¹ Un vikpɛ lɛɛ mi, nɔ wlan inu éxé loxlan mi, na mi ma lo hu ehwɛ e. Nɛ mɛlele hu ehwɛ ɔ, miɖo xolɔ do emɛnugbɛntɔ lokpo ɖee tɔɔkɛ. Eyi enyi Yesu Klisu hwɛjijɔnɔ ɔ́. ² Ényɔ eyi é́ɖe lo savɔ. Nɛ Mawu ni lo yi mi ehwɛ lɛɛ ikɛ mi. Ego nyi mi ehwɛ lɛ kɛɖɛ Mawu wa yi kɛ mi e; e la gɔ yi gbɛtɔ lɛɛ tɛtɛ ehwɛ ikɛ. ³ Enyi mi nɔ nyi esɛn lɛɛ ɔ́, mi yi ɔ, mi la ɖeji fan eyɛ nyɔ ɛn. ⁴ Nɛ mɛlele lɔ fan eyɛ nyɔ wɛ mɔgbɛ esɛn nyinyi ɔ, hun awoɖutɔ nɛ. Gbɛ xojɔxo go ɖe emɛ enɛ mɛ e. ⁵ Vɔɔ, emɛ éxé se otonu na e xo lɛɛ ɔ, emɛ enɛ ɖo wannyinyi titewungbe nu tɛtɛ mɔ gɔ nyɔ ɖego. Eyi minɛ ɔ, mila nyɔ fan miɖe kpwɛ gɔdo Yesu Klisu ɔ we: ⁶ Emɛ éxé lɔ fan eyɛ ɖe kpwɛ gɔdi ɔ eɖo a zan egbɛ ɖikɛn eyɔ tete zan egbɛ ɖo ɔ. ⁷ Xun emɛ vivɛ lɛɛ mi, esɛn yɔyɔ bu gonɛ lo wlan loxlan mie, esɛn xoxo éxé mimɔ do ɖe gan éxé mɛ mimɔ ɖo kinkan do Klisu ji ɔ nɛ. Esɛn xoxo enɛ ɔ, ixo éxé mi se ɔ nɛ. ⁸ Eɖe etɔnɛ co, esɛn yɔyɔ enyi, eyi nɔ wlan loxlan mi, eyi xojɔxo esɛn enɛ etɔn ɔ, e ɖe eɖe xlɛ ɖe Klisu mɛ, mɔɖe eɖe xlɛ ɖe miɛlɛɛ fe mɛ, ɖo zinvlu ɔ mɔnɔ sɔn, eyi kinklɛn tete mɔnɔ tɔn. ⁹ Emɛ éxé fan eyɛ nɔ zan egbɛ ɖe kinkɔn mɛ, vɔɔ mɔ gbɛ wan na enɔvi ɔ, egbɛ kpo nɔ zan egbɛ ɖe zinvlumɛ. ¹⁰ Emɛ éxé nyi wan na e nɔvi ɔ nɔ kinkɔn mɛ; enɛ ɔ, nuti goɖe ego wa dɔn mɛbu do ehwɛ mɛ e. ¹¹ Emɛ éxé gbɛ wan na enɔvi ɖe zinvlumɛ; enɔ zɔn zɔnlin ɖe zinvlumɛ, ego nyɔn xie e nɔ sɔn e, ɖo zinvlu lɔ ɔ́ ewanu ego nɔ mɔnu e. ¹² Un vikpɛ lɛɛ mi, nɔ wlan xoma loxlan mi, ɖo Mawu eyi mi ehwɛ lɛɛ ikɛ mi ɖe Yesu Klisu e nyikɔ mɛ. ¹³ Vitɔ lɛɛ mi, nɔ wlan xoma éxé loxlan mi, ɖo mi nyɔ emɛ éxé mɔɖe ɖe bibɛmɛ ɔ. Emɛ winwinnya lɛɛ mi, nɔ wlan xoma éxé loxlan mi ɖomimɔ ɖu ɖe emɛ nyinylan ji. ¹⁴ Un vikpɛ lɛɛ mi, nɔ wlan xoma éxé loxlan mi nyɔ itɔlɔ. Vitɔ lɛɛ mi, nɔ wlan xoma éxé loxlan mi ɖo mimɔ nyɔ emɛ exé mɔɖe ɖe bibɛmɛ ɔ. Emɛ winwinnya lɛɛ mi, nɔ wlan xoma éxé loxlan mi ɖo igan Mawuxo etɔn ɖe ayimɛ na mi, mimɔ ɖu ɖe emɛ nyinyla ji. ¹⁵ Mima nyi wan na egbɛ lɔ e, gbɛ mima nyi wan na enu éxé nyi egbɛ lɔ mɛ tɔn lɛ tiie. Nɛ emɛ lele nyi wan na egbɛ lɔ ɔ, ego ɖo wannyinyi na