwifu lɛ fe kpego mɔ lɛkɔ ɖe ehwɛ lɛ e godo, nɛ lo kpego lo mɔ egbɛ magɔnmagɔn. ¹⁹ Vivɛsise e nɔ dan wa ɖe gan e mɛ e hu Etyɛnu do zɔn emɛ ɖinu na Yesu lɛ gbado. Mɛnɛhlɛn lɛ ɖe emɛ mɔ si kaka lo sɔn Fenisi. Mɛnɛhlɛn lɛ ito e ɖe tɔ cɛncɛn mɛ e mɔ ylɔ ɛ fan Ciplu mɛ. Mɛnɛhlɛn lɛ sɔn ito Antyɔci mɛ, vɔɔ, Jwifu lɛ kɛɖɛ e nɔ jla Mawu e xo lɔ na. ²⁰ Amɔ Ciplunu gɔdo Silɛnu ɖehlɛn lɛ fe ɖe emɛ, gan emɛ e sɔn Antyɔci, e jɛ ewɛnɖagbe mawu etɔn lɔ jla ji na Glɛsinu le fe. ²¹ Mawu e hinhlɔn ɖekpwɛ gɔdoye, emɛ susu mɔ ɖinu mɔ trɔ jɛ Mawu e mɔ ji. ²² Inu enɛ we lɛ jɛ agun Yesu tɔn e ɖe Jeluzalɛmu ɔ, e mɔ ɖo Banabasi lohlan Antyɔci. ²³ Exe e wa mɔ mɔ kɛn Mawu wa ɖagbe na togun lɔ ɖo ɔ, e mɔ mɔ jijwɛ mɔ na okɔnkpinkpa wu emɛ tɛtɛ bi fan nɛ nɔ gbeji na Mawu gɔdo ayixa lokpo. ²⁴ Ɖo Banabasi ɔ, ɖagbewatɔ nɛ, ɖo yɛsinsɛn gɔdo nuɖiɖi jwɔ ayixa mɛ ni-i, e wa nu mɛ susu mɔ jɛ Mawu e mɔ ji. ²⁵ Enɛ e godo ɔ, Banabasi sɔn ito e jlɔ fan Taasi lɔ mɛ, nɛ le kplan Sɔlu. ²⁶ Exe e mɔ ɛ, ekplɛn lo wa Antyɔci. Eyɛ emɛ owe lɛɛ mɔ bayi xwe lokpo kpikpe ɖe agun emɛ e ɖinu na Yesu lɛɛ etɔn e xede xinɛ lɔ mɛ, e mɔ kplan inu wu emɛ susu. Antyɔci xinnɛ lɔ e ylɔ ahwanvi Yesu etɔn lɛ ɖe fan Klisosɛntɔ ɖe owunkɔn. ²⁷ Gan enɛ mɛ ɔ, xoyiɖe Mawusi mɔ lɔ tɔ, lɛɛ lɛ ɖe Jeluzalɛmu mɔ sɔn Antyɔci. ²⁸ Emɛ eylɔ fan Agabusi ɖe emɛ ɔ cite yesinsɛn mɔ yi do ayi mɛ ni-i, e mɔ nɔ lɔ xovɛ gbekpan exe la we tɔn ɖe hlango lɔ tɛtɛ bi ji, xovɛ enɛ lɔ mɔ tɔn ɖe gan exe mɛ xɔlu Klodu la ɖe ga ji do. ²⁹ Gan enɛ mɛ ɔ, ahwanvi lɛ ɖe gbeta tɛn fan, emɛ lokpo-lokpo la na inu e go e kpe ɔ, e mɔ lɔ lohlan nɔvi mitɔn ɖe Klisomɛ exe dɛ Jude lɛɛ, nɛ lo do olɔ wu ye. ³⁰ Eɖo inu e jɔ lɛ lohlan agunnukɔntɔ lɛɛ ɖe Jude zɔn Banabasi gɔdo Sɔlu ji.