¹ Ko kan ŋumɛ na ŋusoglo nyɔxonɔ a gbɛ onu ni-i, vɔ do akpakpa lanmɛ ni-i ɖi ɛmɛtɔ ha, nɔ do akpakpa lanmɛ na hwanjeviye ɖi nɔvi ŋusungloye ha. ² A bo do akpakpa lanmɛ na nyɔnu nyɔxonɔye ɖi ajinɔye ha, e mɔnha ke, o na nɔ do akpakpa lanmɛ na nyɔnuviye ɖi nɔvi nyɔnu siye ha, kpodo zinzanmɛ mimɛ. ³ Kpodo sisi, kpe ŋkunsi do okposi keye ni hyan ɔlɔdo ye wu. ⁴ Vɔ, na okposiɖe do vikpɛviye a lo mam yɔviye, ye we ovi lɛ ye ninɔ kplan sisi ɖiɖo na xwedo yetɔnye tantyɛn, a bo kpe ŋkunsi do xwedo la wu ɖi kena ye kpe ŋukunsi do yee wu le vikpɛvi mɛ ɖo ha. Onu ke na nɔ jɛŋu na Mawu xɛn xi. ⁵ Okposi kena hyan ɔlɔdo, ke na ɔn ɖo ɛmɛ ti kena na kpe ŋukunsi do ewu , e nɔ sɔ omɔ kpinkpɔn etɔn sɔ ɖo Mawu ji. Ozan kpodo oklo, e nɔ ɖe kukunɔ a bo xo ɛɖɛ nɔ kpodo vivɛ nu dido. ⁶ Vɔ okposike sɔ eɖe sɔ na ɛgbɛ ɖuɖu, e le ɛgbɛ ganke bo oku. ⁷ Ogbe ɖiɖe ke ye na ona lɔ do asi na ye, xɛn nyi ke na ɛmɛ ɖe ko mɔ do va kpɔn oxo ɖe a bo lɔ do ye wu nɔ o. ⁸ Na ɛmɛ ɖe ɔn nɔ kpe ŋukunsi do ɛmɛ yetɔn wu, le ota, ɛmɛ keye ni le xwedo etɔn gbe ɔ, e bo flɛ le xɔsemɛ. E mɔ nlawu maxɔsetɔ. ⁹ Keŋgbɔxwe na o na do nyɔnu ɖe we nyikɔ okpo siye we wema mɛ, oxwe etɔn ɔn ɖo na hwe hugan kanɖeko. E bo na nyi nyɔnusike ɖo osu ɖokpo gee kpɔn do ɛgbɛ etɔnmɛ. ¹⁰ Ye bo na nyɔ ɛ bio e mɔn nyi odan nywɛ watɔ, bo nɔ na okplan vikpɛye, bo nɔ yi jo nɔ, bo nɔ klɔ ɔfɔ na xɔsetɔye, bo nɔ gɔ ɔlɔ na ɛmɛ ke ye ni le vivɛsise mɛ ye, bo mɔ nɔ bya ŋukunsi do odan nywɛ ɖekpekpe wiwawu. ¹¹ Vɔ, ko do okposi nyɔnuviye we nyikɔ wema ɔ mɛ, ɖo gankemɛ na ŋusunglo nɔ va jlo ye nɔ, ojlo xin ɔ bo va dɔn ye tɛ le Kliso Mawu, ye nɔ jlo na ɖe osu. ¹² Ɛmɛ ɔ wɛ dɔn na Mawu we kojoɖiɖo na jɛ ye ji, ɖe ye fyan na Yesu Kliso ɔ. ¹³ A mɔ sɔ kpe-ɔ, ke e nyi nɔ bio ɖiɖɔ wɛ ye va kplan-ɔ, ye nɔ dan gbɔn oxwegbe ye nɔ ke va nylan taŋ ɔ wɛ nɔ nyi bio jɛtun jijɛ nɔ hugan wu