¹ E le emɔn ganke , mi ɖo na wa blɛ o taŋ na mian ka mɔn do dokpo akpagbe-ɔ ma yi, ke ye do na mi bio mi mɔn na mɔn ɖiɛ Mawu we gbɔjɔɛ mɛ. ² ɖo ɛwɛn nyɔnn-ɛ ye doe na mi ɖi ye ha vɔ ɛwɛn ɔn ɖe ale na ɛmɛ ke ɔn wasi ɖokpo kpo mi le xɔse-ɔ mɛ kpo ɛmɛ ke se tonu ye. ³ ɖo mi mɛke kando eji ye ɔ, mi ye ɖoɖio wɛ na ɖiɛ gbɔjɔɛ mɛ, leɖi ke ye win ɖo ha:«leɖi ke ko taŋ le bo we dɔmɛ zomɛ ɖo ha, ye ɔn na ɖiɛ bo we gbɔjɔɛ mɛ kpɔn.» Vɔ ganke xinye ke e wasi va cicɛ mɛ sɔn dodoe ɛgbɛ-ɔ tɔn ji gbun. ⁴ ɖo e lɔ oxo do azan acowe gɔ wu le ofiɖe: «Mawu gbjɔjɔɛ le azan acowe gbe» ⁵ E mɔn lɔ bio:« ye ɔn na ɖiɛ gbɔjɔɛ mɛ kpɔn» ⁶ Ganke, ke ye sɔ ɖo onyi na ɛme ɖe ye a do ɖiɛ gbɔjɔ itɔn mɛ ɔ, leɖi ke na Izrayɛli tɔ ye susu ɔn kpewu na ɖiɛ emɛ ɖo ye we otomaɖo wu tu-ɔ. ⁷ Mawu mɔn trɔ jla azanɖe ɖɔ, ke ye yɔ nɔ bio:«egbe» le azan susu we godo-ɔ, e lɔ oxo gbɔn Davidi ji leɖi ke na e le sɔn xoxoxo:Egbe , na mi se ogbe itɔn mi ka mɔn siɛnxu oji mian tɔn.» ⁸ ɖo na Jozuwe do na ye gbɔjɔɛ-ɔ, Mawu ɔn mɔn lɔ oxo do aza bu wu nɔ. ⁹ Ganke, gbɔjɔɛ zan bu le na Mawu we vikpɛye. ¹⁰ ɖo ɛmɛ ke ɖiɛ gbɔjɔɛ Mawu tɔn mɛ, e ɖo mɔn na gbɔjɔɛ na odan itɔn ye. Leɖi Mawu can gbɔjɔɛ ɖo odan itɔn ye wu ɖo ha. ¹¹ Mi na mian ya wu a do ɖiɛ gbɔjɔɛ zan xin mɛ, na ɛmɛ ti ko mɔn na do va ɖiɛ tonu mase mɛ leɖi ke na ejɔ do ye ji ɖo ha. ¹² ɖo Mawu we oxo-ɔ le ɛgbɛ bo nyi adodoe kpo bo ɖo ɖi oda ke ɖɔ onu ɔwe ha. E nɔ ma okla kpo gbigbɔ kpodo ɔwe kpo lanti-ɔ kpo oxu do ɔwe. E nɔ nyɔn onuke le susumɛ. ¹³ Onu wiwasi ti ɔn hwla le Mawu we ŋkɔn. Vɔ, onu sianu le govɛ le hunhun le ŋmɛ na ɛmɛ ke na mi ɖo jo kɔŋta na. ¹⁴ Leɖi ke na mi ɖo ɔvɔ san tɔ ɖaxo ha ke gbɔn jinukunsi , Yesu Mawu we ovi, ke hɛn mian we xɔse ye wu gliŋ. ¹⁵ ɖo mi ɔn ɖo ɔvɔ santɔ ti ke na kpewu na ma vivɛ sise mian tɔn ye kpo mi. Vɔ mi ɖo ɛmɛ ɖe ke ye tinkpɔn ɖi miye ha gbɔn ɔlɔ kpa ye bimɛ, onu ke drɔn jan wɛ nyi bio ɔn wa onuvwɛn. ¹⁶ Mian tɛkpo ɛfɛnu ogakpo-ɔ kpo kando eji kpo, na mian do yi dɔmɛ nywɛ a bo do kpɔn fɛnu a bo do kpedo ɛmɛ wu le ohian mɛ.