¹ Mi go kpego a gɔ nɔte etɔnɛ, mɔ gbɔjwɛ lɔ fan myɛlɛ lokponɔ la nɔ Atɛni , ² mɔ ɖo mi nɔvi Timɔtée éxé gɔ mi nɔ jla ewɛnɖagbɛ éxé lɔ xo do Klisu go ɔ, lo wadɔn na Mawu ɔ lo xlan mi. Mi doe loxlan mi, ni lo we lɔ xo do lili gɔ okɔn kpinkpan go nami ɖe mi nuɖiɖi mɛ; ³ na mi ma jo miɖe do nɛ aya éxé mi nɔ ɖu nɛ hunhun mɛ lokpo ɖe mimɛe ; ɖe myɛtɛlɛ ɔ, mi mɔnyɔ fan aya enɛ éxé mi nɔ ɖu ɔ,tito Mawu etɔn mɛ emɔ ɖe nami. ⁴ Xonugbo ɔ,gan éxé mɛ mi kpo ɖe mi kɛ ɔ mi mɔ lɔ na mi san fan mi la ɖu aya. inu enɛ e nɔ jɔ tɛn; myɛtelɛ ɔ, mi nyɔ ganji. ⁵ Enɛ wutu ɔ, éxé i gɔ kpego a nɔte le ɔ, iɖo Timɔtée loxlan mi nɛlo we kpɔn kɛn mi nuɖiɖi ɖeɖo ɔ, ɖo nɔ hu cicwɔ fan awovi ni ma we tɛn mi kpɔn a mi lo jɛ e mɔ ɖiɖo lɛ mɛ e nɛ idɔ éxé mi wa ɖe mi cɛncɛn ni lo nyi inu vɔvɔ e. ⁶ Vɔ tɛn ɔ, Timɔtée mɔ lɛkɔ ɖe mikɛ lowa mɔ lɔxo mɛmɛyi na mi do mi nuɖiɖi gɔ wannyinyin exé miɖe ɔ go. E lɔ na mi fan mi nɔ flin mi tɛgbɛ gɔdo wannyinyi, mi mɔ gɔ jlo fan nɛ yɛ mɔmi ɖikɛn myɛlɛ fe jlo la mɔ myɔ. ⁷ Mi nɔvilɛ , adan nɔ gbo mi , mi mɔ nɔ se vivɛ etɔnɛ co mi xo éxé mi se ɔ, ena okɔn kpinkpan wu mi. Nuɖiɖi éxé mi ɖo ɔ, eyi é na okɔnkpinkpan mi. ⁸ Tɛn ɔ, nɛ mi ɖolili ɖe kpwɛ ninɔ éxé mi ɖo gɔ Aklunɔ ɔ, hun mi ɖe gbɛ xonugbo. ⁹ Jijwɛ éxé mi mɔ ɖe Mawu e nukɔn do myɛlɛ wutu ɔ, mi go nyɔ kɛn mila do ekpɛ ni do mi takun emɔ jɛmɛ na mi e. ¹⁰ Ozan gɔ kinklo ɔ, mi byɔ sinsiɛn fan a myɛlɛ tetelɛ gɔ mɔ mi, nɛ inu éxé gɔ hwedo mi ɖe mi nuɖiɖimɛ ɔ, mi mɔ yi lo kpe nami. ¹¹ Mawutɔ mitɔn tete gɔdo mi Aklunɔ Yesu ni kplan mi nɛ ami lo kpego we mɔmi ! ¹² Aklunɔ ni bayi na wannyinyiéxé mi ɖo na miɖe mɔ ɖo na gbɛtɔ lɛ tɛtɛ ni nɔ eji jɛtɔn, emɔ ciɖi wannyinyi éxé mi ɖo na mi ɔ ha; ¹³ gan énɛ mɛ ɔ, emɔ do wusiɛn lanmɛ na mi, mi mɔ nyi emɛ kinkɔn, mɔ nyi emɛ éxé go ɖo oblɔ ɖe wutu ɖe mi Mawutɔ é unkɔn, gan éxé mɛ mi Aklunɔ Yesu la wa gɔ emɛ lɛ tɛtɛ ɔ.