¹ Josido ɖaxo ɖe ze le ojinukunsin: Un mɔ nyɔnusi ɖe xe sɔ ohwe sɔ do ɖi awu ha, osun bo le afɔ etɔn lɛye gɔ, Jɛgbakɔn ɖe le ota ni-i wɛ sunhwlɛvi wyawe lɛye le Jɛgbakun lɔ go. ² Xoxo le nyɔnu lɔ si, alin ɖu omɛ bo jɛ e ji wɛ e le axwa nu do ovi jiji we vivɛsise wutu. ³ Josodo bu gɔ ze le ojinukun; un mɔ dlagɔn vɛvɛ cɛcɛcɛ ɖe, e ɖo ota canwe, azo awo, xɔ lu we gbakɔn vuvu ɖe le ota lokpo-lokpo ji. ⁴ E sɔ vɔnu etɔn bo do bɛ sunhwlɛvi lɛye we mima do atɔn kɔn anyizan ji. Dlagɔn lɔ le ote le nukɔn na nyɔnu xeni ja ovi jiji gbe lɔ, na ovi lɔ gbɛ tɔn kpoŋu, e na tlɛn-ɛ ɖu. ⁵ E ji ovi sunnuglo ɖe, ovi lɔ na kpa cɛ do otogun lɛye sese ni. Wɛ acɛ kpikpa etɔn na syɛnxu ɖi ogankpo ha. Tintan lokpo, ye kɔ ovi lɔ do yi Mawu kpodo xɔlu zinkpwe etɔn de. ⁶ E wɛ nyɔnu lɔ bo sɔn yi gbetotlo mɛ, ofi xena Mawu o jla ɖo anyi-i xoxo, na ye a do na onuɖuɖu wi-i le flɛn na azan akpo lokpo sandi awe ota ayizɛn(1260). ⁷ Ahwan bɛ le sɛxwe. Mikayɛli kpodo wɛnzangun xeni le acɛ etɔn we agɔ ye fun ahwan xa dlagɔn lɔ. Dlagɔn lɔ can fun ahwan, e yɔ kpodo wɛnzangun etɔn lɛye. ⁸ Vɔ, dlagɔn lɔ ma ɖu le e ji gɛ, tɛnmɛ ti ka ma gɔ le sɛxwe na e yɔ kpodo wɛnzangun etɔn lɛye gɛ. ⁹ Ye tintin-i tɔn-ɛ, dlagɔn ɖaxo lɔ, odan xoxo xena ye nɔ ɖɔ lɛye kpodo satan lɔ, e yɔ xeni nɔ blɛ gbɛtɔ lɛye sese ɖu, ye sɔ e yɔ kpodo wɛnzangun etɔn lɛye flɛn do anyizan ji. ¹⁰ E wɛ un se ogbe sinsyɛnxu ɖe ɖi le sɛxwe ɖɔ: Odin hwlɛngan wa, Mawu mitɔn ɖe hɔnhlɔn etɔn kpodo xɔluɖuɖu etɔn sɔ xlɛ, odin acɛkpikpa le alɔmɛ na Klisi etɔn lɔ. Ɖo ohwɛdonamɛtɔ xeni nɔ le Mawu mitɔn we nukɔn a bo le do ohwɛ na miye nɔvi lɛye xɔn le okle kpodo ozan kpo, ye tintin-i tɔn-ɛ le sɛxwe. ¹¹ Vɔ do gbɔn ohun lɛngbɔvu lɔ tɔn mɛ kpodo oxo Mawutɔn xe go na ye ɖe kunnu do lɔ ye do ɖu le e ji, ye ma gbɛ ɖɔ mi ye lɛye bo na sɔ ogbɛ mi ye lɛye tɔn na gɛ, ye ma gbɛ oku gɛ. ¹² E wɛ zɔn sɛxwe kpodo omɛ xe le sɛxwe lɛye, mi nɔ jijwɛ mɛ, vɔ ahelu na miye, anyizan kpodo oxu kpo. Lɛgba nɛ flɛ jɛ mide, bo le xomɛsin ji taŋu ɖo e nyɔ-ɛ ɖɔ azan ovu tintin ɖe bɛ bo kpo na miye. ¹³ Xena dlagɔn lɔ mɔ ɖɔ ye bo sɔ miye flɛn do anyizan ji, e jɛ ogbe nyɔnu xeni ji ovi sunnuglo lɔ we ogbe nyinya ji. ¹⁴ E wɛ e sɔ aba xwe gangan ɖaxo ɖe tɔn, bo sɔ na nyɔnu lɔ, na ni-a do hlɔn a bo sɔn yi gbetotlo mɛ le nɔtɛn xena ye o jla ɖo ni-i lɔ mɛ, le flɛn, ye na na onuɖuɖu wi-i na oxwe atɔn adaɖe na ni-a do si a bo sin dinɖɛn nu le odan lɔ go. ¹⁵ E wɛ odan lɔ tun osin ɖi otɔsisa ha do godo na nyɔnu lɔ, na otɔsisa lɔ ni do ɖɔn-ɛ do sɔn. ¹⁶ Vɔ, anyizan kɛ onu bo mi otɔsisa xena odan lɔ tun do godo na nyɔnu lɔ, bo hwlɛn-ɛ gan. ¹⁷ Aɖi nyɔnu lɔ tɔn ɖo dlagɔn lɔ taŋu, wɛ e wa jɛ ahwan lɔ funfun xa jijimɛvi nyɔnu lɔ tɔn lɛye, ye mɛ xeni nɔ le blo dp Mawu we osɛn ji xɔn lɛye, ye omɛ xe nɔ blo onu do ogbe tasɛn Jesu tɔn ji lɛye.