1 Falizi tɔ ɖe le, ke ye nɔ yɔ bio Nikodɛmu, e bo nyi Jwifu ye we oga. 2 ɛmɛ xin yi Yesu kɔn le hwesa bo lɔ ni-i bio:«Hlabi, mi nywɛ bio o nyi onukplan ɛmɛtɔ ɖokpo bo sɔn Mawu kɔn, ɖo, ɛmɛti ɔn le bo na wasi ŋudandonu ke onɔ wasi ye, na Mawu ɔn le kpowe.» 3 Yesu ɖewu ni-i bio, «Le oxo jɔ oxo mɛ ɔ, na ɛmɛɖe ɔn trɔ eɖe ji ɔ, ɔn kpewu ba kpɔn ɛgbɛ mavɔ nɔ (xɔluɖuto Mawutɔn).» 4 Nikodɛmu ɖewu ni-i bio;«Naɖe ɛgbɛtɔ na kpewu trɔ eɖe ji ke e kpo nyɔnxo ɖo? ɔn mɔ kpewu na ɖyɛ onɔ we dɔnmɛ na onɔ na trɔ ji mɔ?» 5 Yesu ɖewu ni-i bio:«Le oxo jɔ ox mɛ ɔ, na ɛmɛɖe ɔn trɔ eɖe ji do gbɔn ɛsin kpodo gbigbɔ kpo mɛ ɔ, ɔn kpewu na ɖyɛ Mawu we xɔluɖu to ɔ mɛ. 6 Onu ke ye ji sɔn agbaza mɛ ɔ, agbaza wɛ e nyi-i, onu ke ye ji sɔn gbigbɔ mɛ ɔ nyi-i gbigbɔ. 7 Onu ke ko lɔ na we ɔ, ni ka kpaca we:«O ɖona vɔ ɖiwe ji.» 8 Jɛhɔn nɔ xoyi fike e jro, o nɔ se yiwe ogbe , vɔ oko nɔ nyɔ fike e sɔn, kpo fike e yi nɔ. E mɔ wɛ ele na ɛmɛ ɖekpekpe ke trɔ iɖe ji sɔn gbigbɔ mɛ. 9 Nikodɛmu ɖo ewu bio:«Naɖe lɛ e na kpewu nyi wiwa ɖo?» 10 Yesu ɖewu ni-i bio:»yi ɛme ke nɔ kplan onu Izlayɛli we oto, oko mɔ nyɔ onuxinye? 11 Le oxo jɔ xo mɛ ɔ, mi lɔ oxo sɔn onu ke mi nyɔ wu nɔ wɛ, bo ɖe kunnu nɔ sɔn onu ke mikpɔn wu nɔ. Ganke, mi ɔn yi ogbe na mia we kunnu ɖiɖe nɔ. 12 Ko lɔ oxo sɔn ɛgbɛmɛ bwɛ we onuye wu nɔ mi ɔ, ɖi onu nɔ, na enyi ko va lɔ xɔluɖuxwe Mawutɔn we onu onu ye we oxo nɔ, naɖelɛ mi na kpewu yise ɖo? 13 ɛmɛti ɔn nyi ojihwe , bo gbɔn nɔn ovo na ɛmɛ ke jɛ ote sɔn jihwe, ovi ɛgbɛtɔ tɔn. 14 ɖike Moyizi kɔ lanvi do okpo nu le zogbeji ɖo ɔ, e mɔ ke wɛ ye na kɔ ɛgbɛtɔ we oviɔ do jihwe ɖo. 15 Na ɛmɛ ɖekpekpe yise ɔ, e na nɔ ɛgbɛ mavɔ mavɔ. 16 ɖo Mawu yi owan na ɛgbɛ ɔ bo sɔ ovi ŋusuglo ɖokpo itɔn bo sɔ na, na e nyi bio, ɛmɛ ɖe yise ɔ, ɔn mɔ crɔn nɔ, vɔ e na ɖo ɛgbɛ mavɔ mavɔ. 17 Mawu ɔn sɔ oviɔ ɖodan ɛgbɛ ɔ mɛ , a do va sɔ ɛgbɛ ɔ husudo vɔ, na e na do hwlɛn gan wɛ. 18 ɛmɛ ɖekpekpe ke yise ɔ, ɔn mɔ yi va sudomɛ nɔ, ɛmɛ ɖekpekpe ke ɔn yise ɔ, e yi va sudo mɛ , ɖo, ɔn ɖi onu na ovi ɖokponɔ Mawutɔn. 