¹ Na mi lofoe ɔ, nɔvilɛ mi , mi mɔ kplɔn kɛn mi wa zan mi egbɛ ɖo emɔ lo jɛ mawu nukun lɔ wu mi ; vɔ mi mɔ nɔ bayi deji.Inuéxé kpo miwa lɔ nami tɛn we mi nɔ byɔ mi mɔnɔ do kɛn klɛn na mi ɖe Aklunɔ Yesu e nyikɔ fan na mi nɔ zan mi egbɛ nɛ gɔ jɔhun deji hugan wu etɔnɛ. ² Xonugbo ɔ, mi nyi inu éxé Aklunɔ Yesu na egbe mi mi mɔkplɔn mi ɔ. ³ Inu éxé Mawu jlo na mi ɔ éyi enyi fan ami nyi emɛ kinkɔn , ami ma nɔ lɛ aga e. ⁴ Mɛ lokpo lokpo ni nyɔ kɛn wa hɛn e agbaza do kinkɔn gɔ yɛyiji ɖo ɔ. ⁵ Ni ma nɔ jo eɖe do na jlo nyinylan agbazamɛtɔn lɛ ɖikɛn nu maɖitɔ éxé ego nyɔ Mawu lɛ bayi ɖo ha e. ⁶ Mɛti ni ma jɔgɔ ɖe e nɔvi ji , alo ni hlwi ɖe ixo enɛ mɛ e , ɖo Mawu la vi hlɔn inu etɔnɛ lɛ tɛtɛ etɔn , Kɛn mi mɔ mɔ lɔ nami sinsiɛn etɔnɛ tɔn ɖo ɔ. ⁷ Ɖo Mawu go ylɔ mi na mi lo zan egbɛ xwedwi xwedwi e , vɔ, eylɔ mi na mi lo zan egbɛ kinkɔn. ⁸ Hun emɛ éxé hɔn nukplɔmɛ enɛ gblɛ ɔ, ego wa gbɛtɔ e hɔn gblɛ e; vɔ, Mawu éxé na gbigbɔ ɖedovo mi ɔ eyi e hɔn gblɛ. ⁹ E gɔ byɔ fan na wlan nuti loxlan mi do nɔvi ɖe nuɖiɖimɛ é wan mi wa nyi na miɖe lɔ go e; ɖo kɛn myan nyi wan na miɖe ɖe ɔ, Mawu mɔ kplɔn mi. ¹⁰ Wannyinyi enɛ iyɔ mi ɖo na nɔvilɛ zɔn Masedwanito ɔ tɛtɛ mɛ. Nɔvilɛ mi , mi gɔ nɔ byɔmi fan wannyinyi enɛ nɛgɔnɔ jɛji okunkɛngbe okunkɛngbe. Mi do vivɛnu na fifa ninɔnɔ mi cɛncɛn. ¹¹ Mi do vivɛnu mɔ nɔ kpe okun do myɛ tete lɛ enu lɛ go; mi nɔ do vivɛnu mɔ nɔ wadɔn gɔdo myɛ tete lɛ olɔ ɖikɛn mi mɔ lɔ nami ɖo ɔ. ¹² Enɛ emɛ éxé go ɖe ogun Klisutɔn mɛ lɛ le mɔ ɖo sisi nami, gbɛ mi gona nɔ kɔji na mɛti e ¹³ Nɔvilɛ mi, kɛn emɛ éxé mɔ ku exo la we nyido ɔ, mi jlo fan ami we mɔ kunnu dego céɖé céɖé, na mi malo nɔ alwɛmɛ ɖi emɛɖetɔlɛ exe go nɔ ɖokun wu nuti ha e. ¹⁴ Ɖo mi ɖinu fan Yesu ku mɔ gɔ fɔn ; etɔnɛ ke ɔ, mi gɔ ɖinu fan Mawu la fɔn emɛ éxé ɖinu na Yesu feto lo ku lɛ gɔ di. ¹⁵ Xonugbo ɔ, kɛn Aklunɔ xo ɔ lɔ ɖo ɔ eyi we ina lɔ na mi éxé: mi emɛ éxé la kpo ɖegbɛ gan éxé mɛ Aklunɔ lawa do ɔ mi go na jɛ nukɔn na emɛ éxé la ku lɛ e. ¹⁶ Ganlɔ xo ɔ, Aklunɔ tete la jɛte ɖe jihwle emɔ se mɛɖehwlɛn mɔ ɖegbe gɔ abobo emɔse wɛnsagun gbo lokpo e gbe, mɔ we se ɖuɖeji Mawu etɔn e kpɛn gbe ; emɛ éxé ɖinu na Klisu feto loku lɛ mɔ fɔn jɛ nukɔn. ¹⁷ Enɛ e goɖo ɔ, myɛmɛ éxé kpo ɖe gbɛ gan enɛ mɛ lɛ ɔ, Mawu la ze myɛlɛ gɔɖe do kpwɛ losɔn jihwlɛ ɖe kpɛtɛvimɛ, mi mɔla kpe Aklunɔ ɖe jɛhɔn mɛ; enɛ ɔ, mi mɔ nɔ kpwɛ gɔ Aklunɔ gan tɛtɛ mɛ. ¹⁸ Hun, mi mɔ yi xo enɛlɛ lo do gan lanmɛ na miɖe.