¹ E wɛ na mɔ kpoŋu, un mɔ lɛngbɔvi lɔ le ote le oso syɔn tɔnji, e yɔ kpodo gbɛtɔ akpo sandi lokpo akpo ota ɛnɛ nukun ɛnɛ.(144000) omɛ xe we nyikɔ na ye wlan kpodo otɔ kpo do nukɔnnu na ye. ² Un se ogbe ɖe ɖi le sɛxwe ɖi otɔ ɖaxo ɖe wɛ wa le yi xɔn alo jokun wɛ le do ogbe xɔn ha, ogbe xena un se lɔ di ogbe xena onuxonu okan nɔ nɔ do le hwexenu na ye le xo-e xɔn ha ³ Ye le ji ohan yɔyɔ ɖe le xɔluzinkpwe lɔ we nukɔn xɔn, le onu le ogbɛ ɛnɛ lɛye kpodo nyɔxonɔ lɛye we nukunmɛ xɔn. Omɛti ma kpego na kplan ohan lɔ zɛgbɔn gbɛtɔ akpo sandi lokpo akpo ota ɛnɛ xena ye vɔ xɔ le anyizanji lɔ gɛ. ⁴ Omɛ e nɛ lɛye ma o do oɖu yeɖe xa nyɔnusi ye gɛ, ye ma sɛkpɔ nyɔnusi kpɔn gɛ, ye nɔ le yonu na lɛngbɔvi lɔ a do yi viɖekpokpwe xena e le yi xɔn. Ye vɔ ye xɔ le gbɛtɔ ye mɛ na ye a do nyi omɛ tintantɔn ye xena ye sɔ na Mawu kpodo lɛngbɔvu lɔ kpo. ⁵ Ye ma kpa lɛlo kpɔn gɛ, oxo ti ka ma le ye go wɛ ye na gbɛ na ye gɛ. ⁶ E wɛ un mɔ wɛnzangun obu wɛ e le hlɔn le oji voo xɔn owɛnɖagbe mvɔ mavɔ ɖe le e si wɛ e na do na gbɛtɔ lɛye le anyizan ji kpokpo, otogun ɖe kpokpwe, akɔta ɖekpokpwe, ogbe ɖekpokpwe, kpodo oto ɖekpokpwe. ⁷ E do axwa sinsyɛn ɖe bo ɖɔ: Mi do sisi na Mawu, a bo kanfu-i, mi kpa gigo ni-i ɖo ohwɛɖɔzan etɔn we ogan xo mi sɛn omɛ xeni da ojinukun, anyizan, oxu kpo otɔ jɔtɛn ye. ⁸ Wɛnzangun Mawutɔn bu jɛ godo na tintantɔn lɔ ɖɔ: E gba, E gba, Babilɔnu toxo ɖaxo lɔ, e yɔ xeni ɖɔn otogun kpokpo do ogbɛ ɖuɖu zinzanmɛ ɖi vɛn wɛ ye kpe na ye ha wɛ e nɛ lɔ hɛn xomɛsin wa na ye taŋu. ⁹ Wɛnzangun Mawutɔn atɔn gɔ bu jɛ ote do godo na awe nukɔn tɔn lɛye bo ɖɔ kpo axwa kpo ɖɔ: Na omɛɖe sɛn kanlin lɔ kpodo ɖiɖexlɛ etɔn kpo, bo yi josi ɖe do nkɔnnu alo alɔ go, ¹⁰ Omɛ e nɛ lɔ can na mɔ Mawu we xomɛsin taŋu ɖi omɛ xeni nu vɛn aku-aku xena ye kɔn do xomɛsin we glasin etɔn mɛ ha, e na se vivɛ taŋu le ozo kpo hwemi mɛ le nukɔn na wɛnzangun Mawutɔn lɛye kpodo lɛngbɔnvi lɔ we nukɔn ¹¹ Ye omɛ xeni le sɛn kanlin lɔ kpoɖiɖe xlɛ etɔn , kpo omɛ ɖekpokpwe xeni yi nyikɔ etɔn we josi lɔ, ozo xena do aya na ye we azɔ mɔ nɔ ci kpɔn gbeɖe wɛ gbɔjwɛ ma le na ye okle kpo ozan kpo gɛ. ¹² E wɛ zɔ yisenɔye xeni nɔ blo do Mawu we osɛn ji lɛye kpo omɛ xeni ɖi onu na Jesu lɛye ɖo na do vivɛnu. ¹³ Un se ogbe ɖeɖi le sɛxwe bo ɖɔ: Wlan oxo xe! Bɛ sɔn odin, nyɔnanɔ wɛ nyi omɛ xeni ku le yise mɛ, ɛɛn gbigbɔ lɔ ɖɔ ye ni boo wa yi ɖyɛ gbɔjwɛ yetɔn mɛ ɖo ozɔn jijɔ hun yetɔn lɛye xo do ye. ¹⁴ Un mɔ sunwɔ wewe ɖe wɛ omɛ ɖe ɖi ovi gbɛtɔ tɔn ha flɔn-anyi le e ji jɛgbakɔn sikatɔn le ota ni-i wɛ ohi ɖiɖa ɖe le alɔ mɛ ni-i. ¹⁵ Wɛnzangun Mawutɔn ɖe tɔn sɔn Mawu we oxwegbe bo le ɖɔ na omɛ xeni flɔn anyi le sunwɔ lɔ ji xɔn kpo axwa kpo ɖɔ: Sɔ oji nukun gbo ni tɔwe a bo ɖe oji nukun, ɖo oji nukun ɖiɖe we ogan xo, oji nukun lɛye o bya le anyizan ji. ¹⁶ E wɛ omɛ xeni flɔn anyi le sunwɔ ji lɔ nyi oji nukun gbo hi etɔn do anyizan ji, bo ɖe oji nukun lɛye le anyizan ji. ¹⁷ Wɛnzangun Mawu tɔn bu tɔn sɔn sɛxwe le Mawu we oxwegbe, e yɔ can hɛn ojinukun gbo hi ɖiɖa do alɔ mɛ. ¹⁸ Wɛnzangun Mawutɔn bu xeni do acɛ do ozo ji tɔn le avɔsinsan we agba lɔ mɛ bo ɖɔ kpo axwa lelele kpo na omɛ xe ɖo oji nukungbo nu ɖiɖa lɔ ɖɔ: Sɔ ojinukungbonu ɖiɖa tɔwe a bo gbo vɛn we atin xeni le anyizan ji lɛye we oxwi ɖo hlɛzɛ yetɔn lɛye o bya ^{19 20} Wɛnzangun lɔ nyi ojinukungbihi etɔn do anyizan ji bo gbo oxwi xeni le vɛn we ogle lɔ mɛ le anyizan ji bo bɛ ye kɔndo do xomɛsin Mawutɔn we onu fyɔndo ɖaxo lɔ mɛ. Ye li hlɛzɛn lɛye le onu fyɔndo lɔ mɛ le toxo lɔ godo, ohun tɔn le onu fyɔndo lɔ mɛ taŋu bo gbakpe gbɔɔn do yi kpɛntin sandi atɔn