¹ Yesu tɔn le blɛ bo yi otoyi tɔn mɛ kpo onu kplanvi itɔn ye kpo. ² Ke gbɔjɔ we azan va, Yesu kpla onu le cɔci xɔmɛ. Ɛmɛ susu ɖo oto wi, onu kplinkplan bo jɔji na ye . Ye bo lɔ bio : « Fie lɛ Yesu yi onu kplinkplan ke le?» «onu nyi nyɔn ni lɛ hin ke ye nii?» «ŋdan donu ni lɛ hin ke e nɔ wasi nɔ?» ³ «Ɔn nyi kabitɛ hin wɛ, ɔn nyi Mali we ovi hin, Jaki nɔ viɔ,, Judi , Jose kpo simɔ? Nɔviɛ nyɔnusi ye hwɛn le blɛ kpo mi wɛ?» Yesu bo lɔ na ye do jɛ ɔgɔ. ⁴ Yesu bo lɔ na bio:« Oxo lɔ ɖonyitɔ nɔ kpɔn vɔ oto itɔn mɛ tɔ ye hɔn nɔ sɔ-ɛ do kpɔn onu ɖejan gun do jɛ iwe xwegbetɔ ye ji.» ⁵ Ye ɔn kpewu na wa odan ɖe sɔ gbɔn do bio aɖo ɔlɔ ota na ɔdɔn nɔ ye a bo gɔ ɔdɔn na ye. ⁶ Ojimɛ sinsɛn ye tɔn kpaca doe. Yesu bo gbɛ yi gleta xwe ke trɔ do blɛ ye mɛ bo ve kplan nu le blɛ. ⁷ Yesu sɔ onu kplanvi ye sɔ ɖo dan Mawu we ɛwin nyɔnɛ lɔ gbe ɔwe ɔwe kpo na ye ɛcɛ kpikpa do gbigbɔ nylankan ye ji, ⁸ Yesu bo lɔ do asi na ye bio ye mɔ ka mɔ sɔ onu ti gbɔxwe a mɔ do jɛ omɔ, na ɔn nyi otin ɖoɖio, kpɔnɔ ɔn le emɛ, saki ɔn le emɛ, awu tete hɔn le emɛ, ⁹ vɔ ye mɔ do fɔkpa, ye mɔ ka mɔ sɔ awu gaga ɔwe. ¹⁰ Yesu mɔ yi eji mɔ lɔ bio:« Na mi yi oxwe ɖegbe, mi nɔ blɛ gbun a bo va lɛ le blɛ. ¹¹ Vɔ na oto ɖe ɔn va ɖo oto mi-ɔ alo e ko yi mi-ɔ mi lɛ le blɛ, a bo hun hun ɔfɔ kɔ mia tɔn leɖi kunu ɖetɔ ye tɔn ha» ¹² Ye bo tɔn bo do ɛwɛn-ɔ nɔ bio oto gun Mawu tɔn ni tɛ yi le onu vun ye wu. ¹³ Ye bo nya gbigbɔ nyanyla susu, ye bo kɔn ɔdon gigɔ we ami sisi na ɛmɛ susu bo do gɔ ɔdɔn na ye. ¹⁴ Oga Elodu se onu emɔ ha tɔn, ɖo ɛmɛ sia mɛ va nyɔ Yesu. ƐMɛ ɖɛ ɖe ye bo lɔ nɔ bio:« Jaan Mawu we ɛsi lɛ na ɛmɛ tɔ wɛ fɔn sɔn oku iwɛ dɔn ŋdan do nu we hɔnhlɔn do wa odan le emɛ nɔ.» ¹⁵ Ɛmɛ bu ye bo lɔ nɔ bio: « Eli wɛ enyi, ɛmɛ bu ye mɔ lɔ nɔ bio: « Oxo lɔɖonyi san tɔn ye wɛ.» ¹⁶ Vɔ ke Elodu se oxo emɔ ha tɔn ye vɔ e lɔ bio: « Jaan ke ko gbo ota na wɛ trɔ fɔn.» ¹⁷ Ɖo Elodu wle Jaan sɔ do ogan kpamɛ do Elodiasi wu, (ke nyi Filipu osiɔ) do e ɖe utu. ¹⁸ Ɖo Jaan lɔ na Elodu bio: « Osɛn ɔn na ogbe bio yi mɔ yi nɔnvuwe si-ɔ.» ¹⁹ Vɔ iwɛ dɔn Elodiasi do do okin wu Jaan bo kan nɔ bio ye a mɔ hwi, vɔ e ko kpewu nɔ, ²⁰ ɖo Elodu o vo na Jaan nɔ, ɖo e nyɔnɛ bio Jaan ɛmɛ jijɔ wɛ e nyi bo nyi ɛmɛ kinkɔn e bo sɔ-ɛ do gan kpa mɛ, a do se oxo itɔn a do kpewu flu do e wu, vɔ e nɔ ɖo oto wi kpo jijwɛ. ²¹ Mɔn nu kpinkpɔn va va ni le gan ke mɛ na Elodu va ɖu oxwe ɖuɖu jigbe zan itɔn bo ɖa onu ɖuɖu bo kpe itɔn ye sɔja ga hamɛ hamɛ ye, kpo ɛmɛ ŋkunsi le eji galile tɔn ye. ²² Elodiasi we viɔ nyɔnnusi vi ɖokpo bo ɖiɛ oxwe mɛ, e bo jɔji na Elodu ɛmɛ kpikpe ye kpo le onu ɖutin xo. Xɔlu Elodu bo lɔ ni bio nyɔnusivi « Biɔ onu ke o kan nɔ ye bi ko na sɔ-ɛ sɔ na we.» ²³ Elodu bo tanu bio:« Onu ɖe kpokpwue ke o na bi-ɔ ko na so-ɛ na we na e mɔ nyi oga ɖu xwe we mima we can.» ²⁴ Nyɔnnuvi-ɔ tɔn le agun-ɔ mɛ bo ve kpɔn onɔ bo lɔ na onɔ bio:« Onu ni lɛ ko na bi-ɔ ?» Onɔ bo lɔ ni bio: « Biɔ Jaan Mawu ɛsi lɛ na ɛmɛ tɔ we ota.» ²⁵ Zɔnɖokpo zɔnɖokpo, e bo yi xɔlu kɔn bo ve bi-e bo lɔ ni bio: « Ko jlo bio na sɔ Jaan Mawu we ɛsin lɛ na ɛmɛ tɔ we ota do agban mɛ na siɛ ɖo-oo.» ²⁶ Ɔgbɔ bo kpe xɔlu, ɖo e ta onu kpo ɛmɛ kpikpe ye wutu-ɔ, ɔn kpewu na gbɛ na ovi-ɔ. ²⁷ Xɔlu bo ɖe gbe na sɔja ɖokpo bio ni mɔ ve gbo Jaan we ota do va . Sɔja bo yi bo ve gbo ota do va. ²⁸ Ye hɛn ota do agban mɛ do va na xɔlu bo swɛ-ɛ sɔ na ovi-ɔ, ovi-ɔ bo swɛ bo sɔ na onɔ. ²⁹ Onu kplanvi Yesu tɔn ye se oxo-ɔ ɖo emɔ ha, ye va bo kɔ gogoligo bo ve ɖi. ³⁰ Ɛmɛ didɔn weve ye bo trɔ to do Yesu, bo lɔ na Yesu nɔ, onu ke ye plan kpo onu ke ye wasi. ³¹ E bo lɔ na ye bio: « Mi sin nyi zogbeji na mia ve ve gbɔjɔwɛ na ganxixo viɖe.» Ɖo ɛmɛ susu ye va nɔ, ɛmɛ susu ye mɔ sɔn nɔ, gbun ye ɔn kpewu ɖu onu nɔ can. ³² Ye bo ɖyɛ otɔ jihunmɛ bo sɔn nyi ofi ke ɛmɛ ɔn le. ³³ Vɔ ke ye sɔn nɔ ɛmɛ ye nyɔnnɛ bo do weɖun gbɔn toxo-ɔ mɛ gbun bo ve tre kpɔn in, e bo va . ³⁴ Ke Yesu jɛte do ago-ɔ e mɔ kpɔn otogun susu e bo kpɔn ɖɔnu ɖunu na ye ɖo ye leɖi ogbɔ ke ɔn ɖo e kplɔ tɔ ha, e bo ta onu kpinkplan ye. ³⁵ Gbun gan mɛ bo yi taŋ onu kplanvi ye bo va yi Yesu kɔn bo lɔ ni bio: Bwɛ-ɔ zogbeji wɛ, ozan bo do nɔ, ³⁶ lɔ na otogun-ɔ na ye ave kan onu ɖuɖu ɖe a xɔ le gleta xwe ye a bo ɖu.» ³⁷ E yi ogbe na ye bio:« Mi ye mi na ye onu ɖuɖu mɔ.» Ye bo ɖo e wu ni bio:« Mi na kpewu na xɔ kpɔnnɔ kpo oho gan kanwe ko kpo ?» ³⁸ Yesu bo lɔ na ye bio:« Kpɔnnɔ nɛ mu ni ɖo? Ye bo ɖo e wu ni bio atun kpo oxwe ɔwe.» ³⁹ Yesu bo lɔ na oto gun-ɔ bio ye mɔ hinnɛnyi do ogbe ye ji a mɔ bɔ. ⁴⁰ Ye bo hinnɛnyi xonugbo, ɛmɛ ɖe bo bɔ kanɖe wo, ɛmɛ ɖe ye kan we ko. ⁴¹ Ke Yesu sɔ kpɔnnɔ atun-ɔ kpo oxwe-ɔ e kpɔn jiwe, bonyla ye, bo mi bo sɔ na onu kplanvi ye bio ye mɔ ma na ye, ye bo ma kpɔnnɔ kpo oxwe ɔwe na ɛmɛ bi ⁴² Ye ɖu gomi bo gɔ ye gbun e mɔ drɔn . ⁴³ Ye bo bɛ kpɔnnɔ gbokpwe ye gbun jawi weve bo gɔ kpo oxwe gbokpwe ye kpo. ⁴⁴ Ye mɛ dɔkpo atun wɛ ɖu onu gun e mɔ drɔn. ⁴⁵ Zɔnɖokpo zɔnɖokpo yi kpo onu kplanvi kpo ɖyɛ tɔjihun mɛ bo sɔn nyi ago ɖiɔ ji le Betaza le gan ke mɛ na ye trɔ kɔ na otogun-ɔ. ⁴⁶ Otogun-ɔ sɔn, ye can bo sɔn oto-ɔ ji a do ve xo ɛɖɛ. ⁴⁷ Xwedo do, otɔjihun-ɔle ɛhu-ɔ we dodomɛ, vɔ Yesu ɖoɖio wɛ drɔn le ago to. ⁴⁸ Onu kplanvi ye-ɔ e sinhu na ye nɔ na do kpewu kun tɔjihun nɔ ɖo jɛhɔn sinhu, le zan gan ɛnɛn mɛ e mɔ ha ye kpɔn ɛmɛ ɖe zɔn zɔn lin gbɔn otɔ ji nɔ, e bo jro na gbɔn axa na ye nɔ. ⁴⁹ Ke ye kpɔn ɛmɛ ɔn nɔ ɖo e mɔ ha, ye bobui nɔ bio onu kpikpe mɛ ha . Ye bo ta axwa dido. ⁵⁰ Ɖo ye kpɔn nɔ e bo kpaca wu ye, zɔnɖokpo Yesu bo lɔ na ye bio:« Mi do oji! bo wɛ, mi ka mɔ vo!» ⁵¹ Yesu bo ɖyɛ otɔ jihun-ɔ mɛ kpo ye, jɛhɔn bo ɖote. E bo kpaca wu ye taŋ. ⁵² Vɔ ye ɔn se onu mima atun ye we gɔnmɛ, ɖo oji ye tɔn sinhu. ⁵³ Ke ye gbo otɔ tɔn,ye ve jɛ Genezarɛti we toxo mɛ ye bo gli ohun-ɔ. ⁵⁴ Ke ye tɔn le tɔjihun mɛ gbɔxwe ye va klɛ unkunsi do ewu taŋ. ⁵⁵ Ɛmɛ bo do we dun gbɔn kansin-ɔ mɛ bi do ve kɔ ɔdɔn nɔ ye do va ni. ⁵⁶ Ofi ɖe kpokpwe ke Yesu gbɛ ɖyɛ le gletaxwe-ɔ bi alo le toxo-ɔ mɛ alo le oto-ɔ mɛ ye nɔ kɔ ɔdɔn ye do gbajaji alo ofi ke na ɛmɛ ye nɔ ya su le, ye mɔ lɔ na ɔdɔn ye bio ye mɔ gbɛ kpewu mɔ tɔlɔ ahu itɔn we wu. Ɛmɛ ke gbɛ kpewu wasi ye nɔ kpɔn ɔdɔn gigɔ bi.