¹ Kiri enkari ibiene indi kilidiu, suwini ongo bafiri mando a la webu esama we, buini limimi we ela baba isama baba kiu nziami? ² Biene liyiabi we ebu ba bakiu too babisama bo bansiri mando mawama mukiri, bien liki ka banku we mu oyiu mando ma mutini ya mutini ma abu maku we? ³ Bien liyiabi we ebu biu linsi mando maba ntumu ba nziami? munzo ye esa yoso, biu likiu we onsiri ma mutini ya mutini ma bara bakii mukiri we. ⁴ Kiri mule biu sa litsiri mando malua ba muiru bansi yi, buini biu libiri mando mabiu onkuru ebo, ebu bio ebu bobakei bara mpama unzo enziami? ⁵ Me indie mamana ndo bufuru bu biene, muli biene ankari ibiene muru mumo we nga makani ebu sa nsiri mando ma mutini ya mutini ma ba boo nde we? ⁶ Muli mutini liyimono mando mayii, we ekui kiri fini ndu ende we kiu, mpe muli ndo eso yini ba sua ela webu ekiu we. ⁷ Kiri muli endi mitsuni ibiu-ibiu ba likiu iki ebu kilibio we ndo biu, ndonki biene limini biu ebu ba muduu isaa? Ndonki bien limini kunu ba munfu? ⁸ Muli biene ya li muduu isa mpe ya liwi isa ela wumuke, mpe wu wunu eki iburu inze kie boo ebu wu mumo mpe tara mumo. ⁹ Liyabu we ebu babu ba ilie we ma ibino ba somowe mubu nfunu bu nziami? Nze kafunu mu mampia; bara ba mando mama mbi, banga bitio, baba ita bibiu, mpe baba ya we bandu bande baba boo enka bakia babo. ¹⁰ Babi, baba ikunu bara nze miu, biwuru maa, baba ifuru bara, mpe ya baba isa mando mamabi mutini ya mutini mumo ebo we webu sasueme mubu nfunu bu nziami. ¹¹ Mpe mutini mumo iki ankara ebiene, ndo ebu biene liki ba lisuo, mpe biene liki ba liwi ela nziami eki ba lifiri bara bayana mu nziami munki mu efunu ebiu yesu-klisto mpe ya mu itsui inziami ebiu. ¹² « Nsa momaso makii yana,» too momaso ba liwi? muli« momaso ka mabu biu salisia we,» mpe momaso kama osawe, muli me eyuo we osa anka ba biene. ¹³ « Bilo bi odia bikii ndo iyii mpe iyii ndo bilo bi udia,» ekiana nziami ya duu momaso muele nduru iki ka ndo oyata bibi we, liyiaba ebu ndoru eki ndo mfumu, mpe mfumu ewu mpiu mu nduru. ¹⁴ Nziami ewuu mu ukiu mfumu, mpe nde eli wu ela biu mungu ende. ¹⁵ Biene liya bawe ebu ebu nduru ebiene iki bito binfiru bie mfumu? Nze sa wini kowu bito bi nduru bi nfunu ndo uvuu ya bi embini? Mubo esa ikawe. ¹⁶ Liyabi we ebu wu wini ya mukara enfibi yayu nduru mo ya nde? Mubo mutini muma ba kuene munii kana ¹⁷ Bo bue ya bayu muru mumo muli we viu ya mfumu ya bayu itsui umo ya nde. ¹⁸ Libara linfubi, mpe mando momaso mamabi muru mumo ekasa mukari nduru ende, emaa mabi momaso mu nduro ende. ¹⁹ Biene liyabi ebu nduru ebiene iki nzo enziami, etsui enziami, ki isiu minkara biu, kiu wee biene ala nziami? Liyabi we ebu biene libuka ka biene we? ²⁰ Ndonki biene kii balisumi muntaa nsee, muli biene lituono nziami mundo nduru.