ye, oxo ke ɔn kanye ye mɔn do onu emɛ nɔ a bo nɔ lɔ oxo ke ye ɔn ɖo na lɔ ye nɔ. ¹⁴ Iwɛdɔn, ko jlo bio okposiye nyɔnuviye a ɖe osu amɔji ovi, a bɔ kplɔ oxwe yetɔn ye. E xin-ɔ kɛntɔ miatɔn ye ɔn mɔ ba kpɔn omɔ a do lɔ oxo nyanylan ti do mia wu nɔ. ¹⁵ Ɖo, okposi ɖe ye bu le omɔ nywɛ ɔ ji, bo kplɔ satana do. ¹⁶ Vɔ, na nɔvi xɔsetɔ nyɔnusi ɖe ɖo okposiye le xwedo etɔn mɛ , e ɖo na kpe unkunsi do ye wu, ye ɔn nyi agban le okɔ ji na agun ɔ nɔ. Agun ɔ mɔn do ɔlɔ wu okposi ke ye le ohyan mɛ ye. ¹⁷ Agun mɛhyɔn ke ye kplɔ agun nɔ nywɛɖe ye, e jɛ bio ye a nɔ ɖo bubu na ye, a bo nɔ tu ɔxɔ na ye, le otaji le ye ɛmɛ ke ye ni nɔ to Mawu we oxo nɔye, a mɔ kplan onu ɛmɛ nɔ ye. ¹⁸ Ɖo, winwlan kinkwɛn ɔ lɔ bio:«ogle lɛ tɔ ni ko bla onu na nyi buke nɔ kpedo ewu amɔ ɖe ɛjinukun-ɔ ye tɔn do ovo na getin ye nɔ o.» winwlan kinkwɛn-ɔ mɔ lɔ bio«Odan wiwa ɖo na yi odan ke e wa nɔ we ɔxɔ tutu.» ¹⁹ Ko yi ogbe na ɛhuɛ dido we oxo ɖe do kpan ŋukɔn agun mɛhyɔn ɖe, na ɛmɛ ɔwe alo ɔtɔn ɔn lɔ bio oxojɔxo mɛ-ɔ. ²⁰ Ɛmɛ keye ni nɔ wa onu nyanylan, nɔ gbɛ onu na ye le ɛmɛ ye bi we ŋumɛ, na ɛmɛ gbokpwe ye a do vɔ. ²¹ Ko bo bio sɔn siwe nɔ vivɛɖe, le Mawu kpo kliso Yesu, kpodo ɛwɛndotɔ cincan Mawu tɔn ye we ŋukɔn nɔ bio yi bo zɔn do osɛn ke ye ji, ko mɔ nɔ ɛmɛɖe ji, ko mɔ kpɔn ŋumɛ na ɛmɛ ɖe keŋu gbɔxwe a wa onu. ²² Ko hwlɛndo a do ɖo ɔlɔ ota na ɛmɛ ɖe, a bo do sɔ agun we odan ɖe sɔ do ɔlɔ mɛ ni-i o. Ko o ɖo ɔlɔ onu nyanyla ɛmɛ ɖe tɔn mɛ, ɖiwe do mi mɛ ji. ²³ Ko mɔ nu ɛsin ɖyɔ nɔ o, vɔ nɔ vɛn viɖe-viɖe, do dɔmɛ we ɔdɔntɔwe wu, ɖo onɔ yawu jɛ ɔdɔn. ²⁴ Ɛmɛ ɖeye we onu nyanylan ke ye na ye wasi nɔ le agbaŋugba keŋu gbɔxwe ye nɔ va ɖɔ ɛhwɛ na ye, vɔ, ɛmɛ ɖeye tɔn, oganxixo ke na jɛ godo ni-i mɛ wɛ ye nɔ va nyɔ-ɛ le. ²⁵ E mɔke wɛ odan wiwa nywɛ ye can ye nɔ le agbaŋugba, ke ye na ye ɔn kpɔn nɔ trɔ lɔ ye, ko nɔ ci hwihwla mɛ gbɔn do yi o.