¹ Mɔ sɔ do yi eji, ke na e nyi bio kunnu ɖetɔ susu wɛ trɔ do mi, mia jo onu ke na kpɛn mi nɔ kpo onu vwɛn ke na cɔn mi fifaɖe kpo vivɛ donu kpo. ² Mia sɔ mia we ŋhkunsi sɔ ɖo Yesu ji, ɛme ke na nyi otɔ na xɔse miatɔn, na jijwɛ kpinkpɔn ke ye sɔ ɖe nyi ni le ke e se vivɛ tisogatɔn, e gbɛ owan na unkpɛn, bo xinɔnyi le Mawu xɔlu ɖu kpo we aɖusi mɛ. ³ Emɔ ha, mi sɔ ɛmɛ ke na kpe ofun xin sɔn nuvwɛn watɔ ye kɔn a sɔ yɔ ɛmɛ, na mi ko mɔ na mɔ jo miaɖe do alo mi ko mɔ na do ɖo awakamɛ tutu. ⁴ Mi ɔn ka syɛn ta do ɛhun, aloo do ɖɔn onu kpo nuvwɛn. ⁵ Mi bo wɔn hɔnhlɔndo ɛmɛ we oxo ke ye lɔ na mi le ɖi oviye ha:«Ovi tɛye ka mɔ wɔn oto didɔn xwetɔ tɔn, awa kamɛ ni ka mɔn ku we na e kplan we nɔn.» ⁶ Ɖo xwetɔ nɔ dɔn oto na ɛme ke e nyi owana, a bo do oxa na ovi ke na vɛni. ⁷ Mi yi ogbe na didokpɔn. Leɖi okplan yiyi ha. Mawu na kplan mi leɖi ovi itɔn ha, ɖo ovi ni lɛ le na otɔ ɔn nɔ dɔn oto na? ⁸ Vɔ na ye ɔn dɔn oto na mi, le oto didɔn ke ye na dɔn na min mɛn bi, bo nyi mi nyi ogavi mi ɔn nyi ovi itɔn. ⁹ Sɔ yi eji mi ɖo otɔ le nyixoji a do dɔn oto na mi, mi bo nɔn buye. Ɖe mi ɔn na bu otɔ gbigbɔ yee tɔn a do nɔn ɛgbɛ wɛ-ɛ? ¹⁰ Mian tɔ ye nɔ dɔn oto na mi na oxwe viɖe leɖi ke na e nyɔ na ye ɖo ha, vɔ Mawu nɔ dɔn oto na mi na nyɔna miatɔn, na mia do kpewu nu kinkɔn nyinyi itɔn mɛ. ¹¹ Oto dindɔn ti ɔn nɔ nyi jijwɛ we onu, vɔ do gbɔnvo enɔn vɛ. Ganke e nɔn va sɛn jijɔ nyinyi we okun sinsɛn na ɛmɛ kena wasi do eji ye. ¹² Emɔha-a mi do hɔnhlɔn mia we ɔlɔ ke na gbɔjɔ kpo mi we klita ke na joko. ¹³ Mi ɖe omɔn jijɔ na miawe ɔfɔ ye, na ɛmɛ ɖe nyi tɛkunɔn e kɔ mɔ na do bu vɔ e mɔ ɖo nyi jijrado. ¹⁴ Mikan fifa kpo ɛmɛ ɛmɛ bitu, kpo kinkɔn nyinyi ka na ɛmɛ ɖe ɔn ɖo e ko kpewu na kpɔn xwetɔ. ¹⁵ Mi nɔn ŋzɔn na ɛmɛ ti ni ka mɔn do kpo ɛfɛnu Mawutɔn makpɔn, na vivɛsise ni ka mɔn do okyɔn le mia mɛ a do hɛn tukaɖa va na ɛmɛ susu ava ci ɛmɛ. ¹⁶ Mi nɔn ŋuzɔn na makɔn na makɔn makɔn kpo nyinylan ɖi Esawi ha, ɖo onu ɖuɖu wu, sɔ ovi tantyɛn nyinyi itɔn sɔ sa ɖo ha. ¹⁷ Ɖo mi nyɔ ke xodo-e, wɛ nyi ke na e jro na va yi dona, ye gbe-e ɖo e ɔn kpɔn omɔnnukpinkpɔn ti a do trɔ jimɛ dodan otɔ kɔn, e bo biɔ otɔ kpo ɖasin le ŋumɛ(avikpo) can. ¹⁸ Ɖo mi ɔn otó ke ye ɔn nɔ tɔ ɔlɔ kɔn otó ke hun ozo nɔ hɛhɛhɛ, vuvlu ye, kpo jɛhɔn sinsyɛn xu. ¹⁹ Okpɛn we finfan hwɛ mi do va, alo oxolilɔ ke na ogbe finfan ɖe kɔn ke na ɛmɛ kena see ɔ ɔn mɔ nɔ jro bio hi ye a mɔ se ke. ²⁰ Ɖo ye ɔn kpewu na yi onu kena ye lɔ:«Na e mɔ nyi bio kanlin ɖe wɛ kpo otó ɔ, ye ɖo na da ɛkpɛn wi a bo hwi.» ²¹ Onu wiwa emɔ tɔn e hu vivo gun Moyizi bio:«Ko vo bo titɔ nɔ.» ²² Vɔ do gbɔn vo, mi va Sinayi we oto ji Mawu ɛgbiogbio we oto ɖaxo ɔ mɛ, Jeluzalɛmu wiwe, Mawu we ɛwɛndotɔ susu ye bo sɛn Mawu nɔn. ²³ Mi sɔn ha bibɔ tantyɛn ke ye ji bo wlan ye we ŋukɔ do jiŋukunsi na Mawu ke nɔn ɖo kojo na nubi, kpo na ɛmɛ jijɔ ye we gbigbɔ ke na Sɔgbe. ²⁴ Mi va Yesu kɔn, ɛmɛ ke na ca okan yoyo kpo ɛhun ke nu e bo lɔ oxo hu Abɛli we ɛhun. ²⁵ Mi cɔ miaɖe na mi ko mɔn na do gɔ oto ɖiɖo ɛmɛ ke lɔ oxo nɔn. Ɖo na ye ɔn kpewu si le ɛmɛ ke( lɔ oxo na ye nɔn) ke tɔ ogbe wu ye nɔn le unkundanji nɔn mi ɔn kpewu na si le sɛxwe tɔn wu. ²⁶ Le ganxinmɛ, ogbe itɔn hunhun nyixo ɔ ɖe ewu, syɛ-ɔ, e fian jɔ gbe bio:«Ko mɔ na hunhun nyixo ɔ zɔn ɖokpo ke, e kɔ mɔ nyi iɖoɖyo nɔ hwɛn, vɔ jiŋukunsi can.» ²⁷ Xogbe ke na nyi ko na hunhun-i» o ɖe xlɛ nɔ bio onuɖiɖoye na hunhun abo bu, e xlɔn nu ke ɔn kpewu na hunhun ye, mɔ do nɔ onyi. ²⁸ Ke na e nyi xɔluɖuɖu ke na ɔn kpewu na hunhun wɛ mi ye mi yi, mia nyɔn-ɛ ɖo e mɔn ha a bo sɛn Mawu kpo sisi kpo vivo kpo. ²⁹ Ɖo Mawu miantɔn ozo ke nɔ fyɔ onu wɛ e nyi.