¹ Mi kpɔn kɛn itɔ lɔ nyi wan nami ɖo , enyi wan nami kaka mɔ lɔ fan nɛylɔ mi fan Mawuvi, evi mi mɔ nyi xonugbo. Exé egbɛ lɔ go nyɔ Mawu leɔ wutu e go nyɔ myɛlɛ fée. ² Un emɛ vivɛ lɛ Mawuvi eyi mi nyi, vɔɔ, e go ɖe inu éxé mi la we nyi lɔ xlɛ céké cékée ; vɔɔ inu éxé mi nyɔ kpoun ɔ eyi e nyi fan gan exe mɛ Klisu la we lɛkɔ lo we wa ɔ, mi la ci ɖi e yɔ tete ha. Ɖo mila mwɛn kɛn eyɔ tete ɖeɖo ɔ. ³ Mɛlele ɖo okunɖiɖo enɛ de Klisu mɛ ɔ, enɔ jla eɖe ɖo ɖikɛnji KLISU tete nyi kinkɔn ha. ⁴ Emɛ lele kpokpwe éxé hu ehwɛ ɔ, Mawu esɛn enɔ gba, ɖo ehwɛ huhu ɔ, Mawu sɛn gbagba nɛ. ⁵ Mi mɔ nyɔn fan Klisu wa ma ɖe ehwɛ lɛ sɛ gbɛ ehwɛ ti go ɖe ayimɛ ni e. ⁶ Enɛ ɔ, emɛ lele kpokpwe exé ɖe Yesu Klisu mɛ ɔ, emɛ enɛ gɔ hu ehwɛ e, emɛ éxé nɔ ehwɛ hutɔn go myɛn e gbɛ ego nyɔɛn e. ⁷ Un vikpɛlɛ mi, mi ma lwɔn na mɛti nɛ klwɛɖu e emɛ exé wa jijɔ ehwɛ jijɔnɔ enyi , ɖikɛn Klisu nyi ehwɛjijɔnɔ ha. ⁸ Emɛ éxé nɔ ehwɛ hutɔn lɛ ɔ awovi etɔn enyi. Ɖo awovi mɔ nɔ hu ehwɛ sɔn do. Mawuvi lɔ mɔ wa ma gunkun na awovi enu wiwa lɛ. ⁹ Mɛlele kpokpwe nyi Mawuvi ɔ emɛ lɔ gɔ hu ehwɛ; ɖo egbɛ Mawu etɔn ɖe emɛ enɛ mɛ. Exé Mawu nyi tɔ ni ɔ ego kpego agɔ ɖe ehwɛ hutɔn e. ¹⁰ Emɛ éxé nyi Mawuvilɛ gɔ emɛ éxé nyi awovivi lɛ , inu éxé na elo nyɔ iɖe ɖe ɖemɛ we: emɛ éxé go wanu jijɔ lele kpokpwe le ɔ go nyi Mawuvi e; emɛlele kpokpwe éxé go nyiwan na enɔvi le ɔ go wa Mawuvi e. ¹¹ Xonugbo ɔ, ixo éxé mi se ɖe gan exe mɛ mi ɖinu na Klisu ɔ, eyɔ enyi fan mi ɖowa nyi wan na miɖe. ¹² Migo ɖo wa ci ɖi Kanyɛɛn mɔɖée ; ɖo emɛ nyinylan etɔn eyɔ mɔ nyi mɔ hu enɔvi; amu wutu e lo hu enɔvi ? Inu éxé wutu elo wu e nɔvi eyɔ enyi fan inu éxé eyɔ kanyɛɛn bayi lɛ go sɔgbe e , inu exe enɔvi bayi lɛ mɔ sɔgbe. ¹³ Eɖe etɔnɛ ɔ, nɔvilɛ mi nɛ emɛ éxé nyi egbɛ éxé etɔn lɛ gbɛ wannami ɔ ni ma ɔ hun ni ma kpaca wu mi e. ¹⁴ Mi nyɔ fan mi lɛ ɖe ku mɔ wa gbɛ; mi nyɔ etɔnɛ, ɖo mi nyiwan na mi nɔvilɛ. Emɛ éxé go nyiwanna emɛ le ɔ ekpoɖe ku. ¹⁵ Emɛ lele kpokpwe exé gbɛwan na enɔvi ɔ, emɛhutɔ enyi; mi mɔ nyɔ fan ehwɛhutɔ ti go ɖo egbɛ magɔn magɔn e. ¹⁶ Kɛn mi nyɔ inu éxé nyi wannyinyi ɖo ɔ we : Klisu yi e gbɛ yi na do mi takun. Hun, myɛlɛ fe ɖowa yi mi egbɛ lɛ fe yina do nɔvi lɛ takun. ¹⁷ Nɛ mɛlele jɛ dɔkun mɔ mɔ fan inu dehwlɛn hudo eyɛnɔvi mɔnɔ siɛn okun di ; amu wannyinyi Mawu etɔn la tɛn kpego mɔ nɔ emɛ enɛ e ayimɛɖo ? ¹⁸ Un vikpɛlɛ, mi ma nɔ nyiwan na emɛ ɖe nugbɛn gɔ ixo vivi kɛɖɛ kpowun mɛ e ; wannyinyi tete éxé ɖe ede xlɛ zɔn idɔnwiwa lɛ gɔdo xonugbo mɛ eyɔ mi wa ɖo na miɖe. ¹⁹ Kɛn mi la nyɔ fan mi nyi xonugbo etɔn ɖo ɔ wenɛ, kɛn mi ayi la ɖo kandeji ɖe Mawu o unkɔn ɖo ɔ wenɛn ; ²⁰ Nɛ mi ayi tan nɔ do hwɛ wu mi ɔ, ami nyɔ fan Mawu hugan wu mi ayi. ²¹ Un emɛ vivɛlɛ mi, nɛ mi ayi gɔ nɔ dohwɛ do mi ele ɔ, mi ɖo kanɖeji kpikpe ɖe Mawu e unkɔn. ²² Nu lele kpokpwe éxé mi byɛ ɔ, mi la mɔ yi ɖesi, ɖo mi nyi e sɛn lɛ, mi mɔ wa inu exé jɛ enukun lɛ. ²³ Inu éxé Mawu nɔzɔn mi ɔ eyɔ enyi fan ami ɖinu na evi Yesu Klisu ɔ e nyikɔ, mi mɔ nyi wan na miɖe ɖikɛn Klisu zɔn mi ɖo mɔɖe. ²⁴ Emɛ éxé nyɛn Mawu sɛn lɛ ɔ, emɛ lɔ ɖe Mawu mɛ Mawu mɔ ɖe eyɔ fe mɛ. Mi nyɔ fan Mawu ɖe mimɛ lo zɔn gbigbɔ kinkɔn exe ena mi ɔ ji.