¹ Mpe, bandu bame ba baboo, me elilie we ku ke biene anka bara itsu enziami, muli anka bara ba nduru, anka bana ba mpio ba buri muli mu klisto. ² Me eliliu a la biene miliki mpe eliliu uka misunu we, kuobu biene le kuiu we mu dia misunu mpe tii muli biene li buani we. ³ Kuobu biene like munduru. Kuobu mbu eke liwuru mpe mitsunu make munka biene, biene le sisa mando ka munduru we mpe biene lelu luru kamu, usa mando manduru we? ⁴ Kiri ebu muru mumo elie: « me nke mundo Polo,» mpe wu muke elie: « mu nke mundo Apollos,» biene lesisi mando kama nduru we? ⁵ Apollos ake na? mpe Polo ake na? bara ba isali mundo muru le kio biene, we mfumu eke muwii tsuu. ⁶ Me ya nkuini, Apollos ya wuini madia, nziame we esisa ebu bilo bi ku yana. ⁷ Muli, mate momaso ka we kuini we, nsa kawe wuiri madia we, mawuke oluru momaso, muli eke ka nziami we we sisa ebu biku. ⁸ Mulibu we eku kunu mpe we ewu iwuiri ma madia bobaso bake mutini mumo, mpe muru a muru aboo lifuru le nde mutini ebisali be nde. ⁹ Kuobu biu like bara wele nziami nde ngako mu isali. Biene like bia be nziami, bakuini nde nziami. ¹⁰ Mutini ngu e nziami ye angui nde anka muru makari eyi yilu bilo, me ebe utu yana mpe wu muke ayitu angie, Muli muru a muru ata yana mu mutini atuitui nde. ¹¹ Kuobu muru mumo we tuu yana-yana, kiri we bei obei yana we, ndunu eke jyesu-klisto. ¹² Mulibu nde eso we ba otuu ya nzimi bibene, mankuanu mamabue, nkuini mpe to mpe ya ngele. ¹³ Bisali be nde ba mumono, kuobu muli etsu ba mumono mu mba ende. Mba aburu osuo yani yana bisali be muru nde eso asisali. ¹⁴ Kiri ebu muru etuu mbu ende, nde aboo lifuru. ¹⁵ Muli kiri ebu isali e muru idiu, nde ki aboo we, muli nde ngako aka mumawama, anka ku isali emba. ¹⁶ Liyiabi we yebu biene like nzo e nziami mpe istui e nziami eseu munkara biene? ¹⁷ Kiri muru mumo diu nzo e nziami eke ndo emo embi wo we, biene likei. ¹⁸ Mundo ebu muru mumo aka lifuru, kiri ebu muru mumo mukara biene ofini nde oke ani mayi muba nvu basoba, nde aka mumo « iwuu iyilu » nze ebo makani. ¹⁹ Kuobu makani ma mukiri make miu a la nziami. Kuobu nde akome « nde makani mabo ma mabi obu bamu.» ²⁰ Mpe buke mubo:« Mfumu yiabi ebu ma fufunu banga ma yii mamabi.» ²¹ Muli, isa kio we oniseni! kuobu bilo bibeso bike bie biene, ²² Nsa ebu Polo too Apollos, too Céphas, too mukiri, too lifu, too bilo bi masuma sama too bilo masu mamayiu. Bilo bibeso bike bie biene. ²³ Mpe biene like mundo klisto mpe klisto ake mundo nziami.