¹ Xena ye fo josido canwegɔ lɔ, awin zin cɛncɛn cɛn le sɛxwe na cɛju ogban ha. ² E wɛ un mɔ wɛnzangun canwe le nukɔn na Mawu, ye bo na ahwankpɛn canwe ye. ³ Wɛnzangun bu wa bo ci akpa na avɔsinsan we agba lɔ; e hɛn zluyagannu xena ye sɔ sika do blo do alɔ mɛ ye ni-i zluya susu na ni a do sɔ kpe yisenɔ lɛye sese we oɖɛxixo lɛye, a bo do san avɔ le sika we agba lɔ ji le xɔluzinkpwe lɔ we nukɔn. ⁴ Zluya we azɔ kpo oɖɛxixo yisenɔ lɛye tɔn nɔ le yi oji xɔn le wɛnzangun lɔ we alɔmɛ xɔn le Mawu we nukɔn xɔn. ⁵ E nɛ godo, wɛnzangun lɔ sɔ zluya we gannu sika tɔn lɔ, bo de ozo le agba lɔ ji do e mɛ gbɔɔn e gɔ, bo sɔ flɛn do anyizanmɔ, e we jokun de ogbe taŋu, ogbe lɛye ɖi, gbɛmɛ bo ɖe abi xlaxlaxla, anyizan hunhun. ⁶ E wɛ wɛnzangun canwe xe hen ahwan kpɛn canwe lɛye jla yeɖe ɖo bo na do kun ahwankpɛn lɛye. ⁷ Wɛnzangun tintantɔn kun ahwankpɛn lɔ, e wɛ okɛnjokun, ozo kpo ohun kpo caka bo ja do anyizanji. Anyizan lɔ we mima do atɔn etɔn fyɔ atinye we mima do atɔn can fyɔ, ogbeye fyɔ sese se. ⁸ Wɛnzangun awegɔ lɔ kun ahwankpɛn wɛ ye sɔ onuɖe ɖi oso zozo ha bo sɔ flɛn do oxu mɛ. Oxu lɔ we mima do atɔn tlɔ zun ohun. ⁹ Onu dida Mawutɔn xeni le ogbɛ le oxu mɛ lɛye we mima do atɔn ku sese, atɔji hun lɛye we mima do atɔn gba. ¹⁰ Wɛnzangun atɔngɔ lɔ kun ahwankpɛn wɛ sunhwlɛvi ɖaxo ɖe flɛ sɔn oji bo le hun xɔn ɖi ofu we ozo ha. E flɛ jɛ otɔ sisa ye kpo otɔjɔtɛnye we mima do atɔn mɛ. ¹¹ Sunhwɛvi nɛ lɔ nyikɔ nɔ nyi amavivɛ; osin lɛye we mima do atɔn vɛ kpakpakpa wɛ omɛ susu xe nu osin lɔ ku do vivɛ lɔ wutu. ¹² Wɛnzangun ɛnɛgɔ lɔ kun ahwankpɛn e wɛ ye xo ohwe we mima ɖo atɔn, bo xo osun we mima do atɔn, bo gɔ xo sunhwlɛvi lɛye we mima do atɔn na mima do atɔn lɔ tɔn a ɖo ci zinvlu mɛ. Okle bu mima do atɔn weziza, hinhɔn etɔn, ozan can bu mima do atɔn hinhɔn etɔn tɔn. ¹³ Na mɔ kpaŋu, un se gangan ɖe hlɔn le oji voo bo wa le yi xɔn, bo le axwa nu lelele ɖɔ: Ao! Ao! a ni ha wɛ na wa jɔ do gbɛtɔye ji le anyizanji le hwexenu na wɛnzangun atɔn gbokpwe lɛye na wa kun ahwankpɛn yetɔn lɛye?.