¹ Xonugbo ɔ, mi nyɔ fan nɛ kankan mi agbaza éxé nyi mi goxɔ awlangotɔn ɔ, mi ɖo ibu éxé nyi Mawu etɔn éxé gbɛtɔ go bayi é le ɔ, ema nɔ kaka losɔn ɖe sɛxwɛ. ² Kɛn mi ɖe tɛn ɔ , mi nɔ wɛn azɔn, ɖo mi ɖo ojlo gbo fan a mi yi mi agbaza sɛxwɛtɔn ɔ ido. ³ Xonugbo ɔ, nɛ mimɔ tɛn kpego lo yi do ɔ ego na kpego lo mɔ mi ɖe govɛ e. ⁴ Xonugbo nɛ, kaka jɛ ganéxé mɛ mi la ɖe awlangoji e goxɔ enɛmɛ do ɔ, mi la nɔ wɛn ozɔn ɖi agban kpinkpɛn lohwlɛn gun miɖe mɔɖe. Ego wa fan mi nɔ din fan ami tɔn ɖe mi agbaza awlangojitɔn mɛ gonɛ e; vɔɔinu éxé mi nɔ din ɔ eyi enyi fan ami yi agbaza sɛxwɛtɔ yi do, nɛ inu éxé ɖe egbɛ ɔ la yi inu éxé ɖete na iku yi mi. ⁵ Mawu tete eyi emɔ bayi mi na mi lo nyɔ titlɔ etɔnɛkɔha, mɔ na e gbigbɔ wu mi, kewunemɔ yi ɖagbɛ éxé e yi ɖawan na mi lɛ e gan jɛgo lɛ na mi. ⁶ Hun, okɔn kpinkpan e jwɔ ayimɛ na mi gantɛtɛmɛ. Mi nyɔ fan ganxixomɛ exémɛ mi mɔ tɛn kpego mɔ kpoɖe agbaza enɛ mɛ ɔ, mi ɖe ozɔga na tɛnxwe Aklunɔ etɔn. ⁷ Xonugbo ɔ, mi ɖe gbɛ ɔ, inu éxé mi ɖi ɔ, e yi e wanu ; e go wa fan mi mɔ mɔ ɖo okun go nɛ e. ⁸ Okɔn kpinkpan e jwɔ ayimɛ na mi kewun inu éxé e jlo mi kpowun e nyi fan ami lɛ ɖe agbaza éxé mɛ mɔ la nɔ mi osinmɛ ɖe Aklunɔ kɛ. ⁹ Vɔɔ, nɛ mi nɔ agbaza éxé mɛ alo mi lɛɖe mɛ ɔ, inu tantɛn éxé jlo mi ɔ, eyi enyi fan ami jɛ Aklunɔ nukun. ¹⁰ Ɖo mimɛ tɛtɛ ɖo a wa Aklunɔ e owunkɔn emɔ lɔ ehwɛ gɔ mi, nɛ mɛ lokpo lokpwe ni lo mɔ kɛn e wanu ɖo gan éxé mɛ eɖe e agbazamɛ ɔ e ojɔ y; nɛ inu mɛmɛyi emɛlɔ bayi alo inu nyinylan emɛlɔ bayi ɔ, ela mɔ e ojɔ yi. Mawu do ehwɛ gbɔ gɔ mi zɔn Klisu ji. ¹¹ Mi nyɔ inu éxé nyi sisi ɖo na Aklunɔ, mi mɔ nɔ din fan gbɛtɔlɛ ni wa mitɔn ji. Mawu nyɔ mi céɖécéɖé , i mɔ ɖi fanɖe myɛtelɛ ayimɛ ɔ mi nyɔ nyɔfe. ¹² E go wa fan mi na gɔ jɛ miɖe Kafuji ɖe mikɛ gonɛ e; vɔɔ, mi nɔ din nana mɔ wu mi, kewun mi mɔ yi kafu do migo; gan enɛmɛ ɔ, mi la nɔ mɔxosin exé mi la nɔ na emɛ éxé nyi enu ɖe okuntakun lɛ lo yi go ɔ, gbɛ e go yi inu éxé ɖe ayimɛ lɛ lo yigo é. ¹³ Nɛ takunmɛ masɔgbe nɔ mi nyi xonugbo ɔ, Mawu eyɔ mi nyi na. Vɔɔ nɛ i takunmɛ sɔgbe ɔ, myɛlɛ eyi e sɔgbe na. ¹⁴ Wannyinyi Klisu etɔn e ɖu ɖe mi ji ɖo mi ɖo jiɖiɖe fan mɛlokpo gée eku do mi mɛ tɛtɛ e takunmɛ, eyi e nyi fan mɛtɛtɛ ku gɔdi. ¹⁵ Eku do emɛ tɛtɛ e takun nɛ emɛ exé ɖe egbɛ lɛ ɔ nɛ ma gɔ nɔ egbɛ na eyɛ tete lɛ ɖe, vɔ nɛ nɔ egbɛ na emɛ éxé ku do emɛtɛtɛ e takunmɛ, hugan etɔnɛ ɔ ,e mɔ gɔ fɔn ɛn lo wa egbɛ do e takunmɛ. ¹⁶ Enɛ ɔ, bɛɖe tɛn ɔ, mi gɔ yi gbɛtɔ e ayi lo kpɔn mɛti e; nɛ mi mɔ yi gbɛtɔ e ayi lo kpɔn Klisu ɖe isɔɔ, mi gɔ yi enɛ lo kpɔn ɛn tɛn. ¹⁷ Hun, nɛ mɛ lele jɛ kpwɛ gɔ Klisu tlolo ɔ, mɛ lɔ tlɔzun nuɖiɖo yɔyɔ; inu éxé e nyi xoxo ɔ bu kewun yɔɔ ɔ mɔ wa. ¹⁸ Mawu éxé do ehwɛgbɔ gɔ mi zɔn Klisu ji ɔ e dɔn enyi inu enɛ lɛ tɛtɛ; eyi ekɔ idɔ d'asi nami na mi lo dɔn emɛbulɛ lo wa kewun emɔ do ehwɛ gbɔ gɔde. ¹⁹ Ɖo Mawu mɔ nɔwa idɔn zɔ Klisu ji mɔ do ehwɛ gbɔ gɔ gbɛtɔ lɛ tɛtɛ; ego kpɔn do inu nyinylan wiwa etɔn lɛ. Hwɛdogbɔ etɔnlɛgo e. Hwɛdogbɔ e dɔ éxé enɔ wa ɔ, e yi do asi na mi fan na mi jla. ²⁰ Hun, Klisu nugbɛn eyi mi nɔ lɔ xo do, nɛ ela lɔ xonugbo ɔ, Mawu tete e nɔ ylɔ mi zɔn mi ji; mi nɔ ɖe kuku na mi ɖe Klisu e nyikɔ fan mi ɖo ehwegbɔ gɔ Mawu. ²¹ Klisu go hu ehwɛ ti kpɔn gblée ; vɔɔ Mawu ɖiɖa mi ehwɛ gban lɛ, nɛ ikpwɛ éxé mɛ mi ɖe gɔ Klisu ɔ mɛ ɔ, mi mɔ tɛn kpego lo ɖu idɔn éxé mɛ Mawu yi mi lo tlɔzun ehwɛ jijɔnɔ ɖe e owunkɔn e ale.