¹ Ko ɔn jro bio mi na manywɛ mɛ na onu ni na gbigbɔ mɛ tɔn ye we akpa ji, nɔvi ye. ² Mi nywɛ bio, ogan ke mɛ mi nyi maxɔse tɔ ye, mi nɔ jo mia ɖe do na yɛhwe ye ke ye ɔn nɔkɛ onu can, le omɔ ɖe kpɔkpwe ji, ye nɔ kplɔ mi ɖejan ɖe jan gbɔn vuvlu mɛ. ³ Yi wɛ dɔn na ko jro nɔ na mi na nywɛ bio ɛmɛ ɖe kpokpwe ke na lɔ oxo gbɔn gbigbɔ Mawu tɔn mɛɔ, ɔn kpewu na lɔ bio:« Ko do onu Yesu». E mɔ ke wɛ ɛmɛ ɖe ɔn kpewu na bio:« Yesu wɛ nyi Xwetɔ»na ɔn nyi bio gbigbɔkinkwɛn wɛ lɔ oxo gbɔn eji nɔ. ⁴ Onu ni na hamɛ hamɛ wɛ le, vɔ, gbigbɔ ɖokpo ɔ jan wɛ nɔ na. ⁵ Odan do asi hamɛ hamɛ wɛ le, vɔ, Xwetɔ ɖokpo gee wɛ le. ⁶ Odan hamɛ hamɛ wɛ le, vɔ, Mawu ɖokpo ŋumyɔ wɛ nɔ dɔn na e nɔ kpewu nyi wiwa le ɛmɛ ɖokpo dokpo mɛ. ⁷ Gbigbɔ we odan nɔnyi wiwa na ɛmɛ ɖokpo ɖokpo, bo nɔ nyi ale na ɛmɛ bi. ⁸ Ye na ɛmɛ ɖe ɖo gbɔn gbigbɔ mɛ oxo lilɔ kpodo onu nynywɛ kpo, a mɔ na ɛmɛ bu, oxo lilɔ kpodo onu gɔnmɛ sise do gbɔn gbigbɔ ɖokpoɔ mɛ. ⁹ Gbigbɔ ɖokpo ɔ nɔ na xɔse ɛmɛ bu, e nɔ na ɛmɛ bu ke onu nina ɔdɔn gigɔ tɔn do gbɔ gbigbɔ ɖokpo mɛ. ¹⁰ E nɔ na ɛmɛ bu, onu nina ŋudandonu tɔn, e nɔ na ɛmɛ bu onu ni na oxolɔɖenyi tɔn, e nɔ naɛmɛ bu, onu ni a do nyɔ ovo gbigbɔn ke le gbigbɔ vqavwe ye mɛ, i doɖyo nɔ na ɛmɛ ɖe no do ogbe vovwe ye a mɔ na na ɛmɛ ɖokpo nɔ ɖe ogbe vovweɔ ye we gɔn mɛ. ¹¹ Vɔ, gbigbɔ ɖokpo ŋmyɔ nɔ na odan gbɔn onu ye xeɖe ɖe mɛ,, bo nɔ na onu nina ɛmɛ dokpo ɖokpo vwe vwe ɖi ke gbigbɔ nɔ wasi cican ɖo ha. ¹² Ɖi ke gbaza nyi ɖokpo ɔ bo ɖo ɔlɔ klan vovwe ye, ye ɛmɛ xe ɖe ɖe nyi ɔlɔ klan gbaza ɖokpo ɔ, e mɔ ke wɛ e le kpo Kliso kpo. ¹³ Ɖo, do gbɔn gbigbɔ ɖokpoɔ mɛ ye Mawu we ɛsin na mi mɛ xeɖe ɖe le gbaza ɖokpo mɛ, na e mɔ nyi jwifu ye wɛ o, alo Glɛki ye wɛ o, ɛmɛ xixɔ alo ɛmɛ ke ye le e ɖe nu, dogbɔn gbigbɔ ŋumwɔ ɖokpoɔ mɛ wɛ ye ɛmɛ xeɖe ɖe nyi wiwasi, amɔn nu le gbigbɔ dokpoɔ mɛ ¹⁴ Ɖo,, ɔlɔ klan ɖokpo gee hwɛn wasi gbaza ɔ, vɔ ɔlɔ klan susu wɛ. ¹⁵ Na ɔfɔ bio:« Ke kɔn nyi ɔlɔ, kɔn nyi gbaza tɔn, e xin ɔ wɛ na dɔn e na dokpa gbaza ɔ we akpaɖe ma nyi? ¹⁶ Na ota na lɔ bio, ke kɔn nyi ŋukunsi, kɔn nyi gbaza tɔn, e xin hwɛn na dɔn na ɖokpo gbaza ɔ we akpa ɖe ma nyi. ¹⁷ Na gbaza ɔ xe ɖeɖe do nyi ŋukunsi ɔ, na ɖe ye na wa ado se onu? ¹⁸ Vɔ, Mawu ɖo ɔlɔ klan ɖokpo ɖokpo do gbaza ɔ wu ɖi ke ejro ɖo ha. ¹⁹ Na xe ɖeɖe do nyi onu ɖokpo, gbaza na mɔ le wɛ? ²⁰ Yi wɛ dɔn ɔlɔ klan susu wɛ le, vɔ gbaza ɖokpo gee wɛ le. ²¹ Ŋukunsi ɔn kpe wu na lɔ na ɔlɔ bio, kɔn ɖo ohyan tɔ we. E mɔ ke ota ɔn kpewu na lɔ na ɔfɔ bio, kɔn ɖo ohyan tɔ we. ²² Vɔ, gbaza we ɔlɔ klan ke ye ye kpɔn bio ye ɖo hwe do ewuye, ye bo nyi onu vivɛ. ²³ Ɔlɔ klan gbaza ɔ tɔn ke mi nɔ kpɔn bio bubu susu ɔnn le ye wu ye wɛ mi nɔ va wlɛ olɔ ya na taŋu; ke ye we nyi kɔ na ye ɔn yɔ vaŋu ye ɔ ye ji wɛ ayiha nɔ le taŋu. ²⁴ Syɛ gbaza ɔ we ɔlɔ klan ye ke yeb nyɔ kpinkpɔn ye ɔn ɖo ohyan na ye a do bubu ye wu ɖo ye o ɖo bubu na ye ɖe ye vɔ. Vɔ Mawu do gbaza ɖo ɖe na ye a nɔ do ɖo bubu taŋu na ɔlɔ klan ke ye na bubu hwe do ye. ²⁵ E xin ɔ mi ma ɔn mɔ le nɔ le gbaza wu nɔ, vɔ, gbaza we ɔlɔ klan ye na nɔ ɖo wle ohye na ye nɔ niɔ ye. ²⁶ Na ɔlɔ klan ɖe ɖu aya nɔ, ɔlɔ klan gbokpwe ye nɔɖu aya kpwe. Ɔlɔ klan ɖe le ye bo do bubu e wu nɔ, ɔlɔ klan gbokpwe nɔ kpɔn jijwɛ kpoe. ²⁷ Kliso we gbaza wɛ mi ye nyi, ɛmɛ ɖokpo bo nyi ɔlɔ klan ɖe le gbaza wu. ²⁸ Mawu bo do ɛmɛ ye onyi le cɔci mɛ, tantyn ton bo nyi ɛmɛ didɔn ye, ɔwegɔ bo nyi oxolɔɖenyi tɔ ye, ɔtɔngɔ bo nyi onu kplan ɛmɛ tɔ ye kpodo ɛmɛ ke ye ɖo onu nina ŋudandonu tɔn kpodo ɛmɛ ke ye nɔ gɔ ɔdɔn ye, ɛmɛ ke ye nɔ kpedo ɛme wu ye, ɛmɛ kplɔ tɔ ye, ogbe vovwe do tɔ ye. ²⁹ Mi mɛ bi wɛ nyi ɛmɛdidɔn? Ye ɛmɛ xe ɖeɖe wɛ nyi oxolɔɖenyi tɔ? Ye ɛmɛ xe ɖeɖe wɛ nyi onu kplan ɛmɛ tɔ ye? Ye ɛmɛ xe ɖeɖe wɛ nyi onu kplan ɛmɛ tɔ ye? Ye ɛmɛ xe ɖeɖe wɛ nɔ wasi ŋudandonu ye? ³⁰ Ye ɛmɛ xe ɖeɖe wɛ ɖo ɔdɔn gigɔ we onu nina? Ye ɛmɛ xe ɖeɖe wɛ no ɖo ogbe vovwe? ye ɛmɛ ye xe ɖe ɖe wɛ nɔ ɖe ogbe vovwe we gɔnmɛ? ³¹ Ke e le emɔ, mi kan onu ni na ke ye le vivɛ ɖe ye. syɛ, ma xlɛ mi omɔ ke nyɔhwin hugan omɔ ye xeɖe ɖe ye.