itɔlɔ e. ¹⁶ Ɖo inu éxé nyi egbɛ lɔ etɔn lɛ tii go lɛ ɖe itɔlɔ kɛ e. Gbɛtɔ ojlo nyinylan lɛɛ, okun ɖe emɛ agban mɛ , gɔ ogo yiyi éxé dɔkun jijɛ zɔn emɛ ɔ, tii go lɛ ɖe itɔlɔ kɛ e; gbɛmɛ xie e nu wiwa lɛɛ nɛ́. ¹⁷ Egbɛ éxé ɔ, nya enɔ nya, nya ke emɛ éxé nɔ bayi ojlo egbɛ lɔ etɔn lɛ fe nɔ nya; emɛ éxé mɔ wa ojlo egbɛ lɔ mɛtɔn lɛɛ ɔ enɔ gbɛ kaka losɔn. ¹⁸ Un vilɛɛ mi, ogan godo godo tɔn mɛ miɖe: vɔɔ mi mɔse fan kɛntɔ Klisu tɔn la we wa; vɔɔ tin ɔ kintɔ susu mɔ wa. Eyi ewanu miwa lo nyɔ fan ogan godo godo tɔn mɛ we mi ɖe. ¹⁹ Emɛ enɛ lɛɛ lɛɖe mimɛ, ɖo ego mɔ nyi mi emɛti san e; nɛ emɔ nyi mi emɛ san nɛ ɔ ela mɔ ɖe mimɛ; emɔ lɛ ɖe mimɛ, nɛ lo mɔ kunnu jɛ emɛ ceɖe ceɖe fan eyɛ mɛtii gomɔ nyi mi emɛ san e. ²⁰ Miɛlɛ ɔ Klisu kɔn gbigbɔ ɖedovo do miji; eyi e wanu mi mɛ tɛtɛ lo nyɔ xojɔxo lɔ. ²¹ Ego wa fan mi dɛn xojɔxo lɔ ewanu loo wlan inu éxé loxlan mie. Minyɔ inu éxé enyi xojɔxo lɔ. Mɔgɔ nyɔ fan xosu tii go tɔn ɖe xojɔxo lɔ mɛ e. ²² Emɛ emɔnɔ nyi xosuɖutɔ ɔ ? Emɛ éxé fan Yesu go nyi Klisu elé ɔ eyɔ nɛ; emɛ enɛ eyi enyi Klisu e kɛntɔ ɔ egbɛtɔɔ gɔdo vi ɔ: ²³ Xojɔxo ɔ, emɛ éxé egbɛ viɔ egbɛ tɔɔ. Emɛ éxé eyigbe fan Yesu nyi Mawuvi ɔ, emɛ enɛ ɔ ́ ɖe kpwɛmɛ gɔdo Mawu tɔɔ lɔ fe. ²⁴ Mi hɛn ixo éxé mi se ɖe gan éxé mɛ mi ɖo kandeji na Klisu ɔ do mi ayimɛ. Nɛ ixo éxé mi se ɖe gan éxé mɛ mi ɖo kandeji na Klisu ɔ ɖe mi ayimɛ ɔ, miɛlɛ fe ɖe itɔ gɔ ivi lɔ mɛ. ²⁵ Inu éxé egbe Klisu ɖo na mi ɔ, eyi enyi egbɛ magɔn magɔn. ²⁶ Nɔ wlan inu éxé lɛɛ loxlan mi lo lɔ ixo do emɛ wa flu mi lɛ go. ²⁷ Miɛlɛ ɔ, gbigbɔ Ɖedovo éxé Klisu kɔndo miji ɔ eɖe miji. Hun byɔ fan emɛlɛɛ nigɔ kplɔn inu mie. Vɔɔ éxé Gbigbɔ Ɖedovo lɔ kplɔn nu tɛtɛ miɔ, inu éxé emɔ kplɔn mi lɛɛ mɔ nyi xojɔxogbɛ ego nyi xosu elé ɔ, emɛ tɛtɛ ni sé otonu na kplɔn éxé ena milɛɛ, ɖo kpwɛ éxé miɖe gɔ Yesu ɔ mɛ. ²⁸ Tɛn ɔ, un vilɛɛ mi, minɔ kpwɛ gɔ Yesu Klisu, na gan éxé mɛ ewa ɖe éɖé xlɛ ɔ, mimɔ ɖo nugo kpikpe ganji; gan éxé mɛ éwa lɛkɔ wa ɔ, inya nima wami ɖe e kunmɛ e. ²⁹ Exé mi nyɔ fan inu jijɔ eyi Klisu bayi ɔ, mimɔ nyɔ fan mɛlélé kpékpé éwa inu jijɔ ɔ, Klisu etɔn emɛ enɛ nyi.