¹ Un nɔvi lɛɛ mi, inu exe jɔdo mi tɔgbo exe xwedo Mɔyizi lɛɛ ji ji ɔ, i jlo fan a mi flin ɛyɛ mɛtɛtɛ e nɔ kpɛtɛ zuvui lɔ gun, emɛtɛtɛ exe zɔn xu fɛfɛyi lɔ e cɛncɛn mɛ nyan, ² eyɛ mɛ tɛtɛ bi e do Mawu e sin takun ɖe kpɛtɛ zuvui gɔ ixu lɔ mɛ, Mawusin lilɛ enɛ ɔ, dɔn-ɛn ɖo kpɔ-ɛ gɔ Mɔyizi, ³ eyɛ mɛtɛtɛ e ɖu gbigbɔ mɛ nu lɔ ɖo kpwɛ, ⁴ mɔ gɔ nu gbigbɔ mɛ e sin lokpo lɔ. E mɔ, e mɔ gɔ mu gbigbɔ e oso exe e mɔ kplɛn ɔ kɔn, oso enɛ ɔ, Klisu nɛ. ⁵ E ɖe etɔnɛ co, emɛ susu ɖe emɛ, nu wiwa etɔn go jɛ Mawu nukun e, enɛ zɔn e mɔ ku ɖe gbetotromɛ. ⁶ Kpɔɖee go ewa inu e jɛ enɛ ɔ nyi na mi, na mie lɛ fe na mi ma we ɖo ojlo nyinylan ɖi kɛn eyɛ lɛ fe ha e. ⁷ Mi go kpego wa jɛ yɛhwe sɛn ji ɖikɛn meɖehlɛn lɛ bayi ɖe emɛ ha e. Kɛn Mawu wema lɔ ɖo ɔ, mɛlɛɛ hxi na hwan. ⁸ Enɛ godo ɔ, e cite mɔ lele. Mi go kpego wa jo miɖe ɖo na oga lilɛ ɖikɛn mɛɖehlɛn lɛɛ bayi ɖe emɛ gbɛtɔ ɖo nu nɛ mu mɔ ku ɖe okun kinkɛ, lokpomɛ e. ⁹ Mi ɖo la tɛn Mawu kpɔn e, ɖikɛn mɛ ɖetɔ lɛ bayi ɖe e mɛ na idan lo ɖwi elo ku ha e. ¹⁰ Mi go kpego wa trɔnu ɖikɛn mɛ ɖetɔ lɛɛ bayi na wɛnsagun exe hu emɛ lowe hu e ha e. ¹¹ Nu nyinyla enɛ lɛ jɔ do eji nɛ lo nyi kpɔn ɖe go na mɛ b u lɛɛ, exe wlan inu exe jɔ enɛ lɛ, la lo kplɔn nu hu ɛmɛ ɖe gan exe mɛ miɖe tɛn ɔ. Ganmɛ lɛɛ e vivo mɔ sɛkpɔ. ¹² Emɛ exe go wa Yesusɛntɔ lɛɛ le o, inyɔ gonɛ da dwe hwɛ nɛ e, ¹³ Mawu e da dwe e hwɛ nɛ. Vɔ mi hɛn ɔ mi o kpego a dwe ehwɛ na mi ogunvi lɛɛ, vɔ kɛn Mawuxo wema lɔ lɔ ɖo ɔ, e fan a mi ɖe emɛ nyinyla lɔ sɛ ɖe mi cɛncɛn mɛ. ¹⁴ E yɔ e wa nu, nɔvi vivɛ lɛ, mi si na yɛhwe sinsɛn. ¹⁵ I ɖi fan gbɛtɔ nunyɔntɔ lɛ nɔ lɔ xo na; mi ɛ te lɛ, mi jlo inu exe nɔ lɔ na mi lɔ kpɔn. ¹⁶ Dona e kɔfo exe mi nɔ nu do kpwɛ lɔ, e go wa lo zɔn Jesu Klisu e kancica exe e bayi na mi zɔn e ehun exe kɔn ɖawan do mi takun mɛ go nɛ? Kpɔnnɔ exe mi nɔ ma ɖu lɔ, e go wa agbaza Yesutɔn exe e lo bayi okancica mɔ yi jo do mi takun mɛ lɔ go nɛ? ¹⁷ Exe e wa fan kpɔnnɔ lokpo gee e ɖe ɔ, hun mi e lɛ exe nyi mi me susu ɔ mi trɔ zun lokpo lozɔn agbaza Klisutɔn lɔ mɛ; ɖo kpɔnnɔ lokpo lɔ mi nɔ ma ɖu. ¹⁸ Mi kpɔn Izrayɛli vikpɛ lɛ ɖe agbaza mɛ: Emɛ exe du nuɖuɖu exe e lo sanvɔ lɛ ɔ, e go wa mawu exe e sanvɔ lɔ na gɔde e ɖe kancica lokpo lɔ mɛ? ¹⁹ Amu nɔ lɔ tɛn? Nɔ lɔ fan inu exe e lo sanvɔ na yehwe ɔ go nyi inu ti le, etɔnɛ ke yehwe tete fe go nyi nu lele? E e wo. ²⁰ Nɔ lɔ fa inu exe e lo sanvɔ na yɛhwe ɔ, gbigbɔ mawe lɛ e yi e lo sanvɔ na, e go wa Mawu e; gbɛ go nɔ din fan na mi nɔ kancica gɔdo gbigbɔ mawe lɛ e. ²¹ Mi go kpego la nɔ nu Mawu e sin, mɔ nu gbigbɔ nylakan lɛ fe tɔn e; e go nyɔn fan mi la nɔ ɖu inu gɔ Mawu, mɔ gɔ ɖu gɔdo gbigbɔ nlakan lɛ fe e. ²² Mi nɔ din la dɔn ɛwuhwinhwan Mawutɔn do mi ji nɛ? Mi ɖo hinhlɔn hugan hu Mawu nɛ? ²³ E na gbe na nutɛtɛ bi, amɔ ego wa tɛtɛ bi e yi e wa bayi; e yi gbe na nu tɛtɛ bi, amɔ e go wa tɛtɛ e wa ɖagbe na gbɛtɔ e. ²⁴ Mɛ lele ni ma din eyɔ tete e ale e, vɔ na mɛ lokp-lokpo ɔ ni din ale e wegɔ tɔn. ²⁵ Mi ɖu inu exe e sa ɖe oxi mɛ lɛ, mi ayixa ni ma xo evun gɔ mi e do onu enɛ lɛ wu e, ²⁶ ɖo kɛn Mawuxo wema lɔ lɔ ɖo we: "Aklunɔ tɔn eyɔ e wa egbɛ lɔ gɔdo inu exe ɖe mɛ lɛ tɛtɛ bi." ²⁷ E nyi fan emɛ exe go nyi xɔsetɔ ylɔ mi do inuɖuɖu kɔn, mi mɔ yi gbe mɔ sɔn ɔ, mi ɖu inu exe exwle mi lɛ tetɛ bi; ayixa mitɔn ni ma xo nu kpɔ kaka mi mɔ we jɛ ixo kanse wu miɛ te le ji e. ²⁸ Vɔ nɛ mɛ lele lɔ na mi fan: Inu exe lɔ ovɔ e yi e lo san na yehwe ɔ, mi ma ɖu e, do emɛ exe we lɔ na mi lɔ wutu, gɔdo inu exe mi ayixa la nɔ flin na mi. ²⁹ E go wa miɛ te lɛ e ayixa xo gonɛ nɔ lɔ e, vɔ emɛ exe we lɔ na mi lɔ etɔn nɛ. Amu tu na un kantuntun la lo lɛ zɔn emɛ bu e ayixa ji? ³⁰ E nyi fan nɔɖunu gɔdo ekpɛ dido ɔ, amutu la lo ɖu aglanmɛ inu exe go nɔ dekpɛ na tɔn e? ³¹ Inu lele kpokpwe exe mi la ɖu, exe mi wa nu, inu lele kpokpwe exe mi wa wa ɔ, mi bayi tɛtɛ bi lo do ekpɛ na Mawu. ³² Mi ma bayi nuxe la nyi ofɔklɛn na Jwifu lɛ, alo emɛ exe go wa Jwifu lɛ le ɔ, alo ogun Mawu etɔn ti e. ³³ Mi nɔ bayi nu ɖi kɛn nyɔ ha, i do vivɛ nu mɔ jɔhun ɖe mɛ tɛtɛ kɛ, ɖe nu tɛtɛ mɛ, go din unɖe e mɛ mɛ yi e, vɔ, mɛ tɛtɛ e mɛmɛ yi i din, nɛ Mawu ni lo hwlɛn un gan.