¹ Me ya ntee mpe ya muene mwana umeme ensuiri ongia lama le Sinaï. Yande bake manfunu nkama ya makumanu eke ani elimi ekunu nde mpe eke eni kumu etara a nde bankomi mu bosu bo nde. ² Me eyu munguamba ya tuiu kuyu eke anka munguamba we kuku enu nzia enen mpe ya bipara be nfunu. Munguamba eso eyume afani anka bara ba bibiri mipara to manvi anvi. ³ Bo bata bisiama bi biyana anku ekiri ki bo nfunu mpe anku bara ba nâa ba bake ba mue mpe ya ba nunu. Angia ngoe manfunu nkama ya kuni bana ma bara bo basuini mu mukiri, muru mumo we weyiabi ata esiama eso. ⁴ Mukara bôo mumo we we ake ya mbini mpe ya bakara, kuobu bôo nduru ebo ebe we muta bibuli. Kuobu bôo ba ninami mwana imene munzi aliuliuri nde ndobu bo basuimi mu mukiri nsini kuobu bo bake bana ba Mfumu Nziame mpe ya mwana imeme. ⁵ Pia mo eke we mukara mungua me bôo; mukara bôo mambi make we. ⁶ Me ya muene ntumu e Nziame ya pumu ayu, nde ake ya nsia engalama mpe nsia ye mbue omsamu a la bo baso bake mumukiri, mpe ya bara ba mala momaso, binua nsini, makana momaso, mpe ya minua momaso mpe ya bara bobaso. ⁷ Nde ya ngemi okara ngie mpe yalie kobo : "Libara Nziame mpe limutuono mpe lika ya likunu, kuobu mu ntôo ya nsiri mufunu me bara ya yito. Lisamu a la nde, nde wekiriyu, ya mana, ya manzia enene mpe ya mue ba ke bake." ⁸ Ntumu Nziame mukumi; we yue entumu e Nziame e yamoma mpe lie :"Ya loe, ya loe, mpe Babylone bula bu bunene ya bunsiamu mu mukiri nsini bangua ma lituku kuobu bata bibuli ongoe ema." ⁹ Ntumu e nZiame we turu ba ya mu luono mpe ya lie mando ma mutini esowu : "Kirebu muru fu sama a la niama mpe ya ilimi mpe bamosi ilimi mubusu bonde tôo mukuo lende, ¹⁰ Nde anua mâa ma lituku ma nkene ma Nziame; mâ li tuku bayulu mpe ma ba ba nviu we mukara kobo mando nkene onde. Webu anvinu we ya madia muru eso amono mpari omba mpe yu limba li mususomo o miu nende nde amono mpari anku bantumu ba Nziame mpe anku emwana imeme. ¹¹ Miyu memba mi oli onde menama nsu lo leso mpe mensu we mpe be wumu omui mpe ya pibi bo basama niama ya ilimi inde mpe bo baso babaka ya ilimi ekumu ende. ¹² Kuobu bo bara ba babue, bôo ba ba kiu miki me Nziame mpe eke bakiu nkumu muana Nziame Yesu ibuani ya ba kuru miko me bo." ¹³ Muli oyu, me ya ngiu ndo mo elie kobo : "Komi kobo : ise nse mu ba banfi bôo ba lanfi mundo Nziame." "1 bini", mubo bulie ensui e Nziame, "Kuobu bôo ba wumu mando bisia bibue be bôo, kuobu bisia ifiu emo ebie." ¹⁴ Me ya yiu mpe ya muene ifiu emo ebie. Mukara ifiu mo muene muru mumo esiwu a nde afani anka mwana muru. Nde ake eni mpu ibene e or munsui endo mpe anka ni mbie e ngampe a kuo lende. ¹⁵ Angiako ntumu e Nziame mumo ya tuiu mukara nzo Nziame ye nene mpe ya biu we siu mu ifiu ya ndo ye ongama ankarangie : "Wu mbie nze mpe ba okâa kuobu ina kikâa bile ya yiyoe, kuobu mbie yi mu mana ebie." ¹⁶ Muli, we siu mukara ifiu ya tibi mbinde mumana mpe mbie eso ya ibamu. ¹⁷ Ntumu e Nziame wu mukume ya tuiu munzo e nZiame yinene yike ku yu; nde mpe ake eni mbie yanga pü. ¹⁸ Ntumu Nziame wu mukini ya tuiu mukara mbu ba wuwa makaba mansumu mpiri yi aka bu nsuabe, nde ake eni bo Mfumu bo mbâa. Nde mulu mundo okarangie a la weke ya mbie ye ngampe : "Tibi mbie nze engampe mpe ka mbie ye vinu yi ke mu mukiri kuobu yo ebu nse. ¹⁹ Ntumu e Nziame ya tibi mbie mampe mu mukiri. Nde afutibi ku olunu li line likene e Nziame. ²⁰ Ndunu leso onzi bu bula bunene mpe maki matuiu nsee mukara dunu leso ya lui nsee mukara kia ki munsini mpe ya mito tü muminua mi ba mpunu, kia eso eke mu bunene boso mpe ya bulo bokio manfunu nkama ya ma ku masamo.