¹ E nɛ godo,ye sɔ okan ɖe na-un wɛ e le onu jlɛtin ha:Ye ɖɔ na-un ɖɔ ci ote,a bo jlɛ Mawu we oxwe lɔ,avɔsinsan we agba lɔ,a bo xwle omɛ xeni le sɛn Mawu le emɛ xɔn kpɔn. ² Vɔ,nɔ kpɔn jlɛ oxwe lɔ we gaji gɛ,jo-e do,ɖo flɛn lɔ wɛ nyi omɛ xeni mɔ nɔ sɛn Mawu gɛ lɛye tɔn;ye na wa gbidi toxo mimɛ lɔ le afɔnu na osunzan kanɖe nukun awe. ³ Na na ogbe kunnuɖetɔ ce awe lɛye, ye na do dɔkpo ye a bo ɖɔ ɖɔdanyi na azan akpo lokpo sandi awe ota ayizɛn(1260). ⁴ Kunnuɖetɔ awe lɛye wɛ nyi olivutin awe lɛye kpodo zogbɛn awe lɛye xeni le nukɔn na Mawu xeni kpa acɛ le anyizan ji. ⁵ Na omɛ ɖe jlo bo na blo onu nyinyla xa ye, ozo nɔ tɔn le onumɛ na ye a bo fyɔ kɛntɔ yetɔn lɛye; ɛɛn, omɛ xe jlo na blo onu nyinyla xa ye, ɖena e na ku ɖo e nɛ. ⁶ Ye ɖo hɔnhlɔn bo na su ojinukunsin na jokun ti ma do le ja xɔn gɛ, le azan xe gbe na ye na le jla owɛn xena ye yi le Mawu de xɔn, ye ɖo hɔnhlɔn bo na do sɔ osin do tlɔ zun ohun, bo gɔ ɖo hɔnhlɔn bo na do do vivɛsise hamɛ-hamɛ na gbɛtɔye le anyizan ji ɖo ɖena e jlo-ye ɖo ha le hweɖekpokpwe hwenu. ⁷ Na ye ɖe kunnu yetɔn vɔ, kanlin xe tɔn le vivɛsise ɖaxo maɖo do we odo mɛ, na fun ahwan xa ye a bo le ye ji, bo na hu ye. ⁸ Wɛ ocɔ yetɔn lɛye na le toxo ɖaxo lɔ we omɔto le ofi xena ye ka Aklunɔ yetɔn do atinsoga ji le. Flɛn lɔ wɛ ye ɖo nyikɔ na ɖɔ Sodɔmu kpodo Ejiputi. ⁹ Gbɛtɔ xeni sɔn oto ɖekpokpwe mɛ, akɔta ɖekpokpwe mɛ, ogbe ɖekpokpwe mɛ, kpodo otogun ɖekpokpwe mɛ na mɔ ocɔ yetɔn na azan atɔn adaɖe wɛ ye ma le ɖike na ye na ɖi ye xɔn gɛ. ¹⁰ Omɛ xeye le anyizan ji lɛye na mɔ jijwɛ do oku yetɔn go, a bo ɖu oxwe, ye na ɖo onu ɖoxlan yeɖe, ɖo wɛnzangun awe lɛye hɛn vivɛsise wa na gbɛtɔye taŋu. ¹¹ Azan atɔn adaɖe lɛye godo, Mawu sɔ gbigbɔ ogbɛtɔn do ye mɛ, wɛ ye fɔn ci ote do afɔ yetɔn lɛye ji, wɛ obu ɖaxo ɖe jɛ omɛ xe le kpɔn ye xɔn lɛye ji. ¹² E wɛ kunnuɖetɔ awe lɛye se ogbe sinsyɛn xu ɖe ɖi le sɛxwe ɖɔ: Mi xlɛ ofi xe! e wɛ kɛntɔ yetɔn lɛye le mɔ ye xɔn wɛ ye le sɔn yi sɛxwe xɔn le sunwɔ mɛ. ¹³ Le ohwenɛ nu, anyizan hunhun wɛ mima do awo toxo lɔ tɔn hɔ bo gidi sesese; gbɛtɔ akpo canwe(7000) ku le anyizan hunhun nɛ lɔ hwe nu, obu ɖaxo ɖe jɛ omɛ gbokpwe lɛye ji, ye bo jɛ okpɛ dido na Mawu xeni le sɛxwe ji. ¹⁴ Vivɛsise tanylankantɔn awe gɔ wa yi atɔngɔ lɔ na wa zaanɖe din. ¹⁵ E wɛ wɛnzangun canwegɔ lɔ kun okpɛn. Ogbe sinsyɛnxu ɖe lɛye ɖi le oji bo ɖɔ: Odin ye sɔ xɔluɖuɖu do ogbɛ lɔ ji sɔ do alɔ mɛ na Aklunɔ mitɔn kpodo Klisi etɔn kpo tɔn; Xɔluɖuɖu nɛ lɔ na nɔ anyi kaka do yi mavɔ mavɔ!. ¹⁶ Nyɔxonɔ okonukun ɛnɛ xeni le xɔluzinkpwe yetɔn ji lɛye, cɔn nukun mɛ anyi bo le sɛn Mawu xɔn. ¹⁷ Ye le ɖɔ xɔn ɖɔ: Mi le do okpɛ na we xɔn yɔ Aklunɔ Mawu hɔnhlɔn nɔ, yɔ xeni le le egbe bo gɔ le osan, ɖo a zan hɔnhlɔn ɖaxo tɔwe bo do na wɛ xɔluɖuɖu tɔwe ci anyi. ¹⁸ Otogun xe mɔ nɔ sɛn Mawu gɛ lɛye le adanji taŋu, vɔ ogan lɔ xo na a do ɖe xomɛsin tɔwe xlɛ ye, a bo ɖo kojo na omɛkuku lɛye, a bo su axɔ na ɖɔɖanyiɖɔtɔ tɔwe lɛye, kpodo ozɔn watɔ tɔwe xe nɔ ɖo sisi na nyikɔ tɔwe lɛye vikpɛvu kpodo mɛxo kpo, ogan lɔ gɔ xo na a do va okun su do na omɛ xeni le gu anyizan ji lɛye xɔn. ¹⁹ Kpoŋu, ye hun oxwe Mawutɔn le sɛxwe, wɛ ɖaka okan cica tɔn ze le e mɛ. Jokun de ogbe, gbɛmɛ bo ɖe abi, anyizan hunhun wɛ okɛnjokun ɖaxo ɖe ja.