¹ E nɛ godo, un mɔ kanlin ɖe tɔn le oxu mɛ, bo ɖo azo awo kpodo ota canwe, e cɔn xɔlu we gbakɔn vuvu ɖe do azo lokpo-lokpo ji, ye wlan nyikɔ xeni nyi acɔn kinkɔn do Mawu go do ota lokpo-lokpo go. ² Kanlin xena un mɔ lɔ le ɖi okpɔ ha, afɔ etɔn lɛye le ɖi ohla we afɔye ha, onu etɔn le ɖi kinikini ajaŋuta we onu ha. Dlagɔn lɔ sɔ hɔnhlɔn etɔn, xɔluzinkpwe etɔn kpodo acɛ ɖaxo ɖe sɔ ni-i. ³ Kanlin lɔ we ota lokpo le ɖi onu xena ye do afɔku gbɔɔn e bo ja kuku gbe ha, vɔ abi xeni ɖɔ ma hɛn oku wa ni-i lɔ, o o ku. E nɛ lɔ vivi na omɛ xeni le anyizanji lɛye wɛ ye xo do-e. ⁴ Omɛye jɛ dlagɔn lɔ sinsɛn ji, ɖo e na acɛ kanlin lɔ; ye nɔ sɛn kanlin lɔ can, a bo le ɖɔ xɔn ɖɔ: Ani ha wɛ gɔ le ɖi kanlin xe ha, mɛ ha wɛ kpego bo na tɔn ahwan wi-i? ⁵ Ye ɖe ogbe ni-i na ni-a do ɖɔ gonyitɔ we oxo, a bo do kɔn acɔn do Mawu go; ye na acɛ wi-i na ni-a do wa ozɔn na osunzan kanɖe nukun awe. ⁶ Kanlin lɔ jɛ oxo nyinyla ɖiɖɔ ji bo do le kɔn acɔn do Mawu go xɔn, e nɔ kɔn acɔn do nyikɔ etɔn go, a bo kɔn acɔn do ofi xena e nɔ nɔ go, a bo gɔ kɔn acɔn do xeni le sɛxwe lɛye go. ⁷ Ye ɖe ogbe ni-i na ni-a do tɔn ahwan yisenɔ lɛye a bo ɖu le ye ji. Ye na acɛ wi-i do akɔta ɖekpokpwe ji, ogbe ɖekpokpwe ji, kpodo otogun ɖekpokpwe ji. ⁸ Omɛ xeni le anyizan ji lɛye sese na sɛn-ɛ, ye omɛ xena ye ma wlan nyikɔ yetɔn do lɛngbɔvi xena ye hu lɔ we ogbɛ wema lɔ mɛ le bibɛnu ogbɛ lɔ tɔn gɛ lɛye wɛ na sɛn-ɛ. ⁹ Na omɛ ɖe ɖo oto, ni se onu. ¹⁰ Omɛ xeni ɖo na yi gankpamɛ, na yi gankpamɛ, omɛ xeni ɖo na ku le ohi nu, na ku le ohi nu. E wɛ zɔn yisenɔ lɛye ɖo na do vivɛnu, a bo ɖi onu. ¹¹ E wɛ un gɔ mɔ kanlin lɔ wɛ e etɔn le anyizan gɔ bo ɖo azo awe ɖi lɛngbɔvi we azo ha, bo le ɖo oxo xɔn ɖi dlagɔn ha. ¹² Kanlin tintantɔn lɔ we acɛ kpokpo wɛ e le zan xɔn le nukun mɛ etɔn, e na wɛ omɛ xeni le anyizan ji lɛye sese sɛn kanlin tintan tɔn lɔ xena abi xeni ɖɔ ma hu-i lɔ wa ku na lɔ. ¹³ Kanlin awe nɛ lɔ jɛ onu ɖaxo-ɖaxo lɛye biblo ji, kaka gbɔɔn bo nɔ ɖe ogbe wɛ ozo nɔ jɛ ote sɔn oji a bo jɛ anyizan ji le omɛ lɛye kpokpo we nukun mɛ. ¹⁴ E nɔ sɔ onu xena ye ɖe ogbe ni-i ɖɔ ni bo blo le kanlin ɖe lɛye we nukunmɛ, do blɛ gbɛtɔ ye ɖu le anyizan ji, e nɔ gbɛtɔye le anyizan ji xɔn ɖɔ ye ni bo blo akpajlɛ alo onu ɖiɖe kanlin xena ye xu ohi wɛ e gɔ fɔn wa ogbɛ lɔ tɔn. ¹⁵ Ye ɖe ogbe na kanlin awe gɔ lɔ ni bo na ogbɛ kanlin tintantɔn lɔ we onu ɖiɖe alo akpajlɛ lɔ, e nɛ, onuɖiɖe lɔ na ɖɔ oxo, na ye a do hu omɛ ɖekpokpwe xeni gbɛ sinsɛn-ɛ lɛye. ¹⁶ Kanlin lɔ nɔ zin omɛ kpokpo ji gannu-gannu, vikpɛvu kpodo mɛxoye kpo, dɔ kun nɔ ye kpodo ayanɔye kpo, omɛ xixɔye kpodo omɛ xeni le yeɖe siye kpo na ye a do yi josi ɖe do aɖusilɔ go alo nukɔnu yetɔn ye go. ¹⁷ E nɛ, omɛti ma kpego bo na xɔ onu ɖe alo bo na sa onuɖe na e ma o ɖo josi xeni nyi nyikɔ kanlin lɔ tɔn alo kɔnŋuta we wemakun xeni sɔ ogbe xa nyikɔ etɔn gɛ ¹⁸ Le ofi xe, e byɔ onu nyinywɛ. Na omɛ xeni zin ni blo kɔnŋuta na kanlin lɔ we nyikɔ. Kɔnŋuta we wemakun lɔ sɔ ogbe xa gbɛtɔ we nyikɔ, e wɛ nyi sandi ayizɛn ota ayizɛn nukun ayizɛn(666).