¹ Osɛn ɔn nyi ɖiɖe xlɛ na onu nywɛ ke na jɔ ye, ɔnyi onu nywɛ ye tete hwɛn. ɖo mɛnke na nɔn tɛkpɔ Mawu nɔn ye ɔ ɔn kpewu na jeŋ na Mawu dogbɔn ɔvɔsan ɖoɖio ji. ² Yi we gɔn mɛ wɛ nyi bio ɔvɔsantɔ xiye ɔn kpewu na jo ɔvɔsisa ɔn do. ɖo ye do lɛ yeɖe we wɛ, ye ɔn mɔn nyɔn nu nyinyla nɔn. ³ Vɔ dogbɔn ɔvɔsisan xiye ji ɔ ye mɔn flin onu nyinyla ye nɔn oxwesɔ-oxwesɔ. ⁴ ɖo onyisu ye kpodo ogbɔsuye we ɛhun ɔn kpewu na ɖe onu nyinyla ye tɛ gbeɖe. ⁵ Yiwɛdɔn gankemɛ Kliso o va ɛgbɛ ɔ mɛ ɔn e lɔ bio:«ɔn kan ɔvɔsisan gu do kan onu nina, vɔ o wasi gbaza na-a.» ⁶ ɔvɔsisan fifyɔ ɔn jɛnu na we gu na ɔvɔsisan do ota na onunyinyla ye do jɛŋu na we can. ⁷ Yiwe ke lɔ bio:«Bo xɛn, Awo! Mawu; ko va, a do wasi ojlo tɔwe ɖi-i ke e nyi winwlan le oxotɔ we mɛ. ⁸ Jɛ ŋukɔn, e lɔ bio:«ɔvɔsisan, onu nina, ɔvɔ sisan fifyɔ, ɔvɔsisan ɖo ota na onunyinylaye, o ɔn kan, E ko jɛŋu na we.» Ganke ke osɛn ɔn bio do we ɔvɔ we ye na san. ⁹ E bo lɔ bio:«Bo xɛn, ko va a do wasi ojlo tɔwe.» E gukun na tito tantyɛn ɔn bo sɔn ɔwe gɔ sɔn ɖo enyi. ¹⁰ Mawu we ojlo xi wɛ Yesu wasi bo do sɔ yiɖe sɔ san ɔvɔ na mi e bo vɔ do blɛ. ¹¹ ɔvɔsantɔ ɖokpo-ɖokpo nɔn sɛn Mawu gbesigbe a bo wasi ɔvɔ sisa ɖokpo ŋumiɔ ye nɔn zɔn nɛmu ɖe, vɔsan xiye ko kpewu na ɖe onu nyinyla ɔ tɛ gbeɖe. ¹² Vɔ ke e wasi ɔvɔsisan ɖokpo ɔ gbe do ota na mi-i vɔɔ e xi nɔnyi do aɖusimɛ na otɔ-ɔ. ¹³ Ble wɛ e le siɛ bo do trekpɔn Mawu nɔn na a do sɔ kɛntɔ yitɔn ye a do wasi ɔfɔ tutu nu yitɔn. ¹⁴ Dogbɔn ɔvɔsan ɖokpo ge yitɔn ji ɔ, e na na mɛnke sra ɛwu ye sɔgbe tɛgbɛ. ¹⁵ ɖo gbigbɔ kibkwɛn can nɔn ɖe na mi. ɖo jɛŋkɔn na onu biɔ. E nɔn lɔ bio: ¹⁶ «Xwetɔ-ɔ lɔ nɔn bio, mi kpɔn cancica ko na wasi kpo ye le azanye we godo xɛn. Ko na sɔ osɛn tɛye do ye we ojiye mɛ, ko bo na wlan osɛn tɛye do ye we ayixa ye mɛ. ¹⁷ Kɔn mɔn na flin ye we nyinyla ye.» ¹⁸ Fi ke ɛhwɛ sɔ ke ɛmɛ le ɔ , ɔvɔsisan ɔn mɔn le na nuvwɛn ye oo. ¹⁹ Mi ye mi ɖo kando eji ke na do ɖyɛ tɛnxo kinkwɛn ɔ. ²⁰ Dogbɔn yiwe gbaza mɛn ɔn ɛhun o mɔn yoyo bu na mi-i. ²¹ ɖo mi-i ɖo ɔvɔsantɔ ɖedo ovoɖe le Mawu we oxwe gbe. ²² Mia sɔ kinkando eji kpodo xɔse we oji, oji ke na we kpo gbaza ke wu ye kɔn kpodo ɛsin kinkwɛn. ²³ Mia ɖo mɔn nu kpinkpɔn mangbɔjɔ-mangbɔjɔ tɔn, ɖo Mawu ke do akpa gbe ɔ le ogbe ji-i. ²⁴ Mia sɔ wan nyi-nyi kpo onuywɛn wiwa we kpakpa le miaɖe mɛ sɔ nyɔ onu. ²⁵ Mia nɔn do kpakpa lanmɛn na miaɖe dogbɔn okpɔ ninɔn mɛ. ²⁶ ɖo na mi wa nuvwɛn ke mi-i nyɔn-ɔ, ɛhwɛ sɔke ɛmɛ ti-i ɔn mɔn le blɛ. ²⁷ Vɔ ɛmɛ ɖiɖɔ ɖaxo kpligidi ɖokpo kpodo ozo-o manci wɛ na fiɔ Mawu we kɛntɔ ye. ²⁸ Mɛɖe kpokpoe ke na gbɛ ogbe na-a Moyizi we osɛn-ɔ na ku. ²⁹ Oto hinhɛn nyinylan ni-i lɛ jɛ na mɛnke na yɔ ocancica we ɛhun bio-o ɛhun mankɔn-mankɔn, ɛhun ke na kɔn nyi wu e bo-o zu-u ɛfɛnu we gbigbɔ-ɔ. ³⁰ «Tɛye wɛ nyi ohlɔn ɖiɖe» yiwɛ«xwetɔ-ɔ na ɖɔ ɛhwɛ na yiwe togu-u» ɖɔ mi-i mɛke na lɔ e mɔn ha-a. ³¹ Onu ɖaxo kpligidi wɛ nyi bio oa flɛ jɛ lɔxome Mawu ɛgbio-ɛgbio. ³² Vɔ mi flin vivɛsise we azan ke mɛ mi-i gbɔn le gankemɛ mi ɖyɛ kinklɛn mɛ. ³³ ɖo migbɔn ɛmɛ zuzu ye mɛ, ɛtɛci na ɛmɛ ye mɛ kpodo vivɛsise ye. ³⁴ ɖo mi gbɔn dɔŋɖunu na mɛke le gankpamɛn ye, mi bo jo ye do nye bo bɛ mia we nuziza ye ɖo mi-i nywɛ lɔ bio tɛnxo manvɔ-manvɔ ɖe le te kpɔn mi. ³⁵ Yiwɛ dɔn mi-i ka jo-o kando eji miatɔn ke wu ɔjɔ ɖaxo ɖe xodo. ³⁶ ɖo ohun kuku wɛ na na mi na nyi-i nuke we akpa gbe-e Mawu do na mi-i. ³⁷ «ɖo le ganxixo viɖe mɛ siɛ ɔ mɛnke o gbɔnɔ ɔ na-a va-a.» ³⁸ ɖo ɛmɛ jijɔ na nɔn ɛgbɛ dogbɔn xɔse ji-ɔ. Vɔ, kɔn kpɔ oŋjiyɛ sɔ yiwu na e gbɔjɔ.» ³⁹ Vɔ miye mi ɔn le mɛnke na bu-u ye dogbɔn gbɔjɔ-gbɔjɔ yetɔn mɛ. Vɔ miye mi-i le mɛnke naa ɖo xɔse ye a do hlwɛn okla-a yetɔn gan.