19 ɛhwɛ jijɔ ke nyi kojo ɖiɖo ɔtɔn, wɛ nyinɔ bio, kinklɛn ɔ va ɛgbɛ mɛ, vɔ, ɛgbetɔ ye yi owan na vuvlu ɔ sɔ hu kinklɛn ɔ, ɖo odan yetɔn ye ɔn nyɔnhwin. 20 ɖo ɔ, ɛmɛ ɖekpekpe wa onu nyanyla ɔ, e nɔ gbɛ owan na kinklɛn, eko nɔ va kinklɛn nu, ye na gbɛ va mɔ onu jɛ vuvlumɛ we odan itɔn ye wu le agbaŋugba. 21 ɖekpe kpeɖe ɔ ɛmɛ ke wasi oxo jɔ xo we onunɔ, e nɔ va kinklɛn nu, na odan itɔn ye ke ye ewasi le Mawu ɔ mɛ ye na nɔ kinklɛn nu agbaŋugba.» 22 E xin godo ɔ, Yesu kpodo onu kplanviye vayi Jude we nyixo ji. Le blɛ ɔ, ye wasi azan susu bo lɛ Mawu we ɛsin na ɛmɛye. 23 Jan can lɛ Mawu we ɛsin na ɛmɛ ye nɔ le. Enɔ ke tɛkpɔ Salimu we toxo ɖo, ɛsin su le blɛ ɔ. ɛmɛ nɔ va ekɔn , ye bo na lɛ Mawu we ɛsin na ye. 24 ɖo, ye ɔn ka sɔ Jan sɔ do ogan kpamɛ o. 25 Onu dindɔn ɖe va nɔnyi le Jan we onukplanviye kpodo Jwifu ɖekpo mɛ sɔn kinkwɛn nyi-nyi wu. 26 Ye va ti Jan kɔn, bo lɔ ni-i bio:«Hlabi, ɛmɛ ke kpo yi kpo nɔ yɔdan we otɔ godo, o bo nɔ ɖekunu sɔn ewu ɔ, lɛ Mawu we ɛsin na ɛmɛ ye nɔ, ɛmɛ ye xeɖeɖe yikɔn nɔ. 27 Jan ɖewu ni-i bio:«Na ye ɔn sɔ onu ɖe sɔ na ɛmɛɖe sɔn jihwe ɔ, ɔn kpewu na yi. 28 Mi ye tete ye na kpewu ɖekunnu bio, ko mɔ lɔ bio:"Blɔ, kɔn nyi Kliso; "Vɔ, ko mɔ lɔ bio:"Ye sɔ sɔ ɖodan na ma jɛ ŋukɔn ni-i kpoŋu wɛ." 29 Nyɔnusi ke ɖe osu ɔ, osu ɔ tɔn bɛ e nyi, vɔ osu ɔ we hadwe ke le xa na ye ɔ, bo ɖo oto nyɔnusi ɔ nɔ, e na kpɔn jijwɛnɔ kpoŋu ɖo nyɔnusiɔ we osuɔ we ogbe wu. Ma lɔ na mi bio, jijwɛ wɛ e nyi na blɔ nɔ taŋu. 30 E ɖo na hwɛn do e ji nɔ, blɔ na ɖe drɔn nɔ. 31 ɛmɛke sɔn jihwe ɔ, e hugan wu ɛmɛ xeɖeɖe. ɛmɛke sɔn nyixo ji ɔ, bo nyi nyixoji we ɛmɛ bo nɔ lɔ oxo sɔn onuke nyi nyixo jiwe onu ye wu. 33 ɛmɛke sɔn jihwe ɔ, e hugan ɛmɛye xeɖeɖe. E nɔ ɖekunnu sɔn onu ke ekpɔn kpodo onu ke ese wu. Vɔ, ɛmɛ ti ɔn nɔ yi kunu ɖiɖe itɔn. 32 ɛmɛke na yi ogbe na yiwe kunnu ɖiɖe ɔ, yi ogbe nɔ bio, Mawu nyi oxo jɔ oxo. 34 ɖo, ɛmɛ ke Mawu sɔ ɖodan ɔ, Mawu we oxo ye wɛ e nɔ lɔ, ɖo , Mawu ɔn nɔ yi we gbigbɔ kpodo ojlɛ kpo. 35 Otɔ yi owanna ovi ɔ, bo sɔ onu ye xeɖeɖe sɔ do ɔlɔ mɛ ni-i. 36 ɛmɛ ke ɖo kanɖeji na oviɔ, e ɖo ɛgbɛ mavɔ mavɔ, emɛ ke ɔn ɖo kanɖe ji na oviɔ, ɔn na kpɔn ɛgbɛ, vɔ Mawu we aɖidido le e ji.»