¹ Nɔvilɛ mi, myɛtete lɛ nyɔ ganji fan mikɛ éxé mi wa ɔ mi go wa vɔvɔ e; ² mi gɔ ɔ nyɔ fan feto mi wa wa mikɛ ɖe Tɛsaloniki ɔ, mi ɖu aya , e do nya wu mi ɖe Filipu, e tɔn ahwan mi, e mɔ siɛn tete; co Mawu mɔ na okɔn kpinkpan mi fan ami jla eyɛ wɛnɖagbɛ lɔ na mi ; ³ Xonugbo ɔ, ixo éxé mi nɔ lɔ lo ylɔ emɛlɛ ɔ ego xinawan ɖe inu nyinylan ti ji e, ego xinawan ɖe linlin xweɖu xweɖu ti ji e; gbɛ ego xinawan ɖe inu huhlu ti e. ⁴ Miwa lɔɔ, kɛn Mawu jlo ɖo ɔ eyɔ mi lɔxo do ɖe gan tɛtɛ mɛ, ɖo e mɔ fan mi xi ɔ mi la jla wɛnɖagbɛ ɔ , e mɔ yi dasi na mi; gbɛtɔlɛ si gonɛ mi jlo a jɔhun ɖe loo jla wɛnɖagbɛ lɔ e; vɔ Mawu e gbeje linlin éxé ɖe mi ayimɛlɛ kpɔn ɔ si mi nɔ jlo na jɔhun ɖe. ⁵ Mi nyɔ ganji fan mi go lɔ xo lo klɔ emɛ ɖu gble; gbɛ e go wa nuti mi nɔ ɖi ɖe mi si lo jla wɛnɖagbɛ lɔ mi e. ⁶ Mawu tete la ɖeklun na. Mi go wa nuti lo jlo fan mɛti ni kafu mi e, e tan nyi myɛlɛ oo, e tan nyi mɛbulɛ oo, mi go di e. ⁷ Co nɛ mi yi ɔ mi la mɔ lɔ na mi fan inu etɔ jan mi wa bayi dandan ɖo emɛɖoloxlan Klisu etɔn éxé mi nyi ɔ wutu, vɔ mi go bayi do etɔnɛ e. Miwalɔɔ, gan éxé mɛ mi ɖe mikɛ ɔ, mi fa odɔmɛ do migo ɖi ivinɔ éxé nɔ kpe okun do evi go mɔɖe. ⁸ Mi ɖe gbesisɔmɛ ma yi mi egbɛ yina do mi takun mɛ ɖo wan éxé mi ɖe na mi wutu; e go nyi wɛnɖagbɛ Mawutɔn kɛɖɛ gonɛ mi wa jla do mi e, ɖo mi vɛna mi etɔnɛ. ⁹ Nɔvilɛ mi, kɛn mi jɛ tagba mɔ wadɔn ɖo ɖe mi cɛncɛn ɔ, myo flin e nɛ? Mi nɔ jla wɛnɖagbɛ Mawu etɔn do mi; mɔ go wadɔn ɖe ozan gɔ kɛnklo, ɖo mi go jlo na nɔ kɔjimi mɛti e. ¹⁰ Mi la ɖeklun na Mawu fe mɔ ɖeklun na fan egbɛkinkɔn , egbɛjijɔ, egbɛ éxé mɛti go mɔ nuti mɔ lɔ ɖego e le ɔ eyɔ mi zan ɖe mi cɛncɛn. ¹¹ Mi gɔ nyɔ fan kɛn vitɔ hin evi ɖo ɔ, etɔnɛ mi hɛn lokpo lokpo mitɔlɛ ɖo . ¹² Mi nɔ inu kplɔn mi tɔn mɔ gɔ nɔ babale do na mi tɔn; mɔ byɔ mi gɔ okun vinvan fan gbɛzinzan mitɔn ni jɛ Mawu exe ylɔ mi do e kɔsu ɖuɖu gɔdo e susu e okun mɛ. ¹³ Mi go nɔ ekpɛ mado na Mawu do inu éxé lɛ takun e, eyɔ e nyi fa gan éxé mɛ mi jla Mawu xo na mi ɔ , mi se mɔ yi do ayimɛ gbɛ mi go yi loyi gbɛtɔ e xo e; vɔ miyi lo yi Mawuxo, Mawuxo emɔ nyi xonugbo; exé mi yi etɔnɛ ɔ, e nɔwa dɔn ɖe myɛ mɛ éxé ɖinu lɛ ayimɛ. ¹⁴ Nɔvilɛ mi, inu éxé jɔ do ogun éxé ɖe Judée mɔ nyi Mawutɔn ɖe kpwɛ éxé miɖe ɖe Klisu Yesu mɛ lɛ eyi ke jɔdo miɛlɛ fe ji. Aya éxé Jwifu lɛ do nɛ ɖe xinɛ lokpo lɔke mi tomɛtɔ lɛ fe do na miɛlɛ fe. ¹⁵ Jwifu lɛ e hu Aklunɔ Yesu mɔ gɔ hu ixoyimɔlɔtɔ Mawu etɔn lɛ mɔ yan mi. E do xomɛsin na Mawu , mɔ nyi kɛntɔ gbɛtɔlɛ tɛtɛ etɔn . ¹⁶ E do vivɛnu mɔ jlo wa glɔn mɔ nami, na mi lo kpego mɔ jla ewɛnɖagbɛ éxé zɔn na emɛ éxé go wa Jwifu lɛ nɛ ma lo mɔ hwɛngan e. Inu enɛ éxé ebayi ɔ, exwɛ eni elo hu , lo su takun na exwɛ éxé emɔ nɔ hu san lɛ. Xomɛsin Mawutɔn mɔ we kɔndo eji eloko. ¹⁷ Nɔvilɛ mi, inu éxé kan miɛlɛ ɔ enyi fan ɖe gan éxé mɛ mi mɔ lɛ ɖe mikɛ ɖe ganxixo yɔywɛ ɖehwlɛn mɛ ɔ, ejlomi tete fan na mi gɔ mɔ mi. Eyi ena mi gɔ lo vɔ vivɛnu do deji ma lo tɛnwu lo kpego ; mi gɔ ɖekpwɛ gɔ mi ɖe agbazamɛ e vɔ mi ayi ɖe mi ji. ¹⁸ Mi mɔ jlo a gɔ lo wa mikɛ ɖe taji ɔ inyɔ Pɔlu ɔ jɔnɛmule imɔ tɛnkpɔn alo wa mikɛ, vɔ satan esu emɔ do mi. ¹⁹ Xonugbo ɔ, mi okun gɔ ɖe mɛtiji zɛ miɛlɛ lokponɔ gɔ e. Miɛlɛ ji mi okun ɖe, miɛlɛ e wa mi jijwɛ, mɔwa mi ɖuɖeji e jesido exé wutu mi lo tɔfɔ awan ɖe mi Aklunɔ Yesu e nukɔn ɖe gan éxé mɛ e la lɛkɔ lo wa ɔ. ²⁰ Xonugbo nɛ myɛlɛ ewa mi susu mɔ nyi mi jijwɛ.