1 Xun nɔvilɛ mi, gan éxé mɛ inu enɛlɛ ajɔ do ɔ oo gɔ byɔ fan nɛ wlan inu lele dego loxlan mi e. 2 Ɖo myɛlɛ tete la mɔ nyɔ ganji fan Aklunɔ e azan la we fyan mɛ ɖikɛn ajotɔ we fyan emɛ ɖe zanmɛ ɖo mɔɖe. 3 Gan éxé mɛ gbɛtɔ lɛ la lɔ fan vivo ɖée mi gbɔjwɛ do ɔ, gan énɛmɛ inu éxé la viva e okun ɔ la jɛ eji tantan lokpo ɖi nyɔsi éxé ɖe oxo ivinu mɔ jɛ eji tantan lokpo mɔɖe; e go na gan ɖemɛ e. 4 Vɔɔ un nɔvi lɛ, myɛlɛ ɔ mi go ɖe zinvlumɛ nɛ azan enɛ ni we fyan mi ɖi ajotɔ ha mɔɖée. 5 Xonugbo ɔ, kinklɛn etɔn myɛmɛ tɛtɛ nyi mɔnyi kɛnklo etɔn; mi go wa izan etɔn é gbɛ mi go nyi zinvlu etɔn é. 6 Nɛ enyi etɔnɛ ɔ, mi go ɖo wa dɔwlɔn ɖi mɛɖetɔ lɛ mɔɖée, vɔ mi ɖo wa nɔ unkle , mi ayi ni nɔte. 7 Ɖo emɛ éxé dɔ owlɔn lɛ ɔ ozanmɛ e odɔwlɔn, emɛ éxé nu ahannu lɛ ɔ, zanmɛ enu ahanmu. 8 Vɔɔ, myɛlɛ ɔ, kɛnklo etɔn mi nyi mi ayi mɔ ɖo a nɔte. Nuɖiɖi gɔdo wannyinyi ni nyi oganwu na mi yi do. Hwlɛngan éxé mi nɔ ɖokun ɔ ni nyi gangba ami ze cɔn. 9 Xonugbo ɔ, Mawu e tito go nyi fan ni yi e xomɛsin lo wanu gɔdo mi e; vɔ e tito enyi fan ni hwlɛn migan lo zɔn mi Aklunɔ Yesu Klisu ji. 10 Ɖo Yesu Klisu ku do mi takun, nɛ mi kpoɖe gbɛ oo, nɛ mi ku oo, mi la nɔ egbɛ gɔɖi. 11 Hun mi do ayi odɔmɛ na miɖe, mɔ do wusiɛn lanmɛ na miɖe ɖikɛn mi mɔ bayi ɖo ɔ. 12 Nɔvilɛ, mi nɔ byɔ mi fan na mi nɔ ɖo sisi na emɛ éxé Aklunɔ Mawu yi emɔ nɔ wadɔn ɖe mi cɛncɛn lɛ, emɛ éxé Aklunɔ yi dɔ yi do asi na e mɔ nɔ xlɛ mɔ mi lɛ, mɔ nɔ kplɔ mi lɛ ɔ. 13 Mi nɔ wli yɛyi nɛ ganji mi mɔ nyiwan nɛ tawun ɖo idɔn éxé e nɔ wa lɔ wutu. Mi nɔ ɖo odɔmɛ fifa do miɖe go . 14 Nɔvilɛ, mi gɔ nɔ byɔ mi fan ami nɔ kɛ xo na emɛ exe wa ɖiɖɔ lɛ; mi nɔ na okɔn kpinkpan emɛ éxé go haya ɖe emɛmɛ lɛ le ɔ, mi nɔ dolɔ emɛ éxé go ɖo hinhlɔn lɛ le ɔ; mi mɔ nɔ ɖo suwulu do enɛ tɛtɛ go. 15 Mi cɔ miɖe , nɛ ewa inu nyinylan na mɛlele ɔ ni ma yi nyinylan lo su nyinylan xɔ e; vɔ, mi hlɔn ami nɔ wa ɖagbɛ na miɖée gan tɛtɛ mɛ; mi mɔnɔ bayi na gbɛtɔ lɛ tɛtɛ. 16 Mi nɔ jɔji gantɛtɛmɛ. 17 Mi nɔ xoɖɛ gantɛtɛmɛ. 18 Mi nɔ do ekpɛ na Mawu ɖe inu tɛtɛmɛ; ɖo inu éxé Mawu nɔ ɖi ɖe mi egbɛzan tɛtɛmɛ ɖe kpwɛ exé mi ɖe ɖe Klisu Yesu mɛ wenɛ. 19 Mi ma glɔnmɔ na gbigbɔ ɖedovo edɔn é. 20 Mi ma gbɛ wan na ewɛn éxé Mawu yi do ayimɛ na fan ni do nami ɔ e. 21 Vɔɔ mi dindo na inu tɛtɛ céɖé céɖé , mi mɔ hɛn éxé jɔhun lɛ do ayimɛ. 22 Mi nɔ cɔ miɖe do inu nyinylan olɔkpa olɔkpa lɛ tɛtɛ go. 23 Mawu éxé na fifa emɛɔ ni bayi na mi nyi etɔn kplégéɖé, ni cɔ myɛlɛ tetelɛ tɛtɛ, ni cɔ mi kpɔli mɔ cɔ mi kla gɔdo mi agbaza, nɛ oblɔ ti ni ma nɔ mi go e, na gbe éxé gbe Aklunɔ mitɔn Yesu Klisu la wa ɔ ! 24 Ɖo emɛ éxé ylɔ mi ɔ ɖe gbeji , eyɔ e wa wa idɔn enɛ ɖe mi egbɛzan mɛ. 25 Nɔvilɛ mi, mi nɔ xo eɖɛ na myɛlɛ fe. 26 Miki nɔvi nɔvi e si na nɔvi lɛtɛtɛ mɔ lo dogbe nɛ. 27 Ɖe Aklunɔ e nyikɔ mɛ ɔ, nɔbyɔ ɖe mi si fan na mi kɛnklɛn mɔ xlɛ xoma éxé na nɔvi lɛ tɛtɛ. 28 Majɛna Aklunɔ mitɔn Yesu Klisu etɔn ni nɔ kpwɛ gɔdo